Copyright: ©

Улуттук госпиталга Япония өкмөтү тарабынан берилген компьютердик томография орнотулду

30.05.2024 / Просмотров: 6316

Бүгүн, 2024-жылдын 30-майында Улуттук госпиталда «Япония Өкмөтүнүн Социалдык-экономикалык өнүктүрүү программасы» аркылуу берилген жаңы КТ аппаратынын ачылыш аземи болуп өттү.

Иш-чарага Кыргыз Республикасынын Саламаттык сактоо министринин биринчи орун басары Медербек Исмаилов, Япониянын Кыргыз Республикасындагы Атайын жана Ыйгарым укуктуу Элчиси ГОДА Хидэки мырза катышты.

Иш-чаранын жүрүшүндө Медербек Исмаилов жана ГОДА Хидэки мырза жаңы жабдуулардын иштеши менен таанышып, КТ диагностикасын талап кылынган бейтаптарга медициналык кызмат көрсөтүүнүн шарттарына баа беришти. Жаңы томограф Кыргыз Республикасындагы медициналык кызматтын сапатын жана жеткиликтүүлүгүн бир топ жакшыртып, ар кандай оорулардын так жана тез диагностикасын камсыздайт.

Улуттук госпиталдын башкы дарыгери Бакыт Төлөгөнов КТ диагностикалык кызматынын прейскуранты иштелип чыкканын, бир текшерүүнүн баасы 1400 сомду түзөрүн билдирди. Ал белгилегендей, жаңы томографтын өткөрүү жөндөмдүүлүгү патологиясынын татаалдыгына жана оордугуна жараша күнүнө 40-50гө чейин бейтаптарды тейлөөгө мүмкүндүк берет. Бакыт Төлөгөнов Кыргызстандын саламаттык сактоо тармагын өнүктүрүүгө кошкон зор салымы үчүн Япония өкмөтүнө жана жеке ГОДА Хидэки мырзага терең ыраазычылык билдирди. «Биздин ооруканада орнотулган жаңы компьютердик томография биздин бейтаптарга диагностиканын жана дарылоонун сапатын бир топ жакшыртат, биз Япония Өкмөтүнө биздин медициналык кызматты модернизациялоого көрсөткөн жардамы үчүн чын жүрөктөн ыраазычылык билдиребиз», - деп белгиледи Төлөгөнов.

“Япония өкмөтүнүн социалдык-экономикалык өнүктүрүү программасы” долбоору 2020-жылы башталып, бул долбоордун алкагында Япония өкмөтү 500 миллион иен өлчөмүндө гранттык каражат бөлгөн. Бул каражатка заманбап медициналык жабдуулар, анын ичинде Улуттук кардиология жана терапия борборуна жүрөк-кан тамыр системасынын уникалдуу программасы менен магниттик-резонанстык томография, стационардык рентген аппараты жана УЗИ аппараты, Улуттук госпиталгакомпьютердик томограф сатылып алынган.

Прикрепленные файлы:

Другие Новости

17.07.2024
КР Саламаттык сактоо министри ата мекендик спортчуларга Олимпиада алдында ийгиликтерди каалады

2024-жылдын 16-июлунда Кыргыз Республикасынын Саламаттык сактоо министри Алымкадыр Бейшеналиев ата мекендик спортчулардын Париждеги Олимпиаданын алдындагы жыйынтыктоочу машыгуусуна барды. Министр олимпиадалык балбандарга ийгилик жана ден соолук каалап, алардын аракети жана жеңишке болгон умтулуусу маанилүү экенин белгиледи.

Иш сапардын алкагында министр олимпиадалык курама команданын дарыгерлери менен да жолугушту. Ал өз сөзүндө спортчуларды коштоп жүргөн медициналык кызматкерлердин маанилүү ролун баса белгиледи. Башкы дарыгер Сагындык Айтбаев жетектеген спорттук-реабилитациялык борбордун дарыгерлери өз убагында жардам көрсөтүү үчүн бардык керектүү нерселер менен жабдылган медициналык баштыктарды алышты.

«Биздин спортчуларга чын дилимден ийгилик жана чың ден соолук каалайм. Мекенибизге көптөгөн медалдарды алып келишип, ден соолук менен кайтып келишсин», - деди өз сөзүндө Алымкадыр Бейшеналиев, Саламаттык сактоо министри.

Ошондой эле Алымкадыр Бейшеналиев спортчулар үчүн туура тамактануунун маанилүүлүгүн белгилеп, медицина кызматкерлерине олимпиадачылардын спорттук тамак-ашына дыкат көз салып, алардын оптималдуу физикалык даярдыгын жана мелдеш учурунда жогорку көрсөткүчтөргө ээ болушун камсыз кылууну тапшырды.

10.07.2024
Боору трансплантацияланган бейтаптар канааттандырарлык абалда үйүнө чыгарылды

Бүгүн, 2024-жылдын 10-июлунда, Кыргыз Республикасынын Саламаттык сактоо министри Алымкадыр Бейшеналиев Кыргыз-түрк достугу ооруканасына барып, боору трансплантацияланган эки бейтаптын абалы менен таанышты. Консилиум жана бардык керектүү текшерүүлөрдөн кийин эки бейтап тең канааттандырарлык абалда үйүнө чыгарылды.

Бир ай бою хирургдар, трансплантологдор, гастроэнтерологдор жана реаниматологдордон турган адистерибиз боору трансплантацияланган бейтаптардын абалын дыкат көзөмөлдөп турушту. Күнүмдүк эртең мененки жана кечки текшерүүлөр, анын ичинде гемодинамикалык жана биохимиялык көрсөткүчтөр боюнча анализдер, ошондой эле УЗИ жана компьютердик томографиялык изилдөөлөр жакшы жыйынтык көрсөттү. Реципиенттердин боору ийгиликтүү иштеп жатат.

Бейтаптар Кыргыз Республикасынын Президенти Садыр Жапаровго, Кыргыз Республикасынын Саламаттык сактоо министри Алымкадыр Бейшеналиевге жана бул операцияга катышкан бардык медицина кызматкерлерине өздөрүнүн кесипкөйлүгү жана берилгендиги үчүн ыраазычылык билдиришти. 

«Биз Кыргызстанда биринчи жолу боорду алмаштыруу операциясы ийгиликтүү жасалганы, өзгөчө бул операциялар биздин жарандар үчүн бекер болгону менен сыймыктанабыз. Бул биздин медицинанын тарыхындагы орчундуу окуя жана ал Президент Садыр Жапаровдун колдоосунун жана кыргыз-түрк адистеринин биргелешкен аракетинин аркасында мүмкүн болду. Биз ар бир жараныбызга жогорку деңгээлдеги тиешелүү медициналык жардамдын жеткиликтүүлүгүн арттыруу үчүн өлкөбүздөгү медициналык тейлөөнү жакшыртуу боюнча иштерди уланта беребиз», - деди Кыргыз Республикасынын Саламаттык сактоо министри. Алымкадыр Бейшеналиев.

Мындан тышкары, министр Улуттук хирургия борборунда гепатология бөлүмү түзүлүп, бейтаптар ай сайын адистердин көзөмөлүндө болоорун кошумчалады. Саламаттык сактоо министрлиги кийинки этаптагы операцияларга бейтаптарды даярдоону улантууда. Учурда 15 адам боорду алмаштыруу үчүн кезекте турат; төрт реципиентте ылайыктуу донорлор бар, алар операцияга чейинки бардык зарыл текшерүүлөрдөн өтүп жатышат.

Эске салсак, үстүбүздөгү жылдын 10-июнунда Кыргызстанда алгачкы жолу Кыргыз-түрк достугу ооруканасында Түркия жана Кыргызстандын саламаттык сактоо министри Алымкадыр Бейшеналиев баштаган жогорку квалификациялуу адистеринин катышуусунда акысыз боорду алмаштыруу операциясы жасалган. Операциялар толугу менен Президенттик фонддон каржыланып, бейтаптарга кошумча чыгымдарсыз кымбат баалуу медициналык жардам көрсөтүүгө мүмкүнчүлүк түздү.

08.07.2024
КР Саламаттыкты сактоо министрлиги кореялык H-Robotics компаниясынан реабилитациялык жабдууларды алат

Бүгүн, 8-июлда, Кыргыз Республикасынын Саламаттык сактоо министри Алымкадыр Бейшеналиев H-Robotics компаниясынын эл аралык бизнести өнүктүрүү боюнча директору Марина Ли айым менен жолугушту. 

 

Жолугушуунун жүрүшүндө кореялык компаниянын өкүлдөрү тарабынан ар кандай реабилитациялык программаларда, анын ичинде инсульттан, мээ жаракатынан жана кыймылдын бузулушун пайда кылган башка оорулардан кийин калыбына келтирүүдө колдонулуучу REBLESS жабдуусу менен тааныштырышты. 

 

Белгилүү болгондой, H-Robotics компаниясынын өкүлдөрү КР Саламаттык сактоо министрлигине ушундай 20 комплект жабдуу берүү ниетин билдиришти. Ушуга байланыштуу жолугушуунун катышуучулары аны Кыргызстандын саламаттыкты сактоо системасында колдонуу мүмкүнчүлүгүн талкуулашты. 

 

Министр Бейшеналиев H-Robotics компаниясына ыраазычылык билдирип, жабдыктар республиканын саламаттык сактоо уюмдары  тарабынан көрсөтүлүүчү реабилитациялык  кызматтарга баалуу кошумча болорун белгиледи. 

 

«Биз медициналык жардамга жеткиликтүүлүктү кеңейтүү жана жаңы технологияларды колдонуу саясатыбызда кореялык тараптан мындай практикалык колдоо көрүп жатканыбызга абдан кубанычтабыз. Биз бул жабдуулар көптөгөн адамдардын жашоо сапатын жакшыртууга жана алардын толук кандуу активдүүлүккө кайтып келишине жардам берет деп үмүттөнөбүз", - деди Алымкадыр Бейшеналиев. 

 

Жолугушуунун соңунда министр Алымкадыр Бейшеналиев кореялык тарап менен кызматташуу айкын багытка ээ болуп, кийин эки өлкөнүн ортосундагы саламаттыкты сактоо тармагындагы кызматташтыкты калыптандырууга жана бекемдөөгө негиз болот деген ишенимин билдирди. 

 

Маалымат үчүн: Rebless – бул чыканактын, билектин, тамандын жана тизе муундарынын кыймылдуулугун камсыз кылган роботтоштурулган реабилитациялык аппарат.