Copyright: Администрация Президента КР©
Президент Садыр Жапаров Дүйнөлүк саламаттык сактоо уюмунун Европа регионалдык бюросунун директору Ханс Клюгени кабыл алды
14.11.2023 / Просмотров: 3104
Кыргыз Республикасынын Президенти Садыр Жапаров бүгүн, 14-ноябрда, өлкөгө сапар менен келген Дүйнөлүк саламаттык сактоо уюмунун (ДСУ) Европа регионалдык бюросунун директору Ханс Клюгени кабыл алды.
Тараптар ДСУнун ишмердүүлүгү жана республиканын калкынын ден соолугун чыңдоого багытталган саламаттыкты сактоо тармагындагы мындан аркы кызматташууну улантуу боюнча пикир алмашты.
Президент Кыргызстан Уюмдун ишмердүүлүгүн жогору баалай турганын жана мындан ары да ар тараптуу кызматташтыкты бекемдөөгө чоң маани берерин баса белгилеп, саламаттык сактоо тармагы мамлекеттин негизги артыкчылыктарынын бири болуп саналарын айтты.
Садыр Жапаров учурда 2019–2030-жылдар мезгилине багытталган «Дени сак адам – өнүккөн өлкө» программасынын ишке ашырылуусу туурасында айтып берди. Программанын максаты – элдин саламаттыгын сактоо, саламаттык сактоо тутумун жана баштапкы медициналык жардам инфратүзүмүн өнүктүрүү.
Мамлекет башчысы Дүйнөлүк саламаттык сактоо уюму менен саламаттык сактоо секторун реформалоо, медициналык кадрларды даярдоо, эне менен баланын ден соолугун коргоо жана бир катар илдеттерди дарылоо боюнча комплекстүү реформаларды ишке ашыруудагы кызматташтыктын оң тажрыйбасына токтолду.
Президент Садыр Жапаров саламаттык сактоо секторун өнүктүрүү жолунда Дүйнөлүк саламаттык сактоо уюмун кыргыз тарап негизги өнөктөш катары көрөрүн өзгөчө белгилеп өттү.
Өз кезегинде Дүйнөлүк саламаттык сактоо уюмунун Европа регионалдык бюросунун директору Ханс Клюге меймандостук үчүн ыраазычылык билдирип, Кыргызстан анын жүрөгүндө өзгөчө орунду ээлей турганын белгиледи.
Ал өлкө жетекчилиги тарабынан саламаттык сактоо тармагына көңүл бурулуп жатканын канааттануу менен белгилеп, өлкөнүн өнүгүү деңгээли адамдык капиталдын өнүгүүсү менен тыгыз байланышта экенин айтты.
Ханс Клюге ДСУ калктын ден соолугун жана бакубат жашоосун жогорулатууга багытталган мамлекеттердин жана коомдордун аракеттерин колдой турганын баса белгилеп, Кыргызстандын калктын саламаттыгын сактоо Программасынын алкагында белгиленген пландарын оң жагынан баалады.
Мындан тышкары, ал санариптештирүү - медицинаны өнүктүрүү үчүн абдан маанилүү экенин жана ДСУ Кыргызстан менен бул багытта кызматташууга даяр экенин кошумчалады.
Сүйлөшүүнүн аягында Дүйнөлүк саламаттык сактоо уюмунун Европа регионалдык бюросунун директору Кыргызстанга 2024-жылы Борбор Азияда ден соолукту жана бакубат жашоону колдоо боюнча Жол картасын ишке ашыруу боюнча 2022-2025-жылдарга төрагалык кылууну сунуштады.
Прикрепленные файлы:
Другие Новости
20.01.2025
Сасык тумоо жана курч респиратордук вирустук инфекциялар боюнча эпидемиологиялык кырдаал
Саламаттык сактоо министрлигинин Оорулардын алдын алуу жана мамлекеттик санитардык-эпидемиологиялык көзөмөл департаментинин оперативдүү маалыматы боюнча, 2024-жылдын 3-жумасында (13.01.25 - 19.01.25) курч респиратордук вирустук инфекциялардын 11 761 учуру жана сасык тумоонун 41 учуру катталып (и.к. 166,2), өткөн жумага салыштырмалуу (02-жума, и.к. 105,0) +1,6 эсеге жогору. Ооругандардын 4,8%ы (563 бейтап) ооруканага жаткырылган.
Лабораториялык изилдөөлөрдүн жыйынтыгы боюнча октябрь айынан бери курч респиратордук вирустук инфекциялардын таралышы байкалууда, алардын ичинен эң көп таралган респиратордук синцитиалдык вирус – 30,3%, риновирус – 25,8%, аденовирус – 13,2%, I-IV парагрипп – 11,4%, башка вирустук инфекциялар 19,3%ды түздү.
2024-жылдын декабрынын ортосунан баштап A/(H1N1(2009)) тумоосунан жана В тумоосунун айрым учурлары - 10,7% жана COVID-19 - 8,9% шарттаган сасык тумоо мезгили болду.
Эпидемияга каршы иш-чараларды өз убагында уюштуруу жана оорунун алдын алуу максатында кышкы каникулдан кийин балдардын мектепке баруусуна мониторинг жүргүзүлүүдө.
Республикада сасык тумоо, курч респиратордук вирустук инфекциялар жана COVID-19 инфекциясы боюнча эпидемиологиялык кырдаалга мониторинг жана баалоо улантылууда жана көзөмөлдө.
17.01.2025
КР Саламаттык сактоо министри Республикалык калыбына келтирүү борборуна барды
2025-жылдын 17-январында Кыргыз Республикасынын Саламаттык сактоо министри Алымкадыр Бейшеналиев Аламүдүн районунун Дачное айылында жайгашкан Республикалык калыбына келтирүү борборуна барды. Иш сапардын жүрүшүндө министр борбордун иштөө шарттары менен таанышып, анын кызматкерлери менен негизги маселелерди талкуулады жана калыбына келтирүүчү жана адистештирилген медициналык жардам көрсөтүү системасын мындан ары өнүктүрүүнүн маанилүүлүгүн белгиледи.
Борбор профилактикалык, кеңеш берүү, дарылоочу, диагностикалык жана калыбына келтирүү сыяктуу кызматтардын түрүн көрсөтөт. Борбордунишмердүүлүгүнүн негизги багыттары бейтаптардын ден соолугун калыбына келтирүүгө көмөктөшүүчү дарылоо гимнастикасы жана дене тарбия секцияларын уюштурууну камтыйт.
Министр Кыргызстанда жыл сайын 1500гө жакын адам инсультка кабылып, калыбына келтирүүчү жардамга муктаж болоорун белгиледи. Мындан тышкары, жол кырсыгынан жабыркагандар жана дарылоонун паллиативдик стадиясындагы бейтаптар да жардамга муктаж. Мындай борборду түзүү республиканын бардык аймактарынан келген тургундар үчүн медициналык жардамдын жеткиликтүүлүгүн жана сапатын бир топ жакшыртат.
17.01.2025
Саламаттык сактоо министрлиги Бишкек шаарынын мэриясы менен биргеликте кызамык оорусу боюнча көчмө ыкчам штабдын жыйынын өткөрүүдө
2025-жылдын 16-январында КР саламаттык сактоо министринин орун басары Бубужан Арыкбаеванын жана Бишкектин вице-мэри Виктория Мозгачеванын төрагалыгы алдында КР Саламаттыкты сактоо министрлигинин көчмө ыкчам штабынын жыйыны уюштурулду. Бул жыйын Кыргыз Республикасынын Министрлер Кабинетинин протоколдук тапшырмаларын жана Саламаттык сактоо министрлигинин кызамык менен күрөшүү боюнча штабынын чечимдерин аткаруунун жана кызамык боюнча алдын алуу жана эпидемияга каршы иш-чараларга көмөк көрсөтүүнүн алкагында уюштурулду.
Талкууга коомдук саламаттыкты сактоонун жана Бишкек шаарынын мэриясынын өкүлдөрү, Бишкек шаарынын саламаттык сактоо уюмдарынын жетекчилери, билим берүү мекемелеринин, аймактык администрациялардын өкүлдөрү катышты. Жыйында учурдагы эпидемиологиялык кырдаал, кызамыктын, кызылчанын, курч респиратордук вирустук инфекциялардын жана сасык тумоонун чыгышына жооп катары жүргүзүлгөн эмдөө боюнча өнөктүктөргө мониторинг талкууланды.
Белгилей кетсек, өткөн жылы республикада кошумча жана тазалоочу эмдөөнүн үч баскычы өткөрүлгөн. Республика боюнча 918 000 бала жана 29 258 саламаттык сактоо системасынын кызматкери, орто жана жогорку окуу жайларынын окутуучулары жана студенттери эмдөөдөн өткөн.
2024-жылдын жыйынтыгы боюнча республиканын аймагында кызамык оорусунун 14 380 учуру, анын ичинен 5 681 учуру Бишкек шаарында катталган. 2025-жылдын башынан бери 229 жаңы учур, анын ичинде Бишкек шаарында 144 учур катталды. Оорунун күч алышынын негизги себеби – эмдөөдөн өткөндөрдүн көрсөткүчү талаптагыдан төмөндүгү, Бишкекте адамдардын 95% вакцина алышы керек болсо, учурда бул көрсөткүч 69 %ды түзөт.
Кызамык оорусунун андан ары жайылышын алдын алуу үчүн Саламаттык сактоо министрлиги 9 айдан 7 жашка чейинки курактагы балдар арасында тазалоочу эмдөө боюнча өнөктүктү улантууда, бирок эмдөөдөн баш тарткандардын айынан бул иш кыйынчылыктар менен коштолууда. Ушул себептен улам олуттуу эпидемиологиялык тобокелдиктер бар, себеби вирус эмделбеген балдардын арасында жайылып жатат.
Ыкчам штабдын жыйынынын жыйынтыгы боюнча төмөнкүдөй чечимдер кабыл алынды: кызамыкка каршы күрөшүү боюнча профилактикалык жана эпидемияга каршы иш-чараларды күчөтүү, профилактикалык эмдөөлөрдү 95%дан кем эмес деңгээлге жеткирүү; калк арасында түшүндүрүү иштерин күчөтүү, эмдөөнүн коопсуздугун жана маанилүүлүгүн түшүндүрүүгө багытталган маалыматтык-агартуу өнөктүктөрүн уюштуру.