Бүгүн, 24-декабрда Кыргыз Республикасынын Саламаттык сактоо министри Алымкадыр Бейшеналиев Баткен областынын Интернационал айылында жайгашкан Жалпы дарыгерлик практика борборуна барды.
Иш сапардын алкагында министр Кулунду жалпы дарыгерлик практика борборунун жамааты менен жолугушуп, анын абалы менен таанышты жана «Эл Аман» мамлекеттик дарыканасынын ачылыш аземине катышты.

Министр мамлекеттик дарыкананын ачылышы алыскы райондордун тургундарына медициналык жардам көрсөтүүнү жакшыртуудагы маанилүү кадам экенин, анда сапаттуу дары-дармектер жана медициналык буюмдардын жеткиликтүүлүгү негизги маселелердин бири экенин белгиледи. «Баткен областы өлкөбүздүн эң алыскы аймактарынын бири катары өзгөчө көңүл бурууну талап кылат. Биз мындай аймактардын жашоочуларына сапаттуу медициналык кызматтарды жана дары-дармектерди алуу үчүн бардык шарттарды түзүүгө умтулабыз. Биз саламаттыкты сактоо уюмдарынын инфраструктурасын чыңдоо жана медициналык жардамдын жеткиликтүүлүгүн камсыздоо аркылуу алыскы аймактарды колдоону улантабыз”.

Бүгүн, 2024-жылдын 24-декабрында, Кыргыз Республикасынын Саламаттык сактоо министри Алымкадыр Бейшеналиев Баткен облусунун Лейлек районуна болгон иш сапарынын алкагында Катран айылындагы жаңы фельдшердик-акушердик пункттун (ФАП) салтанаттуу ачылышына катышты.

«Өзгөрүш» ФАПы Катран айылынын 800гө жакын тургунун тейлеп, алгачкы медициналык жардам көрсөтөт. Жаңы имарат 2024-жылы «Ас-Сафа» кайрымдуулук фондунун колдоосу менен курулган жана керектүү жабдуулар менен жабдылып, сапаттуу баштапкы медициналык-санитардык жардам көрсөтүү үчүн бардык талаптарга жооп берет.

Министр өз сөзүндө аймактарда медициналык жардамдын жеткиликтүүлүгү жана сапаты министрликтин ишиндеги негизги артыкчылыктардын бири экенин баса белгиледи. «Лейлек районунан келген 3-Элдик Курултайдын делегаттары да өзгөчө алыскы аймактардагы саламаттыкты сактоо уюмдарынын инфраструктурасын жакшыртуу маселелерин көтөрүштү. Бүгүн биз ФАПтын ачылышындабыз, Кулундуда мамлекеттик дарыкана ачылат. Делегаттар көтөргөн маселелердин баарын келерки жылы чечкенге аракет кылабыз. Ошондой эле “Ас-Сафа” фондуна колдоо көрсөтүп, саламаттыкты сактоону өнүктүрүүгө кошкон салымы үчүн ыраазычылык билдиргим келет”, - деди Алымкадыр Бейшеналиев.

Бүгүн, 2024-жылдын 19-декабрында Кыргыз Республикасынын Саламаттык сактоо министри Алымкадыр Бейшеналиев Ош шаарындагы онкологиялык борборго барып, анын эмгек жамааты менен жолугушуп, мекеменин учурдагы абалы менен таанышты.

Иш сапардын жүрүшүндө министр кызматкерлер менен борбордун ишмердүүлүгүнө тиешелүү актуалдуу маселелерди талкуулады. Борбордун аймагын жана бөлүмдөрүн кыдырып чыгып, иш шарттары жана көрсөтүлүп жаткан медициналык жардамдын сапаты менен таанышты.

Талкууланган маселелердин арасында борбордун жетекчилигинин ишмердүүлүгүнө өзгөчө көңүл бурулду. Алымкадыр Бейшеналиев бул маселе азыртадан эле көзөмөлдөөчү органдардын көзөмөлүндө экенин белгиледи. Алардын текшерүүсү аяктагандан кийин жана чыгарылган буйрукка ылайык, мүмкүн болгон административдик жазаларды камтыган мындан аркы чаралар көрүлөт.

Министр медицина кызматкерлеринин эмгек шарттарын жакшыртуу жана бейтаптарды дарылоонун сапатын жакшыртуу үчүн команданын ичиндеги конструктивдүү өз ара аракеттенүүнүн жана командалык иштин маанилүүлүгүн белгиледи. Ал ошондой эле келерки жылы жаңы заманбап онкология борборун керектүү медициналык жабдуулар менен куруу мүмкүнчүлүгү карала турганын кошумчалады.

Иш сапардын соңунда Саламаттык сактоо министрлигинин башчысы кызматкерлерге ак ниет эмгеги үчүн ыраазычылык билдирип, биргелешкен күч-аракет менен учурдагы көйгөйлөрдү чечүүгө жана онкологиялык жардам системасын чыңдоого болот деген ишенимин билдирди.

Бүгүн, 2024-жылдын 19-декабрында, Кыргыз Республикасынын Саламаттык сактоо министринин орун басары Каарманбек Байдавлетов, Кыргыз Республикасынын Жогорку Кеңешинин депутаттары Винера Раимбачаева жана Айбек Маткеримов Бишкек шаардык перинаталдык борборго энелерге жана балдарга көрсөтүлүп жаткан медициналык кызматтардын сапаты менен таанышуу максатында барышты.

385 орундуу перинаталдык борбор кош бойлуулуктун патологиясы бар аялдарга адистештирилген жардам көрсөтүүчү экинчи даражадагы медициналык мекеме болуп саналат. 2024-жылдын 11 айында бул жерде 11 миңден ашык бала төрөлгөн. Неонаталдык эрте өлүмдөрдүн 22,4%дан 17,2%га чейин кыскарышы маанилүү жетишкендик болду.

Делегация жаңыланган бөлүмдөрдү, жаңы медициналык жабдууларды, анын ичинде жаңы төрөлгөн ымыркайлар үчүн реанимация системаларын, балдардын инкубаторлорун жана өпкөнү жасалма желдетүү аппараттарын карап чыгып, ошондой эле борбордо жүргүзүлүп жаткан оңдоо иштеринин жыйынтыктары менен таанышты.

Борбордун башкы дарыгери быйылкы жылы алар 18 миллион сомдук оңдоо иштерин жүргүзүшкөнүн, анын ичинен 7 миллион сому чоңдор үчүн реанимация бөлүмдөрүн оңдоого бөлүнгөнүн, мындан тышкары «Кыргызфармация» мамлекеттик ишканасы аркылуу 16 миллион сомго жабдыктар алынганын билдирди.

Саламаттык сактоо министринин орун басары Каарманбек Байдавлетов белгилегендей: «Бишкек шаардык перинаталдык борбору энелердин жана жаңы төрөлгөн балдардын ден соолугун чыңдоо үчүн каржылык каражаттарды натыйжалуу пайдалануунун үлгүсү болуп саналат. Заманбап технологиялар жана жаңыланган инфраструктура өлүмдү кыскартууга жана жогорку деңгээлдеги медициналык жардам көрсөтүүгө мүмкүндүк берет”.

Бүгүн, 2024-жылдын 19-декабрында, Кыргыз Республикасынын Саламаттык сактоо министри Алымкадыр Бейшеналиев Ош облусуна болгон жумушчу сапарынын алкагында Кара-Суу райондук үй-бүлөлүк медицина борборунун жаңы имаратынын курулушуна капсула салуу аземине катышты. 

Кыргыз Республикасынын Саламаттык сактоо министри Алымкадыр Бейшеналиев өз сөзүндө белгилегендей, Кыргыз Республикасынын Министрлер Кабинети жана Саламаттык сактоо министрлиги инфраструктураны жаңылоо жана зарыл болгон медициналык жабдууларды жана машиналарды сатып алуу аркылуу медициналык кызмат көрсөтүүнүн сапатын жогорулатуу боюнча иш алып барууда. «Жалпысынан өлкө боюнча 26 медициналык мекеме курулууда, анын 22си толугу менен республикалык бюджеттен каржыланат. Бул үчүн 900 миллион сом бөлүнгөн. Дагы 4 объект мамлекеттик-жеке өнөктөштүктүн алкагында курулууда. Кошумчалай кетсек, 2024-жылы 300 миллион сомдон ашык суммага 50дөн ашык жаңы фельдшердик-акушердик пункттар жана үй-бүлөлүк дарыгерлер борборлору курулган. Жакында Ысык-Көл облусунун Түп районунда Жалпы дарыгерлик практика борборунун жаңы имараты ачылды», - деп кошумчалады министр.

Долбоорго ылайык, борбор 0,64 га аянтты ээлейт жана жертөлөсү бар үч кабаттуу имарат болуп, жалпы аянты 3032,27 м² түзөт.

Объекттин сметалык баасы 210 миллион сомду түзүп, бюджеттин эсебинен каржыланат.

Жаңы ҮМБ калкка алгачкы медициналык жардамдын кеңири спектрин көрсөтөт. Бул үчүн борборду заманбап жабдыктар, анын ичинде томограф, рентген, УЗИ, фиброскан, ЭГД-скопия жана лабораториялар менен жабдуу пландалууда. Борбор күн сайын 250-300 бейтапты кабыл алып, Кара-Суу районунун 363 миң тургунун тейлей алат.

Эмдөө боюнча республикалык эмдөө комитетинин отуруму болуп, анда 2024-жылдын 9 айына карата эмдөө Программасына мониторинг жүргүзүү жана баалоо боюнча негизги маселелер каралды.

Жолугушуунун жүрүшүндө программанын учурдагы жыйынтыктары, анын ичинде эмдөө менен камтуу динамикасы, ошондой эле колдонулган вакциналардын натыйжалуулугу жана коопсуздугу талкууланды. Кызамык жана көк жөтөл сыяктуу бир катар жугуштуу оорулардын чыгышына алып келген эмдөө менен камтуунун төмөндөшүнө өзгөчө көңүл бурулду.

Профилактикалык эмдөөлөрдүн аз камтылышынын фонунда 2023-жылы башталган кызамык оорусу уланууда. Бул убакыттын ичинде эпидемияны ооздуктоо үчүн олуттуу чаралар көрүлдү. Кыргыз Республикасынын Министрлер Кабинетинин Төрагасынын жана Кыргыз Республикасынын Президентинин Администрациясынын Жетекчисинин протоколдук тапшырмаларына, ошондой эле Кыргыз Республикасынын Министрлер Кабинетинин Төрагасынын орун басарынын тапшырмаларына ылайык Республикада КР Президентинин облустардагы ыйгарым укуктуу өкүлдөрү жана саламаттыкты сактоо уюмдарынын жетекчилери менен квартал сайын жолугушууларда кызамык боюнча учурдагы кырдаал, кызамык боюнча өзгөчө аракеттер планын ишке ашыруу, эмдөө менен камтууну жакшыртуу жана эмдөөгө болгон суроо-талапты көтөрүү талкуулары өткөрүлгөн.

Кызамык оорусунун чыгышына жооп иретинде эмдөө кампаниясынын бир нече этаптары жана биргеликте иштөөнүн аркасында кызамык оорусу туруктуу түрдө кыскарды. Оң динамикасын сактоо жана туруктуу жамааттык иммунитетти түзүү, ошондой эле кызамык инфекциясынан жогорку тобокелдик топторун коргоо максатында жыйында кызамык жана көк жөтөл маселелери боюнча калк арасында коммуникацияны жана социалдык мобилизацияны күчөтүү, ошондой эле эмделбеген жана эмдөөнү толук албаган балдар арасында «тазалоочу» эмдөө жүргүзүү чечими кабыл алынды. 

Жыйындын жүрүшүндө кырдаалды жакшыртууга, профилактикалык эмдөөлөрдү камтууга жана эмдөөгө болгон суроо-талапты жогорулатууга багытталган чаралар да талкууланды. Атап айтканда, эмдөө менен камтууну жакшыртуу пландары жана калктын эмдөөнүн маанилүүлүгү жөнүндө маалымдуулугун жогорулатууга багытталган иш-чаралар каралды.

Жыйындын жыйынтыгында республикалык саламаттыкты сактоо уюмдарынын жетекчилерине, саламаттыкты сактоонун областтык координаторлоруна жана мамлекеттик санитардык-эпидемиологиялык көзөмөлдүн райондор аралык оорулардын алдын алуу борборлорунун башкы дарыгерлерине тиешелүү чаралар жана чечимдер кабыл алынды. Негизги көңүл пландуу эмдөө боюнча көзөмөлдү күчөтүүгө, «тазалоочу» эмдөөлөрдү кылдаттык менен жүргүзүүгө жана программанын алкагында эмделбеген жана эмдөөнү толук албаган балдарды аныктоого бурулат. 

Маалымат үчүн: 9 айдан 7 жашка чейинки 900 миңден ашык баланы камтыган эмдөө кампаниялары кызамык оорусун азайтууда олуттуу натыйжаларга алып келди. 

Улуттук госпиталда биринчи кохлеардык имплант коюу операциялары жасалды. Эки бейтапка ийгиликтүү операция жасалып, абалы туруктуу. Бул операциялар кулак, мурун жана тамак ооруларын дарылоо үчүн заманбап медициналык жабдууларды сатып алууну уюштурган Кыргыз Республикасынын Саламаттык сактоо министри Алымкадыр Бейшеналиевдин демилгесинин аркасында мүмкүн болду.

Операцияларды жүргүзүү жана ата мекендик адистердин квалификациясын жогорулатуу үчүн Кыргызстанга литвалык отоларинголог жана кохлеардык имплантация тармагындагы эксперт Гедриус ​​Гилис чакырылган. Ал кыргызстандык хирургдар менен биргелешкен операцияларды жасап, мастер-класс өткөрүп, жергиликтүү адистерге заманбап техникалар жаатында тажрыйбасы менен бөлүштү.

Улуттук госпиталдын ЛОР бөлүмүндө жогорку технологиялык операцияларды жүргүзүү үчүн угууну диагностикалоочу аудиометр, угуу функциясын өлчөө үчүн импеданстык аудиометри, Риноскопиялык комплекс, ЛОР микроскобу сатылып алынган. Сатып алуунун жалпы суммасы 15 миллион ашык сомду  түздү.

Жаңы жабдуулар кохлеардык имплант коюу операцияларын жасоо үчүн гана эмес, башка татаал ЛОР ооруларын дарылоодо да колдонулат. Ал эми мындай операциялар келечекте дагы өсө берет.

2024-жылдын 12-декабрында Кыргыз Республикасынын Саламаттык сактоо министри Алымкадыр Бейшеналиев шаардагы Режеп Тайып Эрдоган атындагы Бишкек мамлекеттик кыргыз-түрк достугу ооруканасына барды. Иш сапардын алкагында ал оорукананын жетекчилиги менен жумушчу кеңешме өткөрүп, анда мекеменин базасында органдарды трансплантациялоону уюштуруу жана аны өнүктүрүү пландары талкууланды.

Талкуунун негизги темасы 2024-жылдын 5-ноябрында Кыргыз Республикасы менен Түркиянын ортосунда кол коюлган Макулдашууну ишке ашыруу боюнча мындан аркы кадамдар болду. Бул Макулдашуу медицина тармагында, анын ичинде кадрларды даярдоо, техникалык жабдуу жана органдарды трансплантациялоо боюнча операцияларды уюштуруу боюнча кызматташтыкты тереңдетүүгө негиз түзөт.

Бүгүн, 2024-жылдын 12-декабрында Бишкек шаарында 200 орундуу жаңы төрөт үйүнүн курулушуна капсула салуу аземи болуп өттү.

Жалпы чыгымы 420 миллион сомду түзгөн 5 кабаттуу жаңы имарат толугу менен Садыр Жапаровдун колдоосу менен табылган инвесторлор тарабынан каржыланат.

1936-жылы курулган №1 төрөт үйү республикадагы алгачкылардан болуп саналат. Учурда репродуктивдүү курактагы аялдардын саны 83 миңден ашкан Бишкек шаарынын Свердлов районундагы аялдарды тейлейт. Андыктан, төрөттүн көбөйүп, шаардын кеңейип баратканын эске алуу менен жаңы заманбап төрөт үйүн куруу зарылдыгы келип чыккан.

«Жаңы төрөт үйү төрөт жана ара төрөлгөн ымыркайларды кароо үчүн шарттарды гана жакшыртпастан, медициналык кадрларды даярдоонун заманбап инфраструктурасын түзөт. Биз ар бир аялга жана балага ыңгайлуу, коопсуз жана сапаттуу медициналык кызмат көрсөтүүгө умтулабыз”, - деп баса белгиледи Кыргыз Республикасынын Саламаттык сактоо министри Алымкадыр Бейшеналиев.

Жаңы төрөт үйү заманбап операциялык бөлмөлөр, аялдар жана жаңы төрөлгөн ымыркайлар үчүн интенсивдүү терапия, төрөгөн аялдын жакындары үчүн күтүү жайлар, ошондой эле медицина кызматкерлерин окутуу үчүн симуляциялык кабинет менен жабдылат. Ал шаардын өсүп жаткан муктаждыктарын эске алуу менен курулуп, борбордогу кош бойлуу аялдарга жана жаңы төрөлгөн ымыркайларга медициналык жардам көрсөтүүнү жакшыртууга олуттуу кадам болот.

2024-жылдын 12-декабрында Кыргыз Республикасынын Саламаттык сактоо министри Алымкадыр Бейшеналиев Бишкек шаарындагы №1 шаардык клиникалык ооруканага барып, кезектеги «Эл Аман» мамлекеттик дарыканасынын ачылыш аземине катышты.

Бул Бишкек шаарындагы саламаттыкты сактоо уюмдарынын базасында ачылган 20-мамлекеттик дарыкана жана учурда республика боюнча жалпысынан 95 дарыкана иштеп жатат.

Министр Нарын жана Ысык-Көл облустарында дагы эки дарыкана иштей баштаганын белгиледи. Жылдын аягына чейин калкты жеткиликтүү баада дары-дармектер жана медициналык буюмдар менен камсыз кылуучу 100 «Эл Аман» мамлекеттик дарыкана ачуу пландалууда.

 Маалымат үчүн: «Эл Аман» мамлекеттик дарыканалар тармагы 30 чет элдик жана жергиликтүү өндүрүүчүлөр жана дары-дармектерди жана медициналык буюмдарды жеткирүүчүлөр менен кызматташат.

Дарыкана пункттарындагы ассортимент дарыкана пункттары жайгашкан саламаттык сактоо уюмунун өзгөчөлүгүнө, сатуунун деңгээлине жана саламаттыкты сактоо уюмдарына жараша 2500дөн ашык фармацевтикалык продукцияны түзөт. «Эл Аман» мамлекеттик дарыканаларында чекене баалар өлкөдөгү жеке дарыканаларга караганда орто эсеп менен 10-20% төмөн.

Ошондой эле Милдеттүү медициналык камсыздандыруу фондунун жеңилдетилген рецепттери менен дары-дармектер «Эл Аман» дарыканалары аркылуу рецептке жана бейтаптын оорусуна жараша 50%дан 100%га чейин арзандатуу менен элге сатылат.

Аймактар ​​боюнча бөлүштүрүлүшү: Бишкек – 20; Чүй облусу – 9; Ысык-Көл облусу – 7; Талас облусу – 5; Нарын облусу – 4; Ош шаары – 10; Ош облусу – 15; Жалал-Абад облусу – 18; Баткен облусу – 7.

🎄Жаңы жыл жакындап келе жатат, жаңы жылдык майрамдардын башталышы менен ар бир үй кожойкеси дасторконду үй шартында даярдалган ар кандай тамак-аш азыктары, деликатес, салаттар менен толтурганга аракет кылышат. Алар туура эмес сакталган учурда тамак-аштан ууланууга, ал эми кышкы консервалар тамак-аштан уулануунун эң кооптуусу «ботулизмди» пайда кылышы мүмкүн.

🎄Тамак-аштан уулануунун себеби жетишээрлик жуулбаган жашылча-жемиштер болушу мүмкүн, алардын тышында ар кандай ичеги инфекцияларынын козгогучтары болот, жаңы даярдалган жана консерваланган уулуу козу карындар, пестициддердин калдыктары бар мөмөлөр жана эң кеңири тараган микробдор - стафилококк, ичеги инфекцияларынын, энтерококктун, ботулизмдин козгогучтары  менен жабыркаган башка азыктар.

🎊Көптөгөн коомдук тамактануу жайларында (кафелерде, ресторандарда) жаңы жылдык корпоративдик кечелер, ар кандай майрамдар өткөрүлөт, мында мөмө-жемиштердин жана жашылчалардын көптүгү, ар кандай даяр деликатестер, кайнатылган эт, көп компоненттүү салаттар, анын ичинде катуу тыюу салынганына карабай үйдө жасалган консервалар да көп колдонулат.   Инфекциянын пайда болушуна алып келүүчү эң кооптуу тамак-аш азыктары болуп каймак кошулган кондитердик азыктар - торттор, кондитердик азыктар, фастфуд - шаурма, фарш - котлеттер, булочкалар, паштеттер, устукандар - кайнатылган эт, казы, карта, чучук ж.б. саналат.

☝️Эреже боюнча дасторкондор иш-чаралар башталардан 3-5 саат мурун коюлат, андан кийин даяр тамактар, кулинардык азыктар, салаттар дагы 5-8 саатка чейин дасторкондо калат. Салаттардын жана устукандардын калдыктары желим баштыктарга оролуп үйгө алып келинет, ылайыксыз шарттарда сакталат, кээде кайталап ысык температурада зыянсыздандырбастан аларды үй-бүлө мүчөлөрүнө тартууланат.

☝️Ошондуктан, ар бир адам тамак-аштан уулануу, анын ичинде ботулотоксин деген эмне экенин жана бул коркунучтуу оорудан кантип сактануу керектигин билүүсү өтө маанилүү, анткени көп учурда дарыгерлердин аракетине карабастан, өкүнүчтүү - оорулуунун өлүмү менен аяктайт!

#жаңыжыл #жаңыжыл2025🎄 #ботулизм

  Кыргызстанда 2024-жылы торчо челдин лазердик коагуляциясы биринчи жолу өздөштүрүлүп, ара төрөлгөн ретинопатиясы бар 14 ымыркайга жасалды. Мындай операцияга бейтаптарды тандоо үчүн бардык ара төрөлгөн ымыркайлар Кыргыз Республикасындагы заманбап жана жападан жалгыз аппарат – “Редкам” – ара төрөлгөндөрдүн ретинопатиясын диагностикалоочу ретиналдык камера аркылуу диагностикадан өтүшөт. КР Саламаттык сактоо министрлигинин, ЮНИСЕФтин жана Улуттук Кызыл Жарым Ай коомунун колдоосу менен Эне жана баланы коргоо улуттук борборунун окулисттери Алматы шаарында окуудан өтүштү.

  Буга чейин көптөгөн бейтаптар Казакстан менен Орусияга кетүүгө аргасыз болушкан.

2024-жыл ичинде Эне жана баланы коргоо улуттук борборунун трансплантология бөлүмүндө бюджеттик негизде 20 бөйрөк алмаштыруу операциясы жасалган, быйылкы жылдын аягына чейин дагы 2 операция жасалат. 2025-жылы бюджеттик негизде мындай 50 операцияны жүргүзүү пландалууда.

Мындай операциялар Эне жана баланы коргоо улуттук борборунун базасында кыргызстандык хирургдардын аракети менен 2018-жылдан бери ийгиликтүү жүргүзүлүп келет.  Жалпы 62 операция жасалып, анын 20сы 2024-жылы жасалды.

Дары-дармек жана медициналык багыттагы буюмдар менен камсыздоону «Кыргызфармация» мамлекеттик ишканасы ишке ашырат.

Бүгүн, 2024-жылдын 10-декабрында, Кыргыз Республикасынын Саламаттык сактоо министри Алымкадыр Бейшеналиев мамлекеттик менчикке өткөн Бишкек шаарындагы ЖЧК «Айданфарма» фармацевтикалык заводуна барып ишкананын ишмердүүлүгү менен таанышып чыкты.

Иш сапардын алкагында КР Саламаттык сактоо министри 95% концентрациядагы медициналык этил спиртин чыгарууну ишке киргизүү процесси менен таанышып, жаңы продукт өлкө боюнча саламаттыкты сактоо уюмдарынын муктаждыктары үчүн колдонулаарын айтты. «Кыргыз Республикасында дары-дармек рыногунда 90%дан ашыгын импорттук продукция ээлейт, ошол себептен дары-дармектерди жана медициналык буюмдардын өздүк өндүрүшүн өнүктүрүү Кыргыз Республикасы үчүн абдан маанилүү», - деп белгиледи Алымкадыр Бейшеналиев.

 Министр ошондой эле ички рыноктун керектөөлөрүн канааттандыруу үчүн заводду модернизациялоонун, продукциянын ассортиментин кеңейтүүнүн жана өндүрүш көлөмүн көбөйтүүнүн маанилүүлүгүн баса белгиледи. Продукциялардын ассортиментин кеңейтүү жана көлөмүн көбөйтүү ички рыноктун керектөөлөрүн канааттандырууга жана импортту алмаштыруу максатына жетишүүгө багытталган.

Заводдун директору Өмүрбек Асанов учурда дары-дармек жана медициналык техника департаментине 120 түрдөгү таблетка жана капсулалар, 20 түрдөгү майлар жана 10 түрдөгү сироп жана суспензиялар каттоого берилгенин, бул продукциянын линиясын кыйла кеңейтээрин билдирди.

Бүгүн, 2024-жылдын 10-декабрында, Кыргыз Республикасынын Саламаттык сактоо министри Алымкадыр Бейшеналиев Бириккен Улуттар Уюмунун Калкты жайгаштыруу фондунун (ЮНФПА) кеңсесинин башчысы Бактыбек Кайназаров менен жолугушту.

Жолугушууда тараптар үй-бүлөнү пландаштыруу, репродуктивдүү ден соолук жаатындагы медициналык мекемелерде кызмат көрсөтүүнүн сапатын жогорулатуу сыяктуу тармактарда биргелешкен өз ара аракеттенүү маселелерин талкуулашты.

ЮНФПА Кыргызстандын төрөт үйлөрүндө төрөттөн кийинки кан жоготууну алдын алуу жана дарылоо үчүн заманбап дары – карбетоциндин биринчи партиясын тапшырып жатканын Бактыбек Кайназаров белгиледи. Гуманитардык жардамдын алкагында төрөттөн кийинки кан жоготуунун алдын алуу үчүн 170 миң аялга жалпы суммасы 92 миң долларга 17 миң куту жеткирилди.

Кыргыз Республикасынын Саламаттык сактоо министри Алымкадыр Бейшеналиев Бириккен Улуттар Уюмунун Калкты жайгаштыруу фондуна өлкөнүн саламаттыкты сактоо тармагына колдоо көрсөткөндүгү үчүн ыраазычылык билдирди. «Бул дары төрөттөн кийинки кыйынчылыктардын тобокелин кыйла азайтып, энелердин өмүрүн сактап кала алат. Окситоцинден айырмаланып, ал муздак чынжырды талап кылбайт жана бир жолу сайылганда натыйжа көрсөтөт. Биз өзгөчө алыскы аймактарда энелердин өмүрүн сактап калууга жана коопсуз төрөттү камсыздоого жардам берген ЮНФПАга терең ыраазычылык билдиребиз».

Карбетоцинди өлкөнүн төрөт үйлөрүнө өткөрүп берүү КР Саламаттык сактоо министрлигинин жана Министрлер Кабинетинин аракеттеринин аркасында мүмкүн болду, алар БУУнун эл аралык каталогдору аркылуу дары-дармектерди өндүрүүчүнүн баасында сатып алууга шарттарды түзүштү.

Карбетоцин жакында клиникалык практикага киргизилет, бул энелердин өлүмүн кыскартууга жана бүткүл республика боюнча энелердин жана аялдардын репродуктивдүү ден соолугун чыңдоого маанилүү салым болот.

 Оперативдүү маалыматтар боюнча 2024-жылдын 49-жумасында (02.12-08.12.24-ж.) өткөн жумага (48-жума) салыштырмалуу республика боюнча 7335 КРВИ жана 1 сасык тумоо учуру катталган (и.к. 103,3), мурунку жумага салыштырмалуу (48-жумада и.к.  99,5) 3,8%га жогору. Бардык оорулардын 70,1%ы 14 жашка чейинки балдар (5140 учур).

 Республикалык көрсөткүчтөн жогору (и.к.103,3) Бишкек (254,1), Ош (164,8) шаарларында жана Ысык-Көл (124,5), Талас (131,1) облустарында катталып, ага ылайык республикалык көрсөткүчтөн 2,4 эсеге, 1,6 эсеге көп жана 20,5%га, 26,9%га жогору.

 Бишкек, Ош жана Токмок шаарларында курч респиратордук вирустук инфекцияларга жана сасык тумоого окшош ооруларга эпидкөзөмөл жүргүзүү улантылууда.

Октябрь айынан бери (2024-жылдын 40-жумасынан 2024-жылдын 49-жумасына чейин) 809 үлгү чогултулган, анын ичинен 19у оң жыйынтык берген, анын ичинде COVID-19 – 15 учур жана 4 сасык тумоо учуру: грипп А (H1N1pdm) – 2 учур жана грипп В – 2 учур.

 Ошондой эле курч респиратордук вирустук инфекциялардын циркуляциясы байкалууда, анда РС вирусу басымдуулук кылууда– 28,8% (174), риновирус – 26,3% (159), I-IV парагрипп – 13,9% (84), аденовирус – 12,7 % (77), башкалар – 18,3% (111).

Республикада COVID-19 илдети боюнча жумалык мониторинг уланууда. 49-жума ичинде Ош шаарында СOVID-19 инфекциясынын 1 учуру катталды.

Республика боюнча сасык тумоо, ОРВИ жана COVID-19 оорусуна мониторинг жүргүзүү улантылууда, эпидемиологиялык абал көзөмөлдө.

Маалымат үчүн:

Абанын температурасынын төмөндөшү адамдын ден соолугуна терс таасирин тийгизип, иммундук системага таасир этип, организмдин коргонуу күчүн төмөндөтүшү менен адамдар түрдүү респиратордук вирустук инфекцияларга кабылышы мүмкүн.

 Ошондуктан, КРВИ жана сасык тумоо сыяктуу респиратордук вирустук инфекциялардын алдын алуу үчүн сиз жөнөкөй эрежелерди сакташыңыз керек, мисалы:

 - беткап кийүү режимин жана социалдык аралыкты сактоо;

 - дем алуу органдарынын гигиенасын сактоо - жөтөлгөндө оозду жана мурунду жүз аарчы менен жабуу;

- үшүп калуудан жана ысып кетүүдөн сактануу;

 -жогорку температура жана башка сасык тумоого окшош белгилер пайда болуп, өзүн начар сезген адамдарды өз убагында изоляциялоо;

- санитардык-гигиеналык чараларды сактоо (кол гигиенасы, үзгүлтүксүз жайларды желдетүү, нымдуу тазалоо ж.б.).

 Эгерде сиздин балаңызда КРВИнин белгилери пайда болсо, үй-бүлөлүк дарыгериңизге кайрылыңыз.

 Көз карандысыз Мамлекеттер Шериктештигине мүчө-мамлекеттердин саламаттыкты сактоо боюнча кызматташуу кеңешинин 37-жыйынына катышкан Кыргыз Республикасынын делегациясынын иш сапарынын алкагында Кыргыз Республикасынын Саламаттык сактоо министри Алымкадыр Бейшеналиев жана аны коштоп жүргөн адистер неврологиялык, эндокринологиялык жана офтальмологиялык ооруларды дарылоо үчүн дары-дармектерди чыгарган Россиянын алдыңкы фармацевтикалык заводдорунун бири «Герофарм» заводуна барышты. 

Ишкананы кыдыруу конокторго заманбап өндүрүш жайлар, жогорку сапат стандарттары жана өндүрүш процессинде ишке ашырылган инновациялык чечимдер менен таанышууга мүмкүндүк берди. Заводдун өкүлдөрү бардык этаптарда — дары-дармектерди иштеп чыгуудан баштап, аларды массалык түрдө чыгарууга чейин колдонулуп жаткан технологиялар жөнүндө кеңири айтып беришти.

Жолугушууда Алымкадыр Бейшеналиев белгилегендей, быйыл «Кыргызфармация» мамлекеттик ишканасы аркылуу Кыргызстан кант диабети менен ооруган бейтаптар үчүн инсулиндин эки түрүн алып келүү боюнча келишимге кол койгон. Министр калкты сапаттуу дары-дармек менен камсыз кылуу үчүн мамлекеттер ортосундагы фармацевтикалык кызматташтыкты өнүктүрүүнүн маанилүүлүгүн белгиледи.

Ошондой эле иш сапардын жүрүшүндө Россиядагы социалдык маанилүү дары-дармектерди чыгаруучу ири компаниялардын бири болгон PHARMASINTEZ жана фармацевтикадагы биотехнологиялык инновациялардын алдыңкы иштеп чыгуучусу BIOCAD жана башка компаниялардын фармацевтикалык жетишкендиктери көрсөтүлдү.

Санкт-Петербург шаарында 2024-жылдын 6-7-декабрында өтүп жаткан КМШнын саламаттыкты сактоо жаатында кызматташуу боюнча Кенешинин XXXVII отурумуна Кыргыз Республикасынын атынан Алымкадыр Бейшеналиев жетектеген делегация катышууда.

Иш сапардын алкагында Кыргыз Республикасынын Саламаттык сактоо министри жумушчу жолугушууларды жана Россия Федерациясынын алдыңкы федералдык медициналык борборлоруна жана институттарына таанышуу экскурсиясын жасады.

Делегация Россиянын Саламаттык сактоо министрлигине караштуу ФМБМ "Р.Р. Вреден атындагы травматология жана ортопедия Улуттук медициналык изилдөө борборуна" барып травматология жана ортопедия жаатындагы алдынкы дарылоо жана калыбына келтирүү ыкмалары менен таанышты. Кыймыл жана таяныч тутумдун функцияларын калыбына келтирүү үчүн инновациялык технологияларды колдонууга өзгөчө көңүл бурулду.

Андан кийин министр Россиянын Саламаттык сактоо министрлигине караштуу ФМБМ " Н.Н. Петров атындагы онкология боюнча Улуттук медициналык изилдөө борборуна" барып, борбордун жетекчилиги менен онкология жаатындагы эки тараптуу кызматташуунун келечегин талкуулады. Анда тажрыйба алмашуу, биргелешкен изилдөөлөрдү жүргүзүү жана кадрларды даярдоо үчүн Кыргызстандын Онкология жана гематология борбору менен ФМБМ " Н.Н. Петров атындагы онкология боюнча Улуттук медициналык изилдөө борборунун" өз ара аракеттенүүсү жөнүндө Меморандумга кол коюу мүмкүнчүлүгү каралды.

Россиянын Саламаттык сактоо министрлигине караштуу ФМБМ " Г.И. Турнера атындагы балдар травматологиясы жана ортопедисы боюнча Улуттук медициналык изилдөө борборунда" балдардагы татаал жаракатты аныктоо жана дарылоонун уникалдуу мамилелери көрсөтүлдү. Кыргыз делегациясы балдар ортопедиясы жаатындагы тажрыйбаны алуунун жана балдар үчүн адистештирилген жардамды өнүктүрүүнүн маанилүүлүгүн белгиледи.

Министр Алымкадыр Бейшеналиев Россия Федерациясынын медициналык борборлору менен кызматташууну чыңдоо Кыргызстанга саламаттыкты сактоону өнүктүрүү үчүн стратегиялык мааниге ээ экендигин баса белгиледи.

Санкт-Петербург шаарында 2024-жылдын 6-7-декабрында өтүп жаткан КМШнын саламаттыкты сактоо жаатында кызматташуу Кенешинин XXXVII отурумуна Кыргыз Республикасынын атынан Алымкадыр Бейшеналиев жетектеген делегация катышууда.

Көз карандысыз Мамлекеттердин Шериктештигинин саламаттыкты сактоо жаатында кызматташуу Кенешинин XXXVII отурумунун пленардык отурумунда Кыргыз Республикасынын Саламаттык сактоо министри Алымкадыр Бейшеналиев Кыргызстандын саламаттыкты сактоо жаатындагы жетишкендиктери жана артыкчылыктуу милдеттери жөнүндө баяндама жасады.

Отурумдун катышуучуларына сөз сүйлөп жатып, министр орусия тарапка жана уюштуруучуларга иш-чараны жогорку деңгээлде өткөргөндүгү үчүн ыраазычылык билдирип, КМШ өлкөлөрүнүн ортосундагы кызматташтыкты өнүктүрүүдө Кеңештин ишмердүүлүгүнүн маанилүүлүгүн баса белгиледи.

Өз сөзүндө Алымкадыр Бейшеналиев Кыргызстандын оорулардын алдын алуу жана активдүү узак жашоону колдоо боюнча чараларды күчөтүү сыяктуу саламаттыкты сактоо тармагындагы негизги жетишкендиктерин белгиледи. Санариптик технологияларды киргизүү жана медициналык жардам көрсөтүү стандарттарын иштеп чыгуу. Жасалма интеллект жана саламаттыкты сактоону маалыматташтыруу жаатындагы эл аралык кызматташтык.

Министр ошондой эле “СТИМУЛ” жаш саламаттык сактоо уюштуруучу лидерлеринин эл аралык мектеби жана “Дени сак коом-2024” форуму сыяктуу демилгелердин алкагында кыргызстандык адистердин топтогон тажрыйбасына көңүл бурду.

«КМШ өлкөлөрүнүн биргелешкен аракеттери, тажрыйба алмашуу жана алдыңкы тажрыйбаны колдонуу учурдун чакырыктарына натыйжалуу жооп берүүгө жана биздин саламаттыкты сактоо системаларыбыздын туруктуулугун бекемдөөгө мүмкүндүк берет», - деп баса белгиледи министр.

Отурумдун жыйынтыгында КМШ өлкөлөрүнүн саламаттыкты сактоо тармагында өз ара аракеттенүүсүн мындан ары өнүктүрүүгө жана медициналык жардамдын сапатын жана жеткиликтүүлүгүн жогорулатууга негиз боло турган биргелешкен долбоорлорду ишке ашырууга багытталган чечимдер кабыл алынары күтүлүүдө.

Бүгүн, 2024-жылдын 4-декабрында, Кыргыз Республикасынын Саламаттык сактоо министри Алымкадыр Бейшеналиев иш сапары менен Чүй облусунун Ысык-Ата районундагы Новопокровка айылына барды. Иш сапарынын жүрүшүндө ал мурда жеке адамдар тарабынан менчиктештирилип, бирок жакында мамлекеттин менчигине кайтарылган мурдагы оорукананын имаратынын абалы менен таанышты.

Административдик-аймактык реформанын алкагында Чүй төрөт үйүнүн имараты Бишкек шаарынын карамагына өтүп, Чүй облусунда тобокелдик тобуна кирген аялдарга акушердик жардам көрсөтүү үчүн Чүй облусунун аймагында жаңы медициналык мекемени уюштуруу зарылчылыгы келип чыккан. Министр кайтарылган имараттын базасында 100 орундуу заманбап Чүй облустук төрөт үйүн түзүү боюнча иштерди баштоону тапшырды.

Саламаттык сактоо министри облустун координатору Алмаз Назарбековго имаратты капиталдык оңдоого кеткен чыгымдарды эсептеп, керектүү медициналык жабдуулардын тизмесин түзүп, Саламаттык сактоо министрлигине долбоорду каржылоону камсыздоо боюнча сунуштарды даярдоону тапшырды.