Бүбүжан Арыкбаева: “Аймактардагы медициналык тейлөөнүн сапатын жакшыртабыз”
05.08.2022 / Просмотров: 764
Аймактардагы инфекциялык көзөмөл тармагы жакшы жолго коюлду. Бул боюнча КР Саламаттык сактоо министринин орун басары Бүбүжан Арыкбаева басма-сөз кызматына билдирди. Ал өлкөнүн түштүк аймактарына, Нарын жана Талас облустарына болгон иш сапары жөнүндө маалымат берди.
“Иш сапарымдын негизги максаты COVID-19га байланыштуу эпидемиологиялык кырдаал күчөп кетсе, ага медициналык уюмдардын даяр турушу, ооруга каршы эмдөө жана инфекциялык көзөмөлдүн аткарылышына байкоо жүргүзүү болчу. Мунун алкагында айрым аймактарда кадр тартыштыгы жана оңдоп-түзөөгө муктаж болгон бейтапканалардын абалы менен тааныштым. Жаралган көйгөйлөр жергиликтүү бийлик өкүлдөрү, донорлор жана Саламаттык сактоо министрлигинин эсебинен чечилүүдө”, - деди министрдин орун басары.
Өз сөзүндө Бүбүжан Арыкбаева пандемия учурунда курулган объекттердин абалына көңүл буруп, инфекциялык көзөмөл иштери кандай аткарылып жатканына байкоо салганын айтты.
“Инфекциялык көзөмөл иштери сапаттуу жүргүзүлгөнүнө күбө болдум. Анын ичинде медициналык калдыктарды жок кылуу иштери жакшы жолго коюлуптур”, - деп Бүбүжан Арыкбаева кошумчалады.
.jpeg)
Прикрепленные файлы:
Другие Новости
23.09.2023
А.Бейшеналиев, Саламаттык сактоо министри: «Медициналык жардамга жеткиликтүүлүктөгү теңсиздикти жоюу кургак учук менен күрөшүү стратегиябыздын ажырагыс бөлүгү болуп саналат»
2023-жылдын 22-сентябрында Кыргыз Республикасынын Саламаттык сактоо министри Алымкадыр Бейшеналиев БУУнун Башкы ассамблеясынын кургак учукка каршы күрөшүүгө арналган Жогорку деңгээлдеги жыйынына катышты. 130дан ашык өлкөнүн премьер-министрлери, саламаттык сактоо министрлери жана башка жогорку кызмат адамдары билдирүү жасап, кургак учук менен күрөшүү боюнча өз өлкөлөрүнүн милдеттенмелерин дагы бир жолу ырасташты.
Министр Кыргызстандын кургак учук менен күрөшүүдөгү жетишкендиктери менен бөлүшүп, артыкчылыктуу багыттарды белгиледи. «Теңсиздик сапаттуу медициналык тейлөөгө жана медициналык тейлөөгө жетүүгө тоскоолдуктарды жаратып, кургак учуктун өз убагында диагностикасын жана дарылоону, айрыкча кирешеси төмөн жана ортодон төмөн өлкөлөрдө кыйындатат. Медициналык жардамга жеткиликтүүлүктөгү теңсиздикти жоюу кургак учукту жоюу боюнча биздин стратегиянын ажырагыс бөлүгү болуп саналат», - деди А.Бейшеналиев.
Өз сөзүндө министр ошондой эле көп дарыга туруктуу кургак учуктун жайылышына тынчсыздануусун билдирип, дүйнөлүк коомчулукту жаңы дарыларга жана диагностикалык методдорго инвестиция салууга чакырды.
Маалымат үчүн: 2023-жылдын 22-сентябрында БУУнун Башкы ассамблеясынын кургак учукка каршы күрөшүүгө арналган жогорку деңгээлдеги жыйыны өтүп жатат. Жыйынга 130дан ашуун өлкөнүн, ошондой эле эл аралык уюмдардын өкүлдөрү катышууда.
22.09.2023
Алымкадыр Бейшеналиев, Саламаттык сактоо министри: «Саламаттык сактоо кызматтары менен жалпы камтуу жарандардын эле милдети эмес, бул бүткүл адамзаттын милдети»
«Саламаттык сактоо кызматтары менен жалпы камтуу жарандардын эле милдети эмес, бул бүткүл адамзаттын милдети» - Алымкадыр Бейшеналиев БУУнун Жогорку деңгээлдеги жыйынында сөз сүйлөдү. Министр белгилегендей, COVID-19 пандемиясы кризистерге жооп берүүгө даяр күчтүү саламаттык сактоо тутумуна ээ болуу канчалык маанилүү экенин көрсөттү, бирок кыйынчылыктар жугуштуу оорулар менен эле чектелбейт.
«Биз жүрөк-кан тамыр оорулары, диабет жана рак сыяктуу жугуштуу эмес оорулардын эпидемиясына туш болуп жатабыз. Бул оорулар жыл сайын миллиондогон адамдардын өмүрүн алып, эбегейсиз экономикалык зыян алып келет. Бирок сапаттуу медициналык жардам күчү менен алардын көбүн алдын алса болот», - деди Бейшеналиев.
Өз сөзүндө Саламаттык сактоо министрлигинин башчысы өлкөнүн баштапкы медициналык-санитардык жардам кызматын трансформациялоо жана аны медициналык кызматты үзгүлтүксүз көрсөтүүгө даярдоо боюнча жетишкендиктери тууралуу кеңири айтып берди. А.Бейшеналиев саламаттык сактоо системасында жугуштуу эмес оорулардын алдын алууга багытталган инвестициялар чечүүчү мааниге ээ экенин баса белгиледи. Министр ошондой эле медициналык кызматтарга жетүүдө теңсиздикти кыскартуудагы санариптик чечимдердин ролун белгиледи.
Маалымат үчүн: 2023-жылдын 21-сентябрында БУУнун Башкы ассамблеясынын алкагында өтүп жаткан ден соолукту универсалдуу камтуу боюнча жогорку деңгээлдеги жыйын өтүүдө. Жыйынга 149 өлкөнүн, ошондой эле эл аралык уюмдардын өкүлдөрү катышууда.
21.09.2023
КР Саламаттык сактоо министри БУУнун Башкы Ассамблеясынын алкагында өтүп жаткан пандемиянын алдын алуу, ага даярдык көрүү жана ага каршы күрөшүү боюнча жогорку деңгээлдеги жыйында сөз сүйлөдү
2023-жылдын 20-сентябрында Саламаттык сактоо министри Алымкадыр Бейшеналиев БУУнун Башкы Ассамблеясынын алкагында өтүп жаткан пандемиянын алдын алуу, ага даярдык көрүү жана ага каршы күрөшүү боюнча жогорку деңгээлдеги жыйында сөз сүйлөдү.
А. Бейшеналиев белгилегендей, өткөн пандемиядан алынган негизги сабак саламаттыкты сактоонун күчтүү жана туруктуу улуттук тутумун түзүү зарылчылыгы болуп саналат. «Пандемия биздин жарандардын ден соолугуна жана өмүрүнө коркунуч болгондо чек аралар жана улуттук кызыкчылыктар маанилүү болбой турганын көрсөттү. Биз саламаттыкты сактоо тутумубузду чыңдоого, калктын бардык катмарынын медициналык жардамга жеткиликтүүлүгүн камсыздоого инвестиция салышыбыз керек», - деди Бейшеналиев.
Өз сөзүндө Саламаттык сактоо министри келечектеги коркунучтарга даярдык көрүүнүн маанилүүлүгүн белгиледи. А.Бейшеналиев Кыргызстан Дүйнөлүк саламаттык сактоо уюмунун Европа аймагында биринчилерден болуп Эл аралык санитардык эрежелерди ишке ашыруунун алкагында экинчи биргелешкен тышкы баалоону өткөргөнүн баса белгилеп, ошондой эле Саламаттык сактоонун улуттук планы иштелип чыкканын билдирди.
Маалымат үчүн: 2023-жылдын 20-сентябрында БУУнун Башкы ассамблеясынын алкагында өтүп жаткан пандемиянын алдын алуу, ага даярдык көрүү жана ага жооп кайтаруу боюнча жогорку деңгээлдеги жыйын өтүүдө. Жыйынга 150 өлкөнүн, ошондой эле эл аралык уюмдардын өкүлдөрү катышууда.