Copyright: ©

Европа Биримдиги жана Дүйнөлүк саламаттык сактоо уюму Кыргызстанда саламаттыкты сактоону санариптештирүүнү күчөтүү боюнча иш алып барууда

15.03.2024 / Просмотров: 3750

2024-жылдын 14-мартында, Европа Биримдигинин (ЕС) делегациясынын мүчөлөрү Бүткүл дүйнөлүк саламаттык сактоо уюмунун (ДССУ) өкүлдөрү жана Кыргыз Республикасынын Саламаттык сактоо министрлигинин жетекчилиги менен бирге саламаттыкты сактоо чөйрөсүндө санариптик чечимдерди колдонуу практикасын изилдөө максатында шаардык перинаталдык борборго жана №6 үй-бүлөлүк медицина борборуна барышты. Тактап айтканда, алар "iЭмдөө" ("iEmdoo") иммунизациялоо маалыматтык системасы менен таанышышты.

Иш сапардын алкагында делегация мүчөлөрү оорукананын жана баштапкы медициналык-санитардык жардам уюмдун күнүмдүк ишинде санариптик каражаттарды жигердүү пайдаланып жаткан медицина кызматкерлери менен жолугушту. Алар төрөттү каттоо жана бейтаптарды амбулатордук эсепке алуу боюнча маалыматтык системалардын практикалык колдонулушу менен таанышты.

Ошондой эле вакциналарды алган адамдардын, анын ичинде пландалган жана эпидемиологиялык себептер боюнча жүргүзүлгөндөрдүн жекелештирилген эсебин жүргүзүүгө мүмкүндүк берүүчү "iEmdoo" маалымат системасы көрсөтүлдү. Бул система жаңы төрөлгөн баланы биринчи эмдөө учурунда төрөт үйүндө түзүлгөн санариптик эмдөө картасы аркылуу медициналык бошотуулар, эмдөөдөн кийинки мүмкүн болуучу терс таасирлер жана бейтаптын өмүр бою ден соолугунун башка маанилүү аспектилери жөнүндө маалыматтарды жазууга мүмкүндүк берет.

КР Саламаттыкты сактоо министринин орун басары Бакыт Джангазиев белгилегендей, жашы жете элек балдарды эмдөө боюнча маалыматтар алардын ата-энелерине мобилдик тиркеме аркылуу жеткиликтүү, бул ата-энелерди балдарынын ден соолугуна кам көрүүгө активдүү тартууга жардам берет. Бүгүнкү күндө 2 миллиондон ашык санариптик эмдөө карталары түзүлдү, бул маалыматтык системанын актуалдуулугун баса белгилейт.

"Бул аймактык долбоор Борбор Азияда күчтүү жана туруктуу саламаттык сактоо системасын түзөт. ЕСтин 10 миллион евро өлчөмүндөгү колдоосунун аркасында Кыргызстандын саламаттык сактоо сектору саламаттык сактоо жаатындагы глобалдык, регионалдык же улуттук кризистерге жооп кайтарууга жакшы даярданган", - деп ЕБнин Кыргызстандагы Өкүлчүлүгүнүн кызматташуу бөлүмүнүн башчысы Ханс Фарнхаммер. 

Иш сапардын жүрүшүндө ДССУнун Кыргызстандагы өкүлү, доктор Ливиу Ведраско, санариптик доордо Кыргызстандын электрондук саламаттык сактоону чыңдоого басым жасоосу саламаттык сактоо кызматтары менен жалпы камтууга жетишүүнүн стратегиялык кадамы экенин белгиледи. Технологияны колдонуп, өлкө ар бир жаран үчүн медициналык кызматтардын жеткиликтүүлүгүн камсыз кылуу үчүн тайманбас кадамдарды жасап жатат.

Иш сапардын соңунда делегация мүчөлөрү мындан аркы кызматташуунун багыттарын жана санариптик саламаттыкты сактоону өнүктүрүүнүн максаттуу «Санарип MED» моделин ишке ашыруунун багыттарын талкуулап, анын натыйжалуулугу жана өнүгүү перспективалары боюнча баалуу пикир жана көз караштар менен алмашышты.

***

 

Кошумча маалымат: Бул визит Борбордук Азиянын 5 өлкөсүндө - Казакстан, Кыргызстан, Тажикстан, Түркмөнстан жана Өзбекстанда - COVID-19 пандемиясынын таасирин азайтуу жана саламаттык сактоо системасынын туруктуулугун жогорулатуу үчүн Европа Биримдиги тарабынан каржыланган 4 жылдык долбоордун алкагында уюштурулду. Бул багытта эмдөө негизги ролду ойнойт. Борбордук Азия өлкөлөрүнө коопсуз вакциналарды алдыга жылдырууда жана калкка жеткирүүдө колдоо көрсөтүү менен, жугуштуу оорулардын алдын алуу жана контролдоо бир топ натыйжалуу болот.

Европа Биримдиги Борбордук Азиядагы эмдөө жана саламаттыкты сактоо боюнча маалымат системаларына 10 миллион евро инвестициялап, аларды санариптештирүү жана сапаттуу маалыматтардын жеткиликтүүлүгүн жогорулатуу менен модернизациялоону улантууда, бул эч ким артта калбашы үчүн эмдөөнү каалаган убакта жогору камтуусун  камсыз кылуу үчүн маанилүү.

Прикрепленные файлы:

Другие Новости

20.04.2024
Медицина кызматкерлери жалпы республикалык ишембиликке активдүү катышты

Кыргыз Республикасынын Президенти С.Н. Жапаровдун 2022-жылдын 6-сентябрындагы №305 “Улуттук тазалык күнү жана 2023-2025-жылдар мезгилине тиричилик калдыктарын иштетүү боюнча натыйжалуу инфраструктура түзүү боюнча иш-аракеттер планы жөнүндө” Жарлыгынын 1-пункту менен апрель айынын үчүнчү ишембиси “Улуттук тазалык күнү” деп белгиленген.

Бүгүн, 2024-жылдын 20-апрелинде Кыргыз Республикасынын Саламаттык сактоо министрлигинин борбордук аппаратынын кызматкерлери, министрликтин алдындагы Мамлекеттик санэпидэм көзөмөл департаментинин, “Кыргызфармация” мамлекеттик ишканасынын, Дары каражаттары жана медициналык буюмдар департаментинин, Милдеттүү медициналык камсыздандыруу фондунун, Электрондук саламаттык сактоо борборунун, Саламаттык сактоону өнүктүрүү жана медициналык техника борборунун кызматкерлери менен биргеликте  “Улуттук тазалык күнүнө” карата уюштурулган республикалык ишембиликке чыкты. Медициналык кызматкерлер ишембиликтин алкагында Бишкектин четиндеги Степное, Озёрное айылдары тараптагы 4.5 кмге жакын  жолдун жээгин таштандылардан тазалоо иштерин жүргүзүштү.

 Мындан тышкары республикадагы бардык саламаттык сактоо уюмдары мекемеге тийиштүү аймактарда ишембилик өткөрүштү.

Саламаттык сактоо министринин биринчи орун басары Медер Исмаилов айлана-чөйрөгө кам көрүү максатында мамлекет башчысы тарабынан демилгеленген иш-чараны колдоп ишембиликке чыгып, айлана-чөйрөнүн тазалыгына көңүл кош карабаган ар бир кызматкерге ыраазычылыгын билдирди. 

 

“Үч-төрт сааттын ичинде 250дөн ашык кап таштанды чыгарылып, калаабызды айланып өткөн жол жээги тазалыгы менен көз кубандырып калды. Мындай иш-чаралар туруктуу негизде жүргүзүлүп, мамлекетибиздин ар бир жараны жаратылышка аяр мамиле жасоого чакырам. Тазалык – ден соолуктун булагы эмеспи”, - деди ал. 

 

 

 

19.04.2024
Кене вирустук энцефалиттин алдын алуу боюнча сунуштар

Республикада кене вирустук энцефалитинин (КВЭ) табигый очоктору бардык климаттык зоналарда аныкталган жана адам үчүн коркунучтуулугунун даражасына жараша белгиленет. Үстүбүздөгү жылдын 3 айында республика боюнча 156 адам кене чагып кайрылган. Анын арасында КВЭ жуктурган учур катталган жок. Чоң-Кемин, Кыргыз тоо кыркалары Күнгөй Ала-Тоо, Тескей Ала-Тоо айыл аймактарында жайгашкан очоктор олуттуу коркунучту жаратат.

Кене вирустук энцефалити кантип жугушу мүмкүн?

Оорунун козгогучу (арбовирус) адамга вирус жуккан кенен чаккан алгачкы мүнөттөрүндө анын ооруну басуучу шилекейи менен кошо жугат:

• КВЭ боюнча эндемикалык аймактарга барууда (токойлордо, токой сейил бактарында, жеке бакча участокторунда);

• кенелер жаныбарлар (иттер, мышыктар аркылуу келгенде;

• кене энцефалити боюнчу коопсуз аймактарда эчкинин (көбүнчө), койдун, уйдун чийки сүтүн ичкенде, кенелердин массалык чабуул учурунда сүттө вирус болушу мүмкүн. Баса белгилей кетүүчү нерсе, чийки сүт гана эмес, андан жасалган азыктар (быштак, каймак ж.б.) да жугуштуу;

• вирусту териге сүрткөндө кенени эзгенде же чаккан жерди тырмаганда.

• Ушул себептен чийки сүт азыктарын кайнагандан кийин гана колдонуу керек.

Оорунун кесепеттери: толук айыккандан ден соолук көйгөйлөрүнө чейин, майыптыкка жана өлүмгө алып келет.

Кене вирустук энцефалитке ким кабылышы мүмкүн?

Жашына жана жынысына карабастан бардык адамдар кене энцефалитинин инфекциясына кабылышат. Жумушуна байланыштуу токойдо жүргөндөр (жыгач өнөр жай ишканаларынын кызматкерлери, геологиялык чалгындоо кызматтары, автомобиль жана темир жол куруучулар, мунай жана газ түтүктөрүн, электр линияларын куруучулар, топографтар, мергенчилер, туристтер) тобокел тобуна кирет. Шаардын жашоочулары жумуш жана эс алуу учурунда шаар четиндеги токойлордо, сейил бактарында, бакча участокторунда жуктуруп алышат.

19.04.2024
Кыргыз Республикасынын Саламаттык сактоо министри Ысык-Көл облусундагы жаңы тез жардам бөлүмүнүн курулушунун жүрүшү менен таанышты

2024-жылдын 19-апрелинде Кыргыз Республикасынын Саламаттык сактоо министри Алымкадыр Бейшеналиев Ысык-Көл облусуна болгон иш сапарынын алкагында Ысык-Көл облусунун Жалпы дарыгерлик практика борборунда болуп, тез жардам бөлүмүнүн жаңы имаратынын курулушунун жүрүшү менен таанышты. Тамчы айылында «Ас-Сафа Борбору» коомдук кайрымдуулук фондунун каржылоосу менен Тез медициналык жардам бөлүмүнүн (ТМЖБ) имараты курулуп, бүгүнкү күндө курулуш иштери 70-80%га бүткөрүлдү. Учурда ички жасалгалоо жана жабдууларды орнотуу иштери жүрүп жатат.

Ысык-Көл облусунун Жалпы дарыгерлик практика борборунун директору Альмира Алдашеванын айтымында, ТМЖБнын 3 кабаттуу имаратынын курулушуна жалпы 40 млн сом сарпталды. Фонд биздин арызыбызды толугу менен жактырды жана курулуштан тышкары бөлүм бардык зарыл болгон медициналык жабдуулар жана эмеректер менен жабдылат. Кызматкерлердин жана бейтаптардын ыңгайлуулугу үчүн лифт орнотулат. Мындан тышкары, Тамчы айыл аймагынын айыл өкмөтү тарабынан ТМЖБнын айланасында көрктөндүрүү жана жашылдандыруу иштери жүргүзүлөт.

Министр өзгөчө туристтик сезондун алдында калкыбызды сапаттуу жана өз убагында медициналык жардам менен камсыздоодо Ысык-Көл облусунда тез жардам бөлүмүн уюштуруу чоң роль ойноорун баса белгиледи. Бөлүм өзгөчө кырдаалдар учурунда ыкчам жардам көрсөтүү менен чектелбестен, облустун калкынын жалпы ден соолугун чыңдоого да көмөктөшөт.

Тез медициналык жардам бөлүмүнүн расмий ачылышы жана ишке берилиши үстүбүздөгү жылы 20-майга пландалууда.