Copyright: ©
Бишкекте №1 шаардык клиникалык оорукананын жаңы терапиялык корпусунун курулушу башталды
05.09.2024 / Просмотров: 1906
Бүгүн, 2024-жылдын 5-сентябрында Бишкек шаардык №1 клиникалык ооруканасында терапия бөлүмүнүн курулушуна капсула салуу расмий аземи болуп өттү.
Салтанатка КРнын Саламаттык сактоо министри Алымкадыр Бейшеналиев, Кувейт мамлекетинин “Ас-Сафа” кайрымдуулук фондунун төрагасы шейх Мухаммад Абдурахман Альшая, оорукананын жетекчилиги жана жамааты катышты.
Курулушту келерки жылдын сентябрына чейин бүтүрүү пландалууда.
Объекттин сметалык баасы 80 миллион сомду түзүп, толугу менен “Ас-Сафа Центр” коомдук бирикмеси каржылайт. Курулуш иштери аяктагандан кийин зарыл болгон эл аралык класстагы медициналык жабдуулар, жумшак жана катуу эмеректер менен жабдылат.
Кыргыз Республикасынын Саламаттык сактоо министри Алымкадыр Бейшеналиев «Ас-Сафа Центр» коомдук бирикмесинин Кыргызстандын саламаттыкты сактоо тутумунун инфраструктурасын өнүктүрүүгө кошкон салымын жогору баалап, фонддун жетекчилигине ыраазычылык билдирди. «№1 шаардык клиникалык оорукананын бардык керектүү медициналык жабдуулар менен жабдылган жаңы имаратынын курулушу жарандарга медициналык жардам көрсөтүүнүн сапатын жогорулатууга жана бейтаптар менен кызматкерлер үчүн шарттарды жакшыртууга мүмкүндүк берет. Буга чейин “Ас-Сафа” кайрымдуулук фонду бул ооруканага эки кабаттуу имарат куруп берген. Учурда ал имаратта кабыл алуу бөлүмү жана консультациялык-диагностика бөлүмү жайгашкан. Ошондой эле, жакынкы күндөрдө Эне жана баланы коргоо улуттук борборунун базасында бардык керектүү жабдыктар менен камсыздалган Гемодиализ борборунун имаратын ачуу пландалууда”, - деп билдирди Алымкадыр Бейшеналиев.
«Терапия жана ангионеврология бөлүмдөрүнүн имараттары 1940-жылдары курулуп, быйыл ӨКМдин чечими менен жабылганга чейин иштеп, жаңыланууга муктаж болчу. Бул жагынан акыркы эки жылдан бери «Ас-Сафа» кайрымдуулук фонду бизге чоң жардам берип жатканы абдан кубандырат», - деди №1 шаардык клиникалык оорукананын башкы дарыгери Акылбек Мусаев.
Жалпы аянты 1530 м2 болгон төрт кабаттуу имаратка төмөнкүлөрдү камтыйт: Биринчи кабат – лаборатория (гематология, биохимия, ИФА), кир жуугуч жана техникалык жайлар. 1-кабат – пландуу бейтаптарды кароо бөлмөсү, дарыгерлердин бөлмөлөрү, УЗИ, ЭКГ бөлмөлөрү, дарылоо бөлмөсү, санитардык жайлар жана башка керектүү техникалык жайлар. 2чи жана 3чү кабаттарда – Терапиялык бейтаптар бөлүмү; 2 орундуу интенсивдүү терапия залы, 36 орунга ылайкташкан 17 бөлмө, дарылоо бөлмөсү, тамак таратуу жайы бар буфет жана башка зарыл техникалык жайлар. Бейтаптарга толук текшерүүдөн өтүү үчүн бардык шарттар түзүлүп, дарылоонун толук курсун алуу үчүн бөлмөлөр каралат.
Прикрепленные файлы:
Другие Новости
20.01.2025
Сасык тумоо жана курч респиратордук вирустук инфекциялар боюнча эпидемиологиялык кырдаал
Саламаттык сактоо министрлигинин Оорулардын алдын алуу жана мамлекеттик санитардык-эпидемиологиялык көзөмөл департаментинин оперативдүү маалыматы боюнча, 2024-жылдын 3-жумасында (13.01.25 - 19.01.25) курч респиратордук вирустук инфекциялардын 11 761 учуру жана сасык тумоонун 41 учуру катталып (и.к. 166,2), өткөн жумага салыштырмалуу (02-жума, и.к. 105,0) +1,6 эсеге жогору. Ооругандардын 4,8%ы (563 бейтап) ооруканага жаткырылган.
Лабораториялык изилдөөлөрдүн жыйынтыгы боюнча октябрь айынан бери курч респиратордук вирустук инфекциялардын таралышы байкалууда, алардын ичинен эң көп таралган респиратордук синцитиалдык вирус – 30,3%, риновирус – 25,8%, аденовирус – 13,2%, I-IV парагрипп – 11,4%, башка вирустук инфекциялар 19,3%ды түздү.
2024-жылдын декабрынын ортосунан баштап A/(H1N1(2009)) тумоосунан жана В тумоосунун айрым учурлары - 10,7% жана COVID-19 - 8,9% шарттаган сасык тумоо мезгили болду.
Эпидемияга каршы иш-чараларды өз убагында уюштуруу жана оорунун алдын алуу максатында кышкы каникулдан кийин балдардын мектепке баруусуна мониторинг жүргүзүлүүдө.
Республикада сасык тумоо, курч респиратордук вирустук инфекциялар жана COVID-19 инфекциясы боюнча эпидемиологиялык кырдаалга мониторинг жана баалоо улантылууда жана көзөмөлдө.
17.01.2025
КР Саламаттык сактоо министри Республикалык калыбына келтирүү борборуна барды
2025-жылдын 17-январында Кыргыз Республикасынын Саламаттык сактоо министри Алымкадыр Бейшеналиев Аламүдүн районунун Дачное айылында жайгашкан Республикалык калыбына келтирүү борборуна барды. Иш сапардын жүрүшүндө министр борбордун иштөө шарттары менен таанышып, анын кызматкерлери менен негизги маселелерди талкуулады жана калыбына келтирүүчү жана адистештирилген медициналык жардам көрсөтүү системасын мындан ары өнүктүрүүнүн маанилүүлүгүн белгиледи.
Борбор профилактикалык, кеңеш берүү, дарылоочу, диагностикалык жана калыбына келтирүү сыяктуу кызматтардын түрүн көрсөтөт. Борбордунишмердүүлүгүнүн негизги багыттары бейтаптардын ден соолугун калыбына келтирүүгө көмөктөшүүчү дарылоо гимнастикасы жана дене тарбия секцияларын уюштурууну камтыйт.
Министр Кыргызстанда жыл сайын 1500гө жакын адам инсультка кабылып, калыбына келтирүүчү жардамга муктаж болоорун белгиледи. Мындан тышкары, жол кырсыгынан жабыркагандар жана дарылоонун паллиативдик стадиясындагы бейтаптар да жардамга муктаж. Мындай борборду түзүү республиканын бардык аймактарынан келген тургундар үчүн медициналык жардамдын жеткиликтүүлүгүн жана сапатын бир топ жакшыртат.
17.01.2025
Саламаттык сактоо министрлиги Бишкек шаарынын мэриясы менен биргеликте кызамык оорусу боюнча көчмө ыкчам штабдын жыйынын өткөрүүдө
2025-жылдын 16-январында КР саламаттык сактоо министринин орун басары Бубужан Арыкбаеванын жана Бишкектин вице-мэри Виктория Мозгачеванын төрагалыгы алдында КР Саламаттыкты сактоо министрлигинин көчмө ыкчам штабынын жыйыны уюштурулду. Бул жыйын Кыргыз Республикасынын Министрлер Кабинетинин протоколдук тапшырмаларын жана Саламаттык сактоо министрлигинин кызамык менен күрөшүү боюнча штабынын чечимдерин аткаруунун жана кызамык боюнча алдын алуу жана эпидемияга каршы иш-чараларга көмөк көрсөтүүнүн алкагында уюштурулду.
Талкууга коомдук саламаттыкты сактоонун жана Бишкек шаарынын мэриясынын өкүлдөрү, Бишкек шаарынын саламаттык сактоо уюмдарынын жетекчилери, билим берүү мекемелеринин, аймактык администрациялардын өкүлдөрү катышты. Жыйында учурдагы эпидемиологиялык кырдаал, кызамыктын, кызылчанын, курч респиратордук вирустук инфекциялардын жана сасык тумоонун чыгышына жооп катары жүргүзүлгөн эмдөө боюнча өнөктүктөргө мониторинг талкууланды.
Белгилей кетсек, өткөн жылы республикада кошумча жана тазалоочу эмдөөнүн үч баскычы өткөрүлгөн. Республика боюнча 918 000 бала жана 29 258 саламаттык сактоо системасынын кызматкери, орто жана жогорку окуу жайларынын окутуучулары жана студенттери эмдөөдөн өткөн.
2024-жылдын жыйынтыгы боюнча республиканын аймагында кызамык оорусунун 14 380 учуру, анын ичинен 5 681 учуру Бишкек шаарында катталган. 2025-жылдын башынан бери 229 жаңы учур, анын ичинде Бишкек шаарында 144 учур катталды. Оорунун күч алышынын негизги себеби – эмдөөдөн өткөндөрдүн көрсөткүчү талаптагыдан төмөндүгү, Бишкекте адамдардын 95% вакцина алышы керек болсо, учурда бул көрсөткүч 69 %ды түзөт.
Кызамык оорусунун андан ары жайылышын алдын алуу үчүн Саламаттык сактоо министрлиги 9 айдан 7 жашка чейинки курактагы балдар арасында тазалоочу эмдөө боюнча өнөктүктү улантууда, бирок эмдөөдөн баш тарткандардын айынан бул иш кыйынчылыктар менен коштолууда. Ушул себептен улам олуттуу эпидемиологиялык тобокелдиктер бар, себеби вирус эмделбеген балдардын арасында жайылып жатат.
Ыкчам штабдын жыйынынын жыйынтыгы боюнча төмөнкүдөй чечимдер кабыл алынды: кызамыкка каршы күрөшүү боюнча профилактикалык жана эпидемияга каршы иш-чараларды күчөтүү, профилактикалык эмдөөлөрдү 95%дан кем эмес деңгээлге жеткирүү; калк арасында түшүндүрүү иштерин күчөтүү, эмдөөнүн коопсуздугун жана маанилүүлүгүн түшүндүрүүгө багытталган маалыматтык-агартуу өнөктүктөрүн уюштуру.