Үстүбүздөгү жылдын ноябрь айынан тарта өспүрүм кыздарды адам папилломавирусуна каршы эмдөө баштоо пландалууда
20.07.2022 / Просмотров: 1592
Бүгүн, 2022-жылдын 20-июлунда, “Сенин келечегиң үчүн вакцина. Жатын моюнчасынын рагын токтотолу” ураанын астында Кыргыз Республикасында адамдын папилломавирусуна (HPV) каршы вакцинаны киргизүү боюнча илимий-практикалык конференция өттү. КР Саламаттыкты сактоо министрлиги жана Дүйнөлүк саламаттыкты сактоо уюмунун Европалык аймактык бюросу тарабынан уюштурулган иш-чарада вакцина менен алдын ала турган инфекцияларга, анын ичинде адам папиллома вирусуна байланышкан маселелердин кеңири чөйрөсү талкууланды.
Иш-чара ошондой эле иммунизациялоо, рак оорусуна каршы күрөшүү, репродуктивдүү жана өспүрүмдөрдүн ден соолугу боюнча улуттук программалардын ортосундагы байланышты күчөтүү үчүн аянтча катары кызмат кылды.
Конференциянын катышуучулары эпидемиология, гинекология, онкология тармагындагы эксперттер, ошондой эле алдыңкы улуттук илимий борборлордун, илимий чөйрөлөрдүн, медициналык университеттердин өкүлдөрү, саламаттыкты сактоо уюмдарынын жетекчилери, Улуттук онкологдор ассоциациясынын, Улуттук акушерлердин ассоциациясынын мүчөлөрү жана гинекологдор болду.
Өз сөзүндө саламаттыкты сактоо министринин милдетин аткаруучу Жаркынбек Касымбеков Кыргыз Республикасынын Өкмөтүнүн токтому менен бекитилген 2020-2024-жылдарга иммунопрофилактика программасын ишке ашыруу максатында Саламаттыкты сактоо министрлиги тарабынан артыкчылыктуу багыттарды ишке ашыруу боюнча иш-чаралар жүргүзүлүп жатканын белгиледи. Кыргыз Республикасынын профилактикалык эмдөөлөрүнүн календарына ылайык жаңы вакциналарды киргизүү маанилүү стратегиялык багыт болуп саналат. "Пландуу эмдөө - бул дүйнө жүзү боюнча коомдук саламаттыкты сактоонун үнөмдүү стратегиясы, ал ден-соолукту чыңдоо боюнча башка чараларга салыштырмалуу балдардын оорусун, өлүмүн жана майыптыгын кескин кыскарта алат",- деди ал.
Жатын моюнчасынын рагы аялдардын ден соолугуна коркунуч туудурган эң чоң коркунучтардын бири болуп саналат жана дүйнө жүзү боюнча аялдардын арасында кеңири таралган рак ооруларынын төртүнчүсү жана коомдук саламаттыкты сактоонун негизги көйгөйү болуп саналат. Маселен, 2020-жылы бул оорунун 604 миңге жакын жаңы учуру катталса, ошол эле жылы жатын моюнчасынын рагынан 342 миң аял каза болгон.
Бүткүл дүйнөлүк саламаттыкты сактоо уюмунун эсеби боюнча, Кыргызстанда жыл сайын 500гө жакын аял жатын моюнчасынын рагы (ЖМР) менен ооруйт. ЖМР өлкөдөгү аялдардын рак оорусунун 2 негизги себеби болуп саналат жана 15 жаштан 44 жашка чейинки аялдарда рактын эң кеңири таралган түрү болуп саналат. ЖМР жыл сайын 300дөн ашык өлүмгө себеп болот жана аялдардын рак оорусунан өлүмүнүн негизги себеби болуп саналат. Кыргызстанда 2020-жылы жатын моюнчасынын рагы менен ооругандардын деңгээли 100 миң аялга 15 учурду түздү, бул Борбордук Азия өлкөлөрүнүн жана ДССУнун Европа регионундагы эң жогорку көрсөткүчтөрдүн бири.
Кыргыз Республикасынын Иммунизациялоо боюнча Илимий-техникалык Эксперттик тобу Кыргызстанда жатын моюнчасынын рак оорусунун жогорку көрсөткүчүн, жогорку онкогендик ВПЧ түрлөрүнүн алдын алуу үчүн жогорку эффективдүү жана коопсуз вакциналардын жана өспүрүм кыздарды өмүр бою бул оор оорудан коргоо мүмкүнчүлүгүн, ошондой эле эмдөөнүн жогорку камтуусун камсыз кыла турган мектептердеги эмдөө системасын эске алуу менен 11 жаштагы өспүрүм кыздарды профилактикалык эмдөө календарына ВПЧ вакцинасын киргизүү боюнча далилдүү сунуштарды берди.
Үстүбүздөгү жылдын ноябрында Кыргыз Республикасынын Саламаттык сактоо министрлигинин 2022-жылдын 4-мартындагы № 276 буйругу менен бекитилген Кыргыз Республикасынын профилактикалык эмдөө календарына ылайык, адам папилломавирусуна каршы эмдөө башталат, жана вакцинанын биринчи дозасы 11 жаштагы кыздарга берилет. Негизги максаттуу топтон тышкары, Иммунизациялоо боюнча Илимий-техникалык Эксперттик тобу вакцинаны киргизүүнүн биринчи жылында 12-14 жаштагы кыздарга эмдөөнү сунуштады. Өспүрүм кыздарды пландуу эмдөө келечекте жыл сайын жатын моюнчасынын рагына кабылган 600дөн ашуун учурдун жана 300гө жакын өлүмдүн алдын алат.
«Кыргызстандагы бардык балдар КР профилактикалык эмдөө календарына ылайык эмдөөдөн өтсө, 13 оор оорудан сактанууга болот. Эмдөө акысыз жана өлкөнүн бардык аймактарында жеткиликтүү. Адамдын папилломавирусуна каршы эмдөөдө оорунун алдын алуу эле эмес, өспүрүм кыздарды жатын моюнчасынын рак оорусунан коргоо жана алардын сергек жана жемиштүү жашоо мүмкүнчүлүгүн кеңейтүү жөнүндө сөз болуп жатат», - дейт Кыргыз Республикасынын Саламаттык сактоо министрлигинин Республикалык иммунопрофилактика борборунун директору Г.С.Ишенапысова.
«2006-жылдан бери, биринчи ВПЧ вакцинасы чыккандан бери, дүйнө жүзү боюнча 100 миллиондон ашык адам эмделди, алар үчүн вакцинанын 270 миллиондон ашык дозасы колдонулган. ВПЧ вакцинасын мурда киргизген көптөгөн өлкөлөрдө ВПЧ инфекцияларынын жана ооруларынын саны тез жана олуттуу (90%га чейин) азайып, эмдөөнүн оң таасирин көрсөтө алышкан. ВПЧ вакцинасы менен эмдөө жаш муундун ден соолугуна, аялдардын репродуктивдүү ден соолугуна жана бүтүндөй Кыргызстанга чоң салым кошот деп ишенем», - деди Бекенова Жанара, ДССУнун Кыргызстандагы өкүлчүлүгүнүн жетекчисинин милдетин аткаруучу.
Кошумча маалымат:
Кыргыз Республикасынын Саламаттык сактоо министрлиги 11-14 жаштагы 300 миңге жакын кызды адам папилломавирусуна (ВПЧ) каршы бекер эмдөөдөн өткөрүүнү пландаштырууда, бул аларды өмүр бою жатын моюнчасынын рагына каршы коргойт жана жатын моюнчасынын рагына чалдыгуу жана ага байланыштуу өлүмдөрдүн алдын алат. Бул демилге ресурстарды мобилизациялоону жана медициналык адистердин гана эмес, мугалимдердин жана, албетте, ата-энелердин да катышуусун талап кылат.
ВПЧ вакцинасын сатып алуу жана киргизүүдө каржылык колдоо Вакциналар жана иммунизация боюнча глобалдык альянс тарабынан көрсөтүлөт. Иммунизациялоо графиги боюнча кыздар үчүн ВПЧ вакцинасын сатып алуу ГАВИ/ПКР биргелешип каржылоо механизминин алкагында жүргүзүлөт. ВПЧ вакцинасын киргизүүнү биринчи жылында 12-14 жаштагы кыздар үчүн вакцинаны сатып алуу ГАВИнин гуманитардык жардамы болуп саналат.
2022-жылдын март айына карата дүйнө жүзү боюнча 112 өлкө ВПЧ вакциналарын улуттук эмдөө программаларына кошкон, анын ичинде Европа, АКШ, Улуу Британия, Канада, Австралия жана Латын Америкасынын көпчүлүк өлкөлөрү. Жатын моюнчасынын рак алдындагы жараларын азайтууда эмдөөнүн жогорку эффективдүүлүгү бул вакцина көп жылдардан бери колдонулуп келе жаткан өлкөлөрдө (АКШ, Австралия, Канада, Ирландия, Швеция, Финляндия, Жаңы Зеландия, Шотландия) көрсөтүлгөн.
Прикрепленные файлы:
Другие Новости
22.04.2024
"Сапатты көзөмөлдөөнүн максаты жазалоо эмес, келечекте оор жагдайларды аныктоо жана алдын алууга багытталган"
2024-жылдын 12-13-апрелинде Ош облустар аралык бириккен клиникалык ооруканасынын жана Жалал-Абад бириккен клиникалык ооруканасынын төрөт үйлөрүнүн Сапат комиссияларынын мүчөлөрүн камтыган медицина кызматкерлери натыйжалуу жана сапаттуу жардам көрсөтүү үчүн зарыл болгон эл аралык жана улуттук сапат принциптери, стандарттары жана инструменттери боюнча билимин жана көндүмдөрүн кеңейтип чыңдашты.
Жалал-Абад облустук клиникалык ооруканасынын неонаталдык реанимация бөлүмүнүн башчысы Рахат Изабекова башка семинардын катышуучуларына жеткиликтүүлүк, эффективдүүлүк жана ыкчамдуулук сыяктуу факторлор сапатка жетүүгө жардам берээри менен бөлүштү: «Биздин ооруканада балдардын жана энелердин өлүмүнүн алдын алуу, ошондой эле инфекцияларга каршы күрөшүүдө Сапат комитети маанилүү ролду ойнойт. Биздин максат – эне менен баланын ден соолугу чың болуп үйгө чыгарылышын жана ар бир бейтаптын жалпы канааттануусун камсыз кылуу. Семинарда алынган жаңы маалыматтын негизинде ар бир кадамды кылдат пландаштырып, эң негизгиси реалдуу план түзүшүбүз керек экенин түшүндүм. Ар бир кырдаалда шылтоолорду айта берсек, маселенин маңызын толук түшүнө албай, керектүү деталдары так жазылбай калат. Биздин максат жазалоо эмес, келечекте оор кырдаалды аныктоо жана алдын алуу».
Төрөткө чейинки кызматтардын жана квалификациялуу төрөттүн кенен камтылышына карабастан, энелердин өлүмүнүн көрсөткүчү кооптуу бойдон калууда жана ал 2022-жылы 100 000 тирүү төрөлүүгө карата 28,1 учурду түзүп келди. Бул көйгөйгө чара катары Кыргыз Республикасынын Саламаттык сактоо министрлиги коопсуздук стандарттарына жана калктын керектөөлөрүнө ылайык медициналык кызматтарды көрсөтүүнүн маанилүүлүгүн тааныган Улуттук сапат стратегиясын бекитти.
«Кызмат көрсөтүүнүн сапатын жогорулатуу биздин саламаттыкты сактоо системабыз үчүн маанилүү. Перинаталдык жардамды төрөт учурундагы жана төрөттөн кийинки мезгилге көбүрөөк маани беришибиз керек, анткени бул адам өмүрүн сактап калуу жана өлүү төрөттүн алдын алуу үчүн абдан маанилүү. Бул интервенциялардын камтылышын жогорулатуу гана эмес, кеп ар бир аял жана жаңы төрөлгөн баланын квалификациялуу, далилдүү жана урматка негизделген кам көрүшү тууралуу болуп атат. Энелерге жана жаңы төрөлгөн ымыркайларга медициналык кызмат көрсөтүүнүн сапаты жаатында медицина кызматкерлеринин потенциалын жогорулатуу боюнча бул семинар аталган максатка жетүүдөгү алгылыктуу кадам болуп саналат”, - деп Кыргыз Республикасынын Саламаттык сактоо министринин орун басары Айжамал Шамбетова белгилей кетти.
Эки күндүк семинардын катышуучулары сапат боюнча жалпы түшүнүктөрүн кеңейтип, Сапат комитети менен төрөт үйлөрүнүн/бөлүмдөрүнүн ортосундагы интеграцияны бекемдөө үчүн ар кандай сапат куралдарын колдонуп, үзгүлтүксүз сапатты жакшыртууну уюштуруу боюнча клиникалык билимин талкуулашты.
Ош облустар аралык бириккен клиникалык ооруканасынын медициналык кызматтын сапатын башкаруу бөлүмүнүн башчысы Дамира Турсунбекова баса белгилегендей: «Изилденген темалар бизге бейтаптардын канааттануусун жана көрсөтүлүүчү медициналык кызматтын сапатын жогорулатуу боюнча иштерди пландаштырууга жана натыйжалуу уюштурууга жардам берет. Эмпатия жана бейтаптын керектөөсүнө көңүл буруу абдан маанилүү жана коопсуздук деген түшүнүк ооруканага киргенде эле башталат: ага пандустардын орнотулушу жана тепкичтердеги белгилердин илиниши кирет. Өзүмдүн тажрыйбама таянып, сапат стандарттарын өзгөртүүгө бир эле адам болсо дагы олуттуу таасир эте алаарын көрдүм. Өзүбузгө жогорку талаптарды коюп, жетекчинин дагы эрки, көз карашы жана так багытты белгилеши маанилүү”.
БУУнун Калк фондунун жана Индиялык өнөктөштүк фондунун “Төрөт үйлөрүндө акушердик байкоо жана телеконсультация үчүн жооп берүү системасын колдонуу аркылуу сапаттуу медициналык кызматтарга жетүүдө алдын ала турган энелердин ооруларын азайтуу” долбоорунун алкагында медициналык кызматкерлердин потенциалын жогорулатуу боюнча иш-чаралар Кыргыз Республикасында сапаттуу медициналык тейлөөнү жакшыртуу, ар бир кош бойлуу аялдын жана жаңы төрөлгөн ымыркайдын өз убагында сапаттуу жардам алуусун камсыз кылууда маанилүү кадам болуп эсептелет.
Ош облустар аралык бириккен клиникалык ооруканасынын төрөт үйүнүн кош бойлуу аялдардын патологиясы бөлүмүнүн башчысы Тамара Азимбаева медициналык тейлөөнүн сапатын сактоо боюнча ой бөлүштү: “Бир чоң көйгөйдү чоо-жайына чейин бөлүп кароо менен сапаттуу жана рационалдуу чечимдеп кабыл алынат. Бул семинарда биз “даярдоо”, “контролду күчөтүү” сыяктуу жалпы терминдерди колдонууга караганда конкреттүү деталдарды берүү натыйжалуураак экенин билдик. Иштин жана көрсөтүлүүчү медициналык кызматтын сапатын жакшыртуу үчүн мен өзүмдүн бөлүмүмдө ушул ыкманы колдоном».
Талкуунун жүрүшүндө семинардын катышуучулары бүгүнкү күндө эмгек акынын аздыгы жана кадрлардын жана ресурстардын жетишсиздиги, тилекке каршы, дарыгерлерге бир топ жүктү алып келип, медициналык тейлөөнүн сапатына терс таасирин тийгизип жатканы тууралуу ой – пикир бөлүшүштү.
«Келечектеги ишибизде биз семинарда айтылган методологияны колдонуп, ар кандай көйгөйлөрдүн түпкү себебин аныктоого жана түшүндүрүүгө ниеттенип жатабыз. Оорукананын сапаты боюнча подкомитеттер биздин ишмердүүлүктү карап чыгып, эч кимди күнөөлөп же жазалабастан, жакшырта турган жерлерибизди аныктай алат. Бул максатта биз дарыгерлердин арасында өз ара көзөмөл жүргүзүү ыкмасын мындан ары да колдонобуз», - деди Асанова Асылкан, Ош облустар аралык бириккен клиникалык ооруканасынын төрөт үйүнүн башчысы.
Медициналык кызматкерлер, анын ичинде Ош облустар аралык бириккен клиникалык ооруканасынын жана Жалал-Абад бириккен клиникалык ооруканасынын төрөт үйлөрүнүн Сапат боюнча комитеттин мүчөлөрүнүн арасында өткөрүлгөн семинар Кыргыз Республикасынын Саламаттык сактоо министрлиги жана Бириккен Улуттар Уюмунун Калк фонду тарабынан колдоого алынып ишке ашырылуучу акушердик көзөмөл жана телемедициналык кызматтар сыяктуу инновациялык чаралар аркылуу алдын ала турган энелердин жана ымыркайлардын өлүмүнүн жана оорууларынын алдын алуусуна багытталган БУУнун Түштүк-Түштүк кызматташтыгы долбоорунун алкагында уюштурулган.
22.04.2024
Европалык иммунизация жумалыгы муундар үчүн эмдөөнүн маанилүү экендигин баса белгилейт
Бүгүн 2024-жылдын 22-апрелинен 28-апрелине чейин белгиленген Европалык иммунизация жумалыгы башталды. Бул жылы жумалык ДССУнун Иммунизация боюнча кеңейтилген программасынын 50 жылдыгын жана Кыргызстандын улуттук эмдөө программасынын 30 жылдыгын белгилөөгө арналган. Евробиримдиктин, ДССУнун жана ЮНИСЕФтин колдоосу менен Саламаттыкты сактоо министрлиги жетектеген кампания эмдөө көптөгөн муундарды вакцина менен алдын ала турган оорулардан кантип коргогондугун көрсөтөт.
Негизги максат – жугуштуу оорулардын алдын алуу чарасы катары эмдөөнүн маанилүүлүгү жөнүндө калкка маалымат жеткирүү. Бул жумалыкта узак жана ден-соолукта өмүр сүрүүгө салым кошкон вакциналарга кеңири жол ачууга чакырыктар айтылат.
1974-жылы Дүйнөлүк саламаттыкты сактоо уюму тарабынан демилгеленген Иммунизация боюнча кеңейтилген программа ар бир баланын өмүрүн сактап калуучу вакциналарга тең укуктуу жеткиликтүүлүгүн камсыз кылууга багытталган. Акыркы 50 жыылда вакциналар дүйнө жүзү боюнча миллиондогон адамдардын өмүрүн сактап, жугуштуу оорулардын жүгүн азайтып, дени сак келечекке жол ачты.
Кыргызстан калкты эмдөөдө орчундуу ийгиликтерге жетишти. ДССУнун Европа аймагынын башка өлкөлөрү менен биргеликте 2002-жылы Кыргызстан полиомиелиттен эркин өлкө катары тастыктама алган. Акыркы жылдарда ВИГА, ДССУ жана ЮНИСЕФтин колдоосу астында Кыргызстандын улуттук эмдөөлөр календарына бир нече жаңы вакциналар: 2016-ж., пневмококк конъюгацияланган вакцина, 2018-ж., полиомиелитке каршы инактивацияланган вакцина, 2019-ж., ротавирус вакцинасы жана 2022-ж., адамдын папиллома вирусуна (АПВ) каршы вакцина киргизилди.
Бул жетишкендиктерге карабастан эмдөөлөрдөн баш тартуулар “Бир кумалак бир карын майды чиритет” деген макал сындуу кала берүүдө жана бул ДСУнун Европа аймагында кайрадан кызамыктын пайда болуусунун себептеринин бири болду. Бүгүнкү күндө Кыргызстанда кызамыктын 8029 учуру 2024-жылдан бери катталды. Эмдөө вакциналардын жардамы менен бөгөт коюлучу кызамыктын жана башка оорулардын жайылуусун алдын алуунун кыйла натыйжалуу каражаты болуп кала бере тургандыгын эстен чыгарбоо зарыл. Вакцинанын бирдей жеткиликтүү болуусун камсыздоо жана коомчулуктун иммунизация программаларына карата ишенимин бекемдөө аркылуу биз учурдагы жана келечектеги муундардын ден соолугун сактап кала алабыз.
«Кыргызстан 20 жылдан бери Бүткүл дүйнөлүк саламаттык сактоо уюмунун Европалык иммунизация жумалыгын өткөрүүдөгү демилгесин колдойт, 2024-жылы ал “Муундарды коргоо” урааны астында өтүп жатат. Кыргыз Республикасында жүргүзүлүп жаткан калкты пландуу иммунизациялоонун жардамы менен кептөөр, селейме, жаңы төрөлгөн балдардагы кургак учук менингити, “В” вирустук гепатити 5 жашка чейинки балдар арасында катталган жок. 1993-жылдан тарта өлкө полиомиелиттен эркин өлкө статусуна ээ. “Кыргыз Республикасынын Өкмөтү жана КР Саламаттык сактоо министрлиги Иммунизациялоо программасын коомдук саламаттык сактоонун артыкчылыктуу программаларынын бири катары аныктайт жана калкка иммунизациянын сапаттуу кызматтарынын адилеттүү жана туруктуу жеткиликтүүлүгүн камсыздоо боюнча бардык күч-аракетин жумшап жатат”,-деп белгиледи Кыргыз Республикасынын саламаттык сактоо министрлигинин Коомдук саламаттык сактоо башкармалыгынын башчысынын м.а. Анара Мамбетисаева.
“Европалык иммунизация жумалыгы – бул коммуникациялык иш-чараларды, ошондой эле жогорку тобокелчилик тобундагы калкка иммунизация жүргүзүү аркылуу иммунизациялоого көңүл бурдуруу үчүн колдонулуучу регионалдык демилге. Саламаттык сактоо министрлиги жана биздин өнөктөштөрдүн биргелешкен аракеттеринин, анын ичинде улуттук иммунизация программасынын талыкпаган ишинин жардамы менен биз калктын ден соолугун чыңдоодо чоң прогресске жетиштик. Бирок Кыргызстандагы жана дүйнө жүзүнүн башка көптөгөн өлкөлөрүндөгү кызамыктын чыгышы, адамдарды эмдөө маселеси туруктуу көңүл бурууну талап кыла тургандыгын көрсөтүүдө. Биз Кыргызстандын кызамыктын чыгуусуна бөгөт коюуга багытталган күч-аракетин жогору баалайбыз жана ден соолук сакчысы болуп кала беребиз”, -деп белгиледи Кыргыз Республикасындагы ДССУнун өкүлү, д-р Ливиу Ведраско.
«Эмдөө - Кыргызстандагы балдардын ден соолугун чыңдоо үчүн гана эмес, аман калышы үчүн да эң зарыл чара. Азыркы учурда бул эң эффективдүү коомдук саламаттыкты сактоо чарасы. ЮНИСЕФ ар бир бала эмделип, анын ден соолугун коргоо үчүн Өкмөт жана башка өнөктөштөр менен иштөөнү улантууда», - деп белгиледи ЮНИСЕФтин Кыргызстандагы өкүлүнүн орун басарынын милдетин аткаруучу Сильви Хилл.
***
Маалымдама: жыл сайын БДСУнун Европа аймагында оорулардын алдын алуу жана өмүрлөрдү коргоо үчүн аябагандай чоң мааниге ээ болгон иммунизацияны жайылтууга багытталган Европалык иммунизация жумалыгы (ЕИЖ) өтөт. Алгачкы жолу ЕИЖ 2005-ж., өткөн жана ага Аймактагы болгону бир нече өлкө катышкан. Демилгенин максаты ар бир бала вакциналардын жардамы менен алдын алууга боло турган оорулардан коргоого муктаж жана мындай коргоого укуктуу экендиги тууралуу маалыматты жайылтуу жолу менен эмдөөгө камтууну көбөйтүүдө турган. ЕИЖ ошол замат Аймактагы коомдук саламаттык сактоо тармагындагы эң эле көрүнүктүү жана белгилүү кампаниялардын бири болуп калды жана Кыргызстанда ДССУ долбоору – Борбор Азия боюнча COVID-19га жооп кайтаруу боюнча Европа биримдигинин (CACCR) колдоосу астында жүзөгө ашырылып жатат.
22.04.2024
Мини-футбол боюнча мелдеште Саламаттык сактоо министрлигинин футболдук командасы 1-орунду ээледи
Саламаттык сактоо министрлигинин футбол командасы Кара-Кыргыз автономиялык облусунун түзүлгөндүгүнүн 100 жылдыгына арналган кичи футбол боюнча мелдеште 1-орунду ээлеп, жеңишин майрамдоодо. 2024-жылдын 20-21-апрелинде өткөн бул турнир президенттин “Кыргызстанда 2024-2034-жылдарга футболду мындан ары өнүктүрүү боюнча чаралар жөнүндө” Жарлыгын ишке ашыруунун алкагында уюштурулуп, анын максаты - футболду өнүктүрүү ден соолукту сактоонун жана чыңдоонун багыты катары кызматкерлердин физикалык даярдыгын жогорулатуу жана спортту пропагандалоо.
Турнирге министрликтердин, ведомстволордун, Бишкек шаарынын мамлекеттик жана муниципалдык мекемелеринин командалары катышты, бул спорттук иш-чараларга болгон кызыгууну жана алардын калк арасында физикалык активдүүлүктү жогорулатуудагы ролун чагылдырат.