Каралды: 342

Уйку - дени сак жашоонун негизги компоненти. Чоңдор күнүнө 7 же андан көп саат бою укташы керек. Айрым адамдар, айрыкча жаштар жана өнөкөт оорулары бар адамдар бир суткада 9 сааттан ашык уйкуга муктаж. Адамдардын саналуу гана бөлүгү суткасына 6 сааттан аз уктайт. Бул генетикалык факторлорго байланыштуу.

Уйкунун жетишсиздиги ашыкча салмак кошууга, жүрөк ооруларына, ал тургай депрессияга алып келиши мүмкүн. Балдарга жана чоң кишилерге канча убакыт уктоо керектигин жана уйкуну кантип жакшыртуу керектигин айтып беребиз.

ЭМНЕ ҮЧҮН КҮНҮНӨ 7 СААТТАН АШЫК УКТОО КЕРЕК?

-Эгерде сиз 7 сааттан аз уктасаңыз, анда өнөкөт ооруларга чалдыгуу коркунучу жогорулайт, атап айтканда: кант диабети, жүрөк-кан тамыр оорулары, инсульт, кан басымы, салмак кошуу жана семирүү, иммундук системанын начарлашы, психикалык ден-соолуктун начарлашы, депрессия. Ошондой эле, нормадан аз уктоо сиздин чечим кабыл алуу жөндөмүңүзгө таасир этет, жолдогу кырсыктардын коркунучун көбөйтөт.

УЙКУНУ КАНТИП ЖАКШЫРТУУГА БОЛОТ

-Күндүзгү, айрыкча уктаар алдындагы жүрүм-турумуңуз уйкунун сапатына таасир этет. Айрым учурларда кичинекей түзөтүүлөр да кырдаалды түп-тамырынан бери өзгөртө алат. Бир нече пайдалуу адаттар жакшы уктоого жардам берет:

- Уктоо тартибин сактаңыз. Ар дайым белгилүү бир убакытта уктап, турууга көнүңүз. Дем алыш күндөрү дагы.

-Тынчтандыруучу чөйрө түзүңүз. Тынч, караңгы, тынчтандыруучу чөйрө жана уктоочу бөлмөдөгү ыңгайлуу салкын температура уйкуга шарт түзөт.

-Электрондук каражаттарды алып салыңыз. Телевизор, компьютер, смартфон сыяктуу электрондук шаймандарды уктоочу бөлмөдөн алып салыңыз же жок дегенде уктаардан 30 мүнөт мурун өчүрүңүз.

- Тамактануу режимин көзөмөлдөңүз. Кофеинден (уктаар алдында 6 саат аралыгында), спирт ичимдиктеринен (уктаар алдында 4 саат аралыгында) жана уктаар алдында көп өлчөмдөгү тамак-аш жегенден алыс болуңуз. Күнү бою пайдалуу тамактарды жеп туруңуз. Жатардан мурун суюктукту көп ичүүдөн алыс болуңуз. Уктаардан мурун суусунду кандырыш керек, бирок көп ичүү уйкуга көйгөй жаратышы мүмкүн.

-Чылым чекпе. Тамеки чекпеңиз жана бул жаман адаттан баш тартыңыз. Жок дегенде, уктаар алдында тамеки чекпеңиз.

- Физикалык активдүүлүктү сактаныз. Күндүзгү физикалык активдүүлүк түнкүсүн оңой уктап калууга жардам берет. Төшөктү жалаң гана уктоо үчүн колдонуңуз. Төшөктө тамак ичпеңиз, телевизор көрбөңүз жана иштебеңиз. Ошондой эле уйкуңуз келбесе, уктабаңыз. 20 мүнөттүн ичинде уктап кала албасаңыз, төшөктөн туруңуз. Күндүз уктаган адатыңыз барбы? Бул убакытты 45 мүнөткө чейин чектеңиз. Уйктоодо маселе жаралса, дарыгерге кайрылыңыз.

Басып чыгаруу