Copyright: ©
Кыргыз Республикасынын Саламаттык сактоо министрлиги медициналык кызматкерлердин эмгек акысын эсептөө тартибин түшүндүрөт
17.04.2025 / Просмотров: 4887
Кыргыз Республикасынын саламаттык сактоо министри Эркин Чечейбаев биринчи медициналык-санитардык жардам (БМСЖ) көрсөтүүчү мекемелердеги ашыкча отчеттуулук жүгүн азайтуу чараларын баштады.
Кыргыз Республикасынын саламаттык сактоо уюмдарынын кызматкерлеринин эмгек акы шарттары 2022-жылдын 30-мартындагы №182 токтомуна ылайык жөнгө салынат.
Кепилденген эмгек акы – бул толук иш күнүнө аткарылган иштин татаалдыгын, жоопкерчилигин жана эмгек сиңирүүсүн эске алуу менен белгиленген эң аз өлчөмдөгү акы болуп саналат:
кызматтык маяна;
мамлекет тарабынан кепилденген кошумча төлөмдөр жана үстөк акылар (эмгек стажы, квалификациялык категория, зыяндуулук, бийик тоолуу аймак ж.б.).
Кепилденген эмгек акысынан тышкары, саламаттык сактоо уюмдарынын кызматкерлери эмгекке катышуу коэффициентинин (КТК) негизинде кошумча эмгек акы ала алышат.
КТК милдеттүү төлөм болбойт. Эгерде уюмда бош кызмат орундарына байланыштуу эмгек акы фондунан үнөмдөлгөн каражат болсо, анда бул каражат комиссиянын чечими менен кызматкерлерге КТК түрүндө бөлүштүрүлүшү мүмкүн. Бул кошумча төлөм кызматкерлерди стимулдаштыруу үчүн каралган, айрыкча бош орундардан улам жүктөмү жана жоопкерчилиги көбөйгөн кызматкерлер үчүн. КТК ай сайын эмгек акы фондундагы үнөмгө жараша көбөйүшү же азайышы мүмкүн.
Саламаттык сактоо министрлиги эмгек акы төлөө тартибин оптималдаштыруу багытында иш алып барууда жана келечекте КТК түрүндө кошумча төлөм берүү тартиби кайра каралат.
Акыркы жылдары Кыргыз Республикасынын Министрлер Кабинети эмгек акыны жогорулатуу жана саламаттык сактоо системасынын инфраструктурасын жакшыртуу боюнча бир топ иштерди жүргүзгөн:
1. 2021-жылдын 1-апрелинен тартып саламаттык сактоо уюмдарынын кызматкерлеринин кызматтык маяналары 50% га жогорулатылган (дарыгерлердин маянасы 5000 сомдон 7500 сомго чейин жогорулаган), ал эми үй-бүлөлүк жана жалпы практикадагы дарыгерлердин маянасы 100% га жогорулатылган (5000 сомдон 10000 сомго чейин). Мыйзам боюнча каралган бардык кошумча төлөмдөр жана үстөк акылар сакталып калган.
2. 2022-жылдын 1-апрелинен тартып кызматтык маяналар орточо 50% га жогорулаган (дарыгерлердин маянасы 7500 сомдон 11264 сомго, үй-бүлөлүк дарыгердин маянасы 10000 сомдон 15136 сомго көтөрүлгөн). Ошол эле учурда бардык кошумча төлөмдөр жана үстөк акылар сакталган.
3. Кыргыз Республикасынын Президентинин 2024-жылдын 28-июнундагы №170 Жарлыгына ылайык, 2024-жылдын 1-сентябрынан тартып медициналык кызматкерлердин эмгек акылары төмөнкүдөй көбөйтүлгөн:
дарыгерлер үчүн 50% (11264 сомдон 16896 сомго);
орто медициналык кызматкерлер үчүн 20% (медайымдардын маянасы 9856 сомдон 11968 сомго);
кенже кызматкерлер үчүн (санитарлар, тазалоочулар жана тез жардам айдоочулары) 10% (8096 сомдон 9152 сомго).
Бардык кошумча төлөмдөр жана үстөк акылар сакталып калган. 2024-жылдын жыйынтыгы боюнча, республика боюнча дарыгерлердин орточо эмгек акысы 34100 сомду түзгөн.
1-шаардык клиникалык ооруканадагы реанимация бөлүмүнүн санитаркасы Даутова Н.У. тарабынан түшкөн арыз боюнча:
2025-жылдын март айындагы эмгек акы эсептөөлөрү төмөнкүдөй болду:
базалык маяна: 9152 сом,
жуугуч жана дезинфекциялоочу каражаттар менен иштегени үчүн 25% үстөк: 2288 сом,
кан менен иштегени үчүн 15% үстөк: 1372,8 сом,
түнкү сменада 56 саат иштегени үчүн: 1621,87 сом,
майрамдык күндөрдө 8 саат иштегени үчүн: 463,39 сом,
КТК боюнча кошумча эмгек акы: 3171,94 сом (март айында комиссия 1 балл койгон),
Бишкек шаарынын саламаттык сактоо уюмдары үчүн ай сайын берилүүчү кошумча төлөм: 1500 сом.
Ушунун ичинен киреше салыгы, Социалдык фондго жана профсоюз фондго чегерүүлөр жалпы 3849 сомду түзгөн. Натыйжада Даутова Н.У. март айында колуна 15721 сом алган.
Жогоруда белгиленгендей, КТК ай сайын өзгөрүшү мүмкүн. Мисалы:
Октябрь 2024-ж. – 6604,61 сом;
Ноябрь 2024-ж. – 5421,54 сом;
Декабрь 2024-ж. – 6620,90 сом;
Январь 2025-ж. – 5223,50 сом;
Февраль 2025-ж. – 0 сом (эмгек өргүүсү);
Март 2025-ж. – 3171,94 сом.
Саламаттык сактоо министрлиги 2025-жыл үчүн саламаттык сактоо тармагына кошумча каржылык каражат бөлүү мүмкүнчүлүгүн караштыруу боюнча Кыргыз Республикасынын Финансы министрлигине бир нече жолу жазуу түрүндө кайрылган.
Кызматкерлердин эмгек акысын мындан ары жогорулатуу медициналык кызмат көрсөтүүлөрдүн сапатын жакшыртууга, кызматкерлердин канааттануусун жогорулатууга жана башка тармактарга адистердин кетүүсүн азайтууга өбөлгө түзөрүн түшүнүп, бул маселе Саламаттык сактоо министрлиги үчүн артыкчылыктуу багыт болуп саналат.
Прикрепленные файлы:
Другие Новости
12.05.2025
Президенттин бардык тапшырмалары аткарылды: Кыргызстанда жүрөк кемтиги менен төрөлгөн балдарга жардам көрсөтүлүү улантылууда
2025-жылдын 8-майында Кыргыз Республикасынын Президенти Садыр Нургожоевич Жапаров Убактылуу Республикалык диагностикалык борбордун имаратында жайгашкан Жүрөк хирургиясы жана органдарды трансплантациялоо илимий-изилдөө институтунун (ЖХжОТИИ) борборуна барып, “Global Cardiac Alliance” эл аралык командасынын иши менен жеке таанышып, жүрөк кемтиги менен төрөлгөн балдарга жардам көрсөтүүнүн көйгөйлөрүн жоюу боюнча бир катар ыкчам тапшырмаларды берген.
Саламаттык сактоо министрлиги, КММАнын командасы, “Кыргызфармация” мамлекеттик ишканасы, ЖХжОТИИ жана кайрымдуулук уюмдары менен биргеликте бардык кемчиликтер жоюлду. Атап айтканда:
• Жандандыруу бөлүмүндө жаткан бейтаптарды көзөмөлдөө үчүн кошумча УЗИ аппараты орнотулду.
• Стерилизация бөлүмү борбордун жер төлөсүнө жайгаштырылып, ишке киргизилди.
• Борбор кошумча хирургиялык шаймандар топтому менен камсыз болду.
• “Ас-Сафа” кайрымдуулук фонду жана “Кыргызфармация” тарабынан дары-дармек жана керектүү материалдар толук камсыздалды.
• Операциялык бөлмөлөргө, жандандыруу жана башка бөлүмдөргө төрт жаңы кондиционер орнотулду.
ЖХжОТИИ имаратында болгон өрт кырсыгынан кийин борбор убактылуу Республикалык диагностикалык борборго көчүрүлгөн. Бирок ушул жумада институттун негизги имаратында оңдоо иштерин баштоо пландалууда. Ошону менен катар кошумча медициналык жабдууларды сатып алуу каралууда. Бул клиниканын толук кандуу иштешин калыбына келтирип, балдарга көрсөтүлүүчү жардамдын көлөмүн кеңейтүүгө мүмкүнчүлүк берет.
Бул тармакты чыңдоо боюнча иштер Кыргыз Республикасынын Президентинин аталган медициналык мекемеге болгон акыркы сапарында берилген тапшырмаларынын алкагында улантылат. Мамлекет башчысы балдардын өмүрү менен саламаттыгын мамлекеттик саясаттын артыкчылыгы катары так белгиледи.
Эске салсак, 2-майдан бери борбордо “Global Cardiac Alliance” уюмунун тажрыйбалуу адистери менен биргеликте операциялар жүргүзүлүп жатат. Жалпысынан операцияга 70 бала тизмеге алынган. Анын ичинен 30 бала операцияга толук даяр, 7 балага операция жасалды, алардын 4үнүн абалы туруктуу. Тилекке каршы, дарыгерлердин бардык аракеттерине карабастан, операциядан кийин үч наристенин өлүмү катталды.
12.05.2025
Бишкекте медайымдык иш боюнча VI Эл аралык форум болуп өттү
2025-жылдын 12-майында Бишкек шаарында Бүткүл дүйнөлүк медайымдар күнү жана Акушерлер күнүнүн белгиленишине карата медайымдык иш боюнча VI Эл аралык форум болуп өттү. Иш-чарага Кыргызстандын бардык аймагындагы саламаттык сактоо уюмдарынын медайымдары, Корея Республикасынын элчилигинин өкүлдөрү, Дүйнөлүк саламаттык сактоо уюмунун (ДССУ) жана И.К. Ахунбаев атындагы Кыргыз мамлекеттик медициналык академиясынын өкүлдөрү катышты.
Форумдун ачылышында Жогорку Кеңештин депутаты Гүлсүнкан Жунушалиева жана Саламаттык сактоо министринин кеңешчиси Элнура Боронбаева сөз сүйлөп, медайымдардын оорулардын алдын алууда жана калктын жашоо сапатын жогорулатууда зор салымы бар экенин баса белгиледи. Иш-чаранын жүрүшүндө саламаттык сактоону өнүктүрүүгө кошкон чоң салымы үчүн бир катар адистер ведомстволук сыйлыктар менен сыйланышты.
«Медайымдык илим: изилдөө, өнүгүү жана инновациялар» урааны алдында өткөн форум төмөнкү негизги багыттарды талкуулоого арналды:
- медайымдык илимдеги изилдөөлөрдү өнүктүрүү;
- медайымдардын жана акушерлердин кесиптик компетенцияларын жогорулатуу;
- медайымдык билим берүү жана практиканы өнүктүрүүдө эл аралык кызматташтыкты бекемдөө.
Кыргызстанда медайымдар менен акушерлер өлкөдөгү медициналык кызматкерлердин жарымынан көбүн түзөт. Алардын саламаттык сактоо системасын туруктуу өнүктүрүүгө, Туруктуу өнүгүү максаттарына жетүүгө жана калктын жалпы медициналык кызматтарга жеткиликтүүлүгүн камсыздоого кошкон салымы баа жеткис. Медайымдар калк менен саламаттык сактоо системасынын ортосундагы байланыштын 90% камсыздашат жана бейтаптардын жашоосунун бардык этаптарында коштоп жүрүшөт. Айрыкча алыскы аймактарда алардын ролу өзгөчө мааниге ээ, анткени көп учурда алар бейтапка жалгыз жеткиликтүү медициналык адис болуп саналат.
2025-жылдагы Бүткүл дүйнөлүк медайымдар күнү «Биздин медайымдар. Биздин келечек. Медайымдарга кам көрүү — экономиканы чыңдайт» ураанынын алдында өтүүдө. Бул ураан медайымдар үчүн коопсуз эмгек шарттарын түзүүнүн, алардын физикалык жана психикалык жыргалчылыгын колдоонун жана кесиптик түйшүктөн сактоонун маанилүүлүгүн белгилейт.
Кыргыз Республикасынын Саламаттык сактоо министрлиги медайымдардын ролун кеңейтүү багытында активдүү иштерди жүргүзүп келет. Реформанын алкагында дарыгерлердин айрым функциялары, айрыкча жугуштуу эмес оорулардын алдын алуу, эне жана баланын ден соолугун коргоо, паллиативдик жардам көрсөтүү тармактарында медайымдарга өткөрүлүп берилүүдө.
30.04.2025
Кыргызстан менен Кытай медициналык билим берүү жана илим тармагындагы кызматташтыкты чыңдоодо
Кыргыз Республикасынын Саламаттык сактоо министрлигинин делегациясы, министрдин биринчи орун басары Манас Токтомуратов жана министрдин кеңешчиси Эльнура Боронбаева баштаган курамда, «Медициналык инновациялар жана кызматташтык – 2025» эл аралык форумуна катышуу алкагында Кытай Эл Республикасына иш сапарында болушту.
Форумдун биринчи бөлүгү Фанчэнган шаарында өтүп, анда Азия жана башка аймактардан келген делегаттар медициналык инновациялар, камсыздандыруу жана саламаттык сактоо системаларын санариптештирүү боюнча негизги маселелерди талкуулашты.
Түштөн кийин делегация Наньнин шаарындагы Гуанси Кытай медицина университетине барып, аталган университет менен И.К. Ахунбаев атындагы Кыргыз мамлекеттик медициналык академиясынын ортосунда түзүлгөн өз ара түшүнүшүү тууралуу Меморандумдун кол коюлган нускалары менен расмий алмашуу аземи болуп өттү.
Иш-чаранын жүрүшүндө министрдин биринчи орун басары Манас Токтомуратов сөз сүйлөп, университеттер аралык жана илимий кызматташуунун маанисине токтолду:
«Бүгүнкү жолугушуу медицина жана билим берүү тармагындагы эки тараптуу кызматташууну өнүктүрүүдө өзгөчө мааниге ээ. Университеттер ортосундагы Меморандум сыяктуу демилгелер — биргелешкен билим берүү программалары, илимий изилдөөлөр жана студенттер менен окутуучулар ортосундагы тажрыйба алмашуу үчүн бекем негиз болуп саналат. Бул биздин өлкөлөрдө медициналык билим берүүнүн жана саламаттык сактоонун сапатын жогорулатууга чоң салым кошот».
Кол коюлган Меморандум биргелешкен илимий долбоорлорду ишке ашырууну, академиялык алмашууларды, ошондой эле салттуу кытай медицинасы жана жалпы медициналык билим берүү жаатында кызматташууну тереңдетүүнү карайт. Бул документ Кыргызстан менен Кытайдын узак мөөнөттүү гуманитардык жана кесиптик өнөктөштүккө берилгендигинин белгиси болуп саналат.