Copyright: ©
Жаңы жылдык эс алуу күндөрү республика боюнча медицина кызматкерлери кадимки режимде иштеп, 1 жана 7-январь дем алыш күндөрү нөөмөттө турушат
03.01.2025 / Просмотров: 9290
Антсе да, Республикалык клиникалык жугуштуу оорулар ооруканасына кайрылуулардын агымы абдан көп, анын дээрлик 70%ы амбулатордук дарылануучулар. Буга байланыштуу жарандарды катталган жери боюнча үй-бүлөлүк медицина борборлоруна (ҮМБ) кайрылып, үй-бүлөлүк дарыгерлердин кеңешин алуусун суранабыз. Ооруканага жаткыруу талап кылынса, үй-бүлөлүк дарыгерлер ооруканага жолдомо беришет. Бул ооруканалардагы узун кезек күтүүнү жок кылып жана медициналык жардам көрсөтүү процессин тездетүүгө жардам берет.
2025-жылдын 2-январында РКЖООРнун кабыл алуу бөлүмүнө 281 адам кайрылган, алардын 93ү гана ооруканага жаткырылган, анын 87си балдар. 188 бейтап амбулатордук дарылоого жөнөтүлгөн. Кыштын келиши менен курч респиратордук вирустук инфекциялар (КРВИ) көбөйүп, кызамык жана көк жөтөл менен ооругандар да бар. Күнү-түнү оорулуулардын агымы азайбайт.
500 орунга ылайыкташкан ооруканада 596 (багуучулары менен 1000ден ашык) адам бар. Ооруканага жаткырылгандардын арасында КРВИ менен 186, кызамык менен 216, вирустук гепатит менен 65 жана башка нозологиялар бар. КРВИ менен ооругандарды ооруканага жаткыруу үчүн 6 бөлүм, кызамык менен ооругандар үчүн 6 бөлүм, вирустук гепатит менен ооругандар үчүн 2 бөлүмдүн профили өзгөртүлдү. Реанимация бөлүмүндө 11 бейтап, кызамык менен ооруган 5 бала, өпкөнү жасалма желдетүү аппаратында эки бейтап жатат.
РКЖООнун медициналык кызматкерлери чоң жүктөм менен иштешет, бирок оорукана эч кимге жардам берүүдөн баш тартпайт. Күн сайын кабыл алуу бөлүмүндө 13 дарыгер иштейт. Белгилей кетүүчү нерсе, ар бир жугуштуу оору ар кандай мамилени талап кылат, ал эми кээ бир учурларда текшерүү жана кенеш берүү узагыраак убакытка созулушу мүмкүн. Биз жарандарды кезек күтүүгө түшүнүү менен мамиле кылууга чакырабыз.
Жарандар үчүн сунуштар:
1. Кеңеш алуу үчүн катталган жериңиздеги Үй-бүлөлүк медицина борборлоруна (ҮМБ) кайрылыңыз. Үй-бүлөлүк дарыгерлер зарыл болгон учурда, эгер бул чындап эле зарыл болсо, сизди ооруканага жөнөтүшөт.
2. Медицина кызматкерлеринин эмгегин урматтоого жана түшүнүүгө чакырабыз. Биз жарандарды чыр-чатактарды жаратпоого чакырабыз, анткени аны териштирүүгө кеткен ар бир көз ирмем башка бейтап үчүн өтө маанилүү болуп калышы мүмкүн.
3. Алдын алуу чараларын көрүңүз: эмдөө, гигиена, беткап кийүү жана оорулуулар менен байланышты чектөө инфекциялардын жайылышын алдын алуу үчүн маанилүү чаралар болуп саналат.
Прикрепленные файлы:
Другие Новости
20.01.2025
Сасык тумоо жана курч респиратордук вирустук инфекциялар боюнча эпидемиологиялык кырдаал
Саламаттык сактоо министрлигинин Оорулардын алдын алуу жана мамлекеттик санитардык-эпидемиологиялык көзөмөл департаментинин оперативдүү маалыматы боюнча, 2024-жылдын 3-жумасында (13.01.25 - 19.01.25) курч респиратордук вирустук инфекциялардын 11 761 учуру жана сасык тумоонун 41 учуру катталып (и.к. 166,2), өткөн жумага салыштырмалуу (02-жума, и.к. 105,0) +1,6 эсеге жогору. Ооругандардын 4,8%ы (563 бейтап) ооруканага жаткырылган.
Лабораториялык изилдөөлөрдүн жыйынтыгы боюнча октябрь айынан бери курч респиратордук вирустук инфекциялардын таралышы байкалууда, алардын ичинен эң көп таралган респиратордук синцитиалдык вирус – 30,3%, риновирус – 25,8%, аденовирус – 13,2%, I-IV парагрипп – 11,4%, башка вирустук инфекциялар 19,3%ды түздү.
2024-жылдын декабрынын ортосунан баштап A/(H1N1(2009)) тумоосунан жана В тумоосунун айрым учурлары - 10,7% жана COVID-19 - 8,9% шарттаган сасык тумоо мезгили болду.
Эпидемияга каршы иш-чараларды өз убагында уюштуруу жана оорунун алдын алуу максатында кышкы каникулдан кийин балдардын мектепке баруусуна мониторинг жүргүзүлүүдө.
Республикада сасык тумоо, курч респиратордук вирустук инфекциялар жана COVID-19 инфекциясы боюнча эпидемиологиялык кырдаалга мониторинг жана баалоо улантылууда жана көзөмөлдө.
17.01.2025
КР Саламаттык сактоо министри Республикалык калыбына келтирүү борборуна барды
2025-жылдын 17-январында Кыргыз Республикасынын Саламаттык сактоо министри Алымкадыр Бейшеналиев Аламүдүн районунун Дачное айылында жайгашкан Республикалык калыбына келтирүү борборуна барды. Иш сапардын жүрүшүндө министр борбордун иштөө шарттары менен таанышып, анын кызматкерлери менен негизги маселелерди талкуулады жана калыбына келтирүүчү жана адистештирилген медициналык жардам көрсөтүү системасын мындан ары өнүктүрүүнүн маанилүүлүгүн белгиледи.
Борбор профилактикалык, кеңеш берүү, дарылоочу, диагностикалык жана калыбына келтирүү сыяктуу кызматтардын түрүн көрсөтөт. Борбордунишмердүүлүгүнүн негизги багыттары бейтаптардын ден соолугун калыбына келтирүүгө көмөктөшүүчү дарылоо гимнастикасы жана дене тарбия секцияларын уюштурууну камтыйт.
Министр Кыргызстанда жыл сайын 1500гө жакын адам инсультка кабылып, калыбына келтирүүчү жардамга муктаж болоорун белгиледи. Мындан тышкары, жол кырсыгынан жабыркагандар жана дарылоонун паллиативдик стадиясындагы бейтаптар да жардамга муктаж. Мындай борборду түзүү республиканын бардык аймактарынан келген тургундар үчүн медициналык жардамдын жеткиликтүүлүгүн жана сапатын бир топ жакшыртат.
17.01.2025
Саламаттык сактоо министрлиги Бишкек шаарынын мэриясы менен биргеликте кызамык оорусу боюнча көчмө ыкчам штабдын жыйынын өткөрүүдө
2025-жылдын 16-январында КР саламаттык сактоо министринин орун басары Бубужан Арыкбаеванын жана Бишкектин вице-мэри Виктория Мозгачеванын төрагалыгы алдында КР Саламаттыкты сактоо министрлигинин көчмө ыкчам штабынын жыйыны уюштурулду. Бул жыйын Кыргыз Республикасынын Министрлер Кабинетинин протоколдук тапшырмаларын жана Саламаттык сактоо министрлигинин кызамык менен күрөшүү боюнча штабынын чечимдерин аткаруунун жана кызамык боюнча алдын алуу жана эпидемияга каршы иш-чараларга көмөк көрсөтүүнүн алкагында уюштурулду.
Талкууга коомдук саламаттыкты сактоонун жана Бишкек шаарынын мэриясынын өкүлдөрү, Бишкек шаарынын саламаттык сактоо уюмдарынын жетекчилери, билим берүү мекемелеринин, аймактык администрациялардын өкүлдөрү катышты. Жыйында учурдагы эпидемиологиялык кырдаал, кызамыктын, кызылчанын, курч респиратордук вирустук инфекциялардын жана сасык тумоонун чыгышына жооп катары жүргүзүлгөн эмдөө боюнча өнөктүктөргө мониторинг талкууланды.
Белгилей кетсек, өткөн жылы республикада кошумча жана тазалоочу эмдөөнүн үч баскычы өткөрүлгөн. Республика боюнча 918 000 бала жана 29 258 саламаттык сактоо системасынын кызматкери, орто жана жогорку окуу жайларынын окутуучулары жана студенттери эмдөөдөн өткөн.
2024-жылдын жыйынтыгы боюнча республиканын аймагында кызамык оорусунун 14 380 учуру, анын ичинен 5 681 учуру Бишкек шаарында катталган. 2025-жылдын башынан бери 229 жаңы учур, анын ичинде Бишкек шаарында 144 учур катталды. Оорунун күч алышынын негизги себеби – эмдөөдөн өткөндөрдүн көрсөткүчү талаптагыдан төмөндүгү, Бишкекте адамдардын 95% вакцина алышы керек болсо, учурда бул көрсөткүч 69 %ды түзөт.
Кызамык оорусунун андан ары жайылышын алдын алуу үчүн Саламаттык сактоо министрлиги 9 айдан 7 жашка чейинки курактагы балдар арасында тазалоочу эмдөө боюнча өнөктүктү улантууда, бирок эмдөөдөн баш тарткандардын айынан бул иш кыйынчылыктар менен коштолууда. Ушул себептен улам олуттуу эпидемиологиялык тобокелдиктер бар, себеби вирус эмделбеген балдардын арасында жайылып жатат.
Ыкчам штабдын жыйынынын жыйынтыгы боюнча төмөнкүдөй чечимдер кабыл алынды: кызамыкка каршы күрөшүү боюнча профилактикалык жана эпидемияга каршы иш-чараларды күчөтүү, профилактикалык эмдөөлөрдү 95%дан кем эмес деңгээлге жеткирүү; калк арасында түшүндүрүү иштерин күчөтүү, эмдөөнүн коопсуздугун жана маанилүүлүгүн түшүндүрүүгө багытталган маалыматтык-агартуу өнөктүктөрүн уюштуру.