Ден соолук жаңылыктары

Акыркы жанылыктар

10

07

2024

Боору трансплантацияланган бейтаптар канааттандырарлык абалда үйүнө чыгарылды

08.07.2024

КР Саламаттыкты сактоо министрлиги кореялык H-Robotics компаниясынан реабилитациялык жабдууларды алат

05.07.2024

Саламаттыкты сактоо уюмдарына 10 автоунаа жана 200гө жакын компьютер жана ноутбуктар тапшырылды

22.05.2024
Кыргыз Республикасынын Саламаттык сактоо министрлиги менен Индиянын «Кендрия Бхандар» компаниясы медициналык буюмдар жана жабдуулар тармагында кызматташуу боюнча Меморандумга кол коюшту

2024-жылдын 22-майында Кыргыз Республикасынын Саламаттык сактоо министрлигинде Кыргыз Республикасынын Саламаттык сактоо министри Алымкадыр Бейшеналиев менен Индиянын «Кендрия Бхандар» фармацевтикалык компаниясынын башкы директору Мукеш Кучер мырзанын ортосунда видеоконференция байланышы болуп өттү.

Ошондой эле видеоконференциянын жүрүшүндө медициналык багыттагы буюмдар жана медициналык жабдуулардын материалдары менен камсыздоо жаатында кызматташуу жөнүндө Меморандумга кол коюлду.

Жыйындын жүрүшүндө КР Саламаттык сактоо министри Алымкадыр Бейшеналиев өз өлкөсүн дары-дармек жана медициналык жабдуулар менен камсыз кылууда «Кендрия Бхандар» компаниясынын чоң ийгиликтерин баса белгиледи.

Ошону менен бирге ал 290дон ашык саламаттык сактоо уюмдарын дары-дармек жана медициналык буюмдар менен камсыз кылуучу «Кыргызфармация» мамлекеттик ишканасынын ишмердүүлүгү менен тааныштырды жана Меморандумга ылайык, «Кендрия Бхандар» компаниясын алдыдагы кызматташууда министрликтин жетекчилиги Кыргызстанды жогорку сапаттагы дары-дармек жана медициналык буюмдар менен камсыз кылуу боюнча узак мөөнөттүү өнөктөш катары көрөт.

22.05.2024
Президент Садыр Жапаров: Кыргызстанда дарыгерлер үчүн кошумча дем берүү программанын алкагында врачтардын саны көбөйтүлөт

1-июлдан тарта алыскы райондордогу, кичи шаарлардагы жана айыл жерлериндеги саламаттыкты сактоо мекемелеринде иштеген дарыгерлер үчүн кошумча дем берүү программанын алкагында, дарыгерлердин санын 200дөн 500гө чейин көбөйтүлөт. Бул тууралуу Президент Садыр Жапаров бүгүн, 22-майда, Социалдык мобилизациялоо боюнча жалпы республикалык кеңешмеде сөз сүйлөп жатып, билдирди.

Ал ошондой эле врачтын депозитинин кварталдык суммасы 38 миң сомдон 66 миң сомго чейин жогорулатыларын айтты.  

“Бишкек жана Ош шаарларынан башка республиканын аймактарында дарыгерлердин жетишсиздигин эске алуу менен чукул чара катары педиатрларга, неонатологдорго, хирургдарга, анестезиологдорго жана реаниматологдорго 20 миң сом өлчөмүндө кошумча айлык төлөм киргизүүнү да тапшырдым. Бүгүнкү күндө бизде жаш дарыгерлер жетишсиз. Алыскы же бийик тоолуу аймактарда эле эмес, керек болсо, облустук борборлордо да жаш медиктер жокко эсе экенин көрүп жатабыз. Андыктан практикадан өтүп жаткан клиникалык ординаторлорду жана интернатурадагы дарыгерлерди тартуу жана аларга стимул берүү үчүн 20 миң сомдон атайын төлөмдөрдү киргизүүнү милдеттендирдим”, - деп, Мамлекет башчысы Президенттик Администрация бүгүнкү күндө медициналык тейлөө тармагында гана эмес, башка тармактарда да орто жана узак мөөнөттүү кадамдарды караштырып жатканын кошумчалады.  

“Эң негизгиси биз биргелешип аракет кылсак, мамлекетибиз жылдан-жылга социалдык милдеттенмелерин аткарууга мүмкүнчүлүктөрүн арттыра берет”, - деп белгиледи Президент Садыр Жапаров. 

22.05.2024
Президент Садыр Жапаров Эне жана баланы коргоо улуттук борборунун жаңы көп тармактуу корпусунун курулушун баштоо үчүн “мезгил кутусун” салды

Кыргыз Республикасынын Президенти Садыр Жапаров бүгүн, 22-майда, Эне жана баланы коргоо улуттук борборунун аймагына көп тармактуу корпустун курулушун баштоо үчүн “мезгил кутусун” салды.  

Долбоорго ылайык, оорукана 350 орунга эсептелген, анда: изоляторлору бар кабыл алуу бөлүмү, гемопоэтикалык өзөк клеткаларын трансплантациялоо бөлүмү, онкология жана онкогематология үчүн реанимация бөлүмү, паллиативдик терапия бөлүмү, травматология, ортопедия жана микрохирургия, боорду трансплантациялоо менен гастроэнтерология бөлүмү, адистештирилген жардам бөлүмү ж. б. бар. 

Мамлекет башчысы өз сөзүндө туура он күндөн кийин Балдарды коргоонун эл аралык күнү белгиленерин айтты. Мамлекет балдарга кубаныч тартуулап, аларга ар тараптан кам көрүүнү убадалайт.  

Чогулгандарга кайрылып, Садыр Жапаров бүгүн ошол өлкө келечеги болгон балдарыбыз менен алардын энелерине кам көрүүгө багытталган жакшы саамалыкка күбө болгондорун белгилеп өттү.  

“Эне жана баланы коргоо улуттук борборунун аймагына көп тармактуу оорукананын пайдубалын түптөгөнү жатабыз. Өлкө калкынын жалпы санынын үчтөн бир бөлүгүн балдар түзөөрү белгилүү. Мына ошол балдарыбыздын саламаттыгына кам көрүү – мамлекеттин түздөн-түз милдети. Балдарыбыздын ден соолугуна көңүл буруп, алардын бир катар ооруларына байланыштуу педиатрия багытындагы жаңы бөлүмдөрдү уюштуруу жана көп тармактуу балдар ооруканасын куруу бүгүнкү күндүн талабына айланды.  Айрыкча, бул багытта талбай иштеп келаткан Эне жана баланы коргоо улуттук борбору клиникалык жана дарт аныктоо мүмкүнчүлүктөрүн арттыруу максатында бөйрөк жана боор трансплантациясы, тубаса угуу майыптыгы үчүн кохлеардык имплантация, ретинопатия, лейкоз менен ооруган балдардын чучугун трансплантациялоо үчүн жаңы заманбап имаратка муктаж болуп келет”, - деп Президент баса белгиледи.  

Ошондой эле саламаттык сактоо министрлигине караштуу Эне жана баланы коргоо улуттук борбору илимий мекеме болуп саналганы менен аялдар менен балдардын ооруп калышын, өлүмүн жана майыптыгын кыскартууга багытталган мамлекеттик саясатты ишке ашыруу менен да алектенерин Мамлекет башчысы айта кетти. Бул борбор бала менен эненин ден соолугун коргоо, акушердик жана гинекология, педиатрия жана балдар хирургиясы боюнча саламаттыкты сактоо органдарына уюштуруу-методикалык жактан жардам берет. 

Садыр Жапаров Саламаттыкты сактоо тармагында эне менен баланын ден соолугуна кам көрүү үчүн жаңы көп тармактуу балдар ооруканасын куруу маселеси өтө маанилүү болуп келгенин баса белгиледи.   

Бул жагынан алып караганда, бүгүнкү пайдубалы түптөлүп жаткан 350 орундуу оорукана практикалык гана эмес, илимий борбор катары да кызмат көрсөтмөкчү. Ооруканада ар бири 30-35 керебетке эсептелген 10 клиникалык жана аларды тейлеген 7 параклиникалык түзүмдөр жайгашат. 


Президент эмки жылдын экинчи жарымында ден соолугунда маселе жаралган балдар менен энелерди кабыл алып, тиешелүү дарылоо иштерин баштайт деген ишенимин билдирди.  

Сөзүнүн аягында Мамлекет башчысы балдарыбыз оорубасын, ар кандай дарт-кеселден алыс болсун, деп тилек кылды.  

Ошол эле жерден ал медициналык мекеменин жамааты менен баарлашты. Анын жүрүшүндө кадрлардын жетишсиздиги, турак-жай менен камсыз кылуу ж. б. маселелер талкууланды. 

Президент Садыр Жапаров турак-жай саясатындагы маанилүү өзгөрүүлөр жана өлкөдө жүргүзүлүп жаткан реформалар тууралуу айтып, бул багыттагы иштер улантыларын белгиледи.

21.05.2024
Кан басымын көзөмөлдөө олуттуу жүрөк-кан тамыр ооруларын алдын алууга жардам берет

Бүгүн, 2024-жылдын 21-майында Бишкек шаарында Бүткүл дүйнөлүк артериялык гипертонияга каршы күрөшүү күнүн белгилөөнүн алкагында Саламаттык сактоо министрлигинин, Бүткүл дүйнөлүк саламаттыкты сактоо уюмунун, Кыргызстандагы ЖЭО долбоорунун өкүлдөрүнүн жана массалык маалымат каражаттарынын өкүлдөрүнүн катышуусунда Кыргызстандагы артериялык гипертониянын көйгөйлөрүн, анын алдын алуу жолдорун калк арасында жайылтууда биргелешкен иш-аракеттердин маанилүүлүгүн талкуулаган жолугушуу болуп өттү.

 

Бүткүл дүйнөлүк артериялык гипертонияга каршы күрөшүү күнү 2005-жылдан тарта Бүткүл дүйнөлүк  антигипертензиялык лига жана Эл аралык гипертония коомунун демилгеси астында жыл сайын 17-майда белгиленет.

Саламаттыкты сактоо министрлигинин медициналык жардамды уюштуруу жана дары саясаты бөлүмүнүн башчысы Нургүл Ибраева өз сөзүндө белгилегендей, артериялык гипертонияны “унчукпаган киши өлтүргүч” деп аташат, анткени бул оору симптомдорсуз өтөт жана өмүр үчүн маанилүү органдарды жабыркатат. Ошондуктан көпчүлүк гипертониктер ал гана эмес аларда кан басымынын жогору экендигинен шектенишпейт. 

“Жыл сайын кан басымды көзөмөлдөө менен медициналык текшерүүдөн өтүү, ошондой эле кан басымды үй шарттарды өз алдынча өлчөө маанилүү. Гипертонияны өз учурунда аныктоо олуттуу татаалдашуулардын өнүгүүсүн алдын алууга мүмкүнчүлүк берет.

Жогорку артериялык кан басым жаш өткөн сайын жогорулашы мүмкүн, бирок гипетониянын өнүгүүсүнө ошондой эле түзөтүүгө боло турган тобокелчилик факторлору, анын ичинде тузду көп өлчөмдө пайдалануу,  физикалык активдүүлүктүн жетишсиздиги жана ар кандай тамеки заттарын чегүү, алкоголь ичүү өбөлгө түзүшү мүмкүн.

Артериялык кан басымдын алдын алууга жашоодогу адаттарды өзгөртүү, анын ичинде тамак-аш рационун өзгөртүү, тамекиден баш тартуу жана активдүү жашоо мүнөзүн алып жүрүү жардам берет. 

Биз аракеттерибизди бириктирүү менен гана гипертонияга каршы күрөштө орчундуу прогресске жетишип жана калктын ден соолугун анын кооптуу кесепеттеринен коргой алабыз. Бүгүнкү иш-чара - ушул жолдогу маанилүү кадам”, - деп жыйынтыктады сөзүн Нургуль Ибраева. 

 

 

Жүрөк-кан тамыр оорулары алдын алууга боло турган ооруга чалдыгуулардын, мезгилсиз өлүмдөрдүн жана калктын эмгекке жарамсыздыгынын негизги себеби болуп саналат. Электрондук саламаттык сактоо борборунун маалыматтары боюнча калктын өлүм көрсөткүчүнүн себептеринин структурасында кан айлануу системасынын оорулары биринчи орунду ээлейт жана 52,1%ды түзөт. Жүрөк-кан тамыр ооруларынын структурасында өзгөчө орунда  артериялык гипертензия турат, анын үлүшүнө цереброваскулярдык оорулардын 62%ы жана жүрөктүн коронардык оорусу жана өнөкөт бөйрөк ооруларынын 49%ы туура келет. Бул ооруга чалдыгуулардын жалпы структурасына аябагандай чоң салым кошот жана калктын, анын ичинде эмгекке жарамдуу калктын майып болуусунун негизги себеби болуп саналат. 

Акыркы он жылдыкта артериялык гипертониянын жайылуусу жогорулады жана эпидемиологиялык изилдөөлөрдүн маалыматтары боюнча 44-46%ды түзөт. 

 

 

 

 

 

 

 

 

 

 

21.05.2024
КР Саламаттык сактоо министри менен Палестина мамлекетинин Элчиси саламаттык сактоо тармагындагы кызматташууну талкуулашты

 Бүгүн, 2024-жылдын 21-майында, Кыргыз Республикасынын Саламаттык сактоо министрлигинде Кыргыз Республикасынын Саламаттык сактоо министри Алымкадыр Бейшеналиев менен Палестинанын Кыргыз Республикасындагы Атайын жана Ыйгарым укуктуу Элчиси Джавад Авад мырзанын жолугушуусу болуп өттү.

Жолугушууда тараптар кызматташуу жана былтыр кол коюлган Кызматташуу меморандумун ишке ашыруу маселелерин талкуулашты. Палестина тарап өз өлкөсүндөгү саламаттык сактоо системасындагы абал, саламаттык сактоо жана фармацевтика тармагындагы кызматташуунун келечеги тууралуу маалымат берди.

«Бүгүнкү жолугушуубуз өлкөлөрүбүздүн ортосундагы өз ара пайдалуу жана узак мөөнөттүү кызматташтыкты мындан ары өнүктүрүүнүн башталышы болот деген ишенимди билдиргим келет.

Биз силердин жеке фармацевтикалык өндүрүшүңөр жаатында кызматташууга кызыкдарбыз, анткени биздин өлкө учурда бул жаатта импортко көз каранды. Бул маселени чечүү үчүн атайын ведомстволук уюм – «Кыргызфармация» мамлекеттик ишканасы түзүлдү, анын максаты өлкөнүн калкынын жана саламаттык сактоо системасынын дары-дармектерге жана медициналык буюмдарга болгон керектөөлөрүн түз өндүрүүчүлөрдүн баасында жабуу болуп саналат.

Буга байланыштуу сиздерден жардам күтөбүз жана кызматташууга толук даяр экенибизди билдиребиз”,-деди Кыргыз Республикасынын Саламаттык сактоо министри Алымкадыр Бейшеналиев.

 Жолугушуунун жыйынтыгында тараптар бекем байланыштарды түзүү жана Палестинанын саламаттык сактоо системасы менен жакындан таанышуу үчүн Палестинага иш сапар менен баруунун үстүндө иштөөнү макулдашты.

 Эскерте кетсек, өткөн жылы эки өлкөнүн Саламаттык сактоо министрликтеринин ортосунда эпидемиология, коомдук саламаттыкты сактоо, тамак-аш коопсуздугу, хирургия, нейрохирургия, кан тамырлар, хирургия, анестезиология, пластикалык / күйүк хирургиясы, медайымдык иш жана фельдшерлер, саламаттыкты сактоону башкаруу; жугуштуу жана жугуштуу эмес оорулардын алдын алуу жана контролдоо, фармацевтикалык өнөр жай жана дары-дармектердин маркетинги сыяктуу тармактарда кызматташууну караган саламаттык сактоо тармагындагы өз ара түшүнүшүү жана кызматташтык жөнүндө меморандумга кол коюлган.

21.05.2024
КР Саламаттык сактоо министри Алымкадыр Бейшеналиев КММАнын чет элдик студенттери менен жолугушту

2024-жылдын 20-майында Кыргыз Республикасынын Саламаттык сактоо министри Алымкадыр Бейшеналиев Кыргыз мамлекеттик медициналык академиясынын чет өлкөлүк студенттери менен жолугушуу өткөрдү. Бул жолугушууда аларды окутуу, коопсуздук жана ден соолукту чыңдоо боюнча актуалдуу маселелер талкууланды.

Министр өлкө өкмөтү бардык жарандардын, анын ичинде чет элдик студенттердин коопсуздугун камсыз кылуу үчүн бардык зарыл чараларды көрүп жатканын жана аларга сапаттуу медициналык жардам алууга кепилдик берерин баса белгиледи.

Алымкадыр Бейшеналиев студенттерди кырдаал көзөмөлдө экенине, алардын ден соолугуна жана коопсуздугуна коркунуч жок экенине ишендирди. Ал ошондой эле чет элдик студенттердин Кыргызстанда билим алуу процессин улантуунун маанилүүлүгүн баса белгилеп, медициналык билим берүү тармагында жалпы максаттарга жетүү үчүн ЖОЖдор менен студенттердин кызматташуусуна ишеним билдирди.

Өз кезегинде чет элдик студенттер министрге жолугушууну өткөрүп, алардын коопсуздугу жана ден соолугуна кепилдик бергени үчүн ыраазычылык билдиришти.

19.05.2024
19-май - Бүткүл дүйнөлүк үй-бүлөлүк дарыгерлер күнү

Ар жылы 19-майда Бүткүл дүйнөлүк үй-бүлөлүк дарыгерлер күнү белгиленет.

 

Бул күнү биз үй-бүлөлүк дарыгерлердин күжүрмөн эмгегине жана бүткүл дүйнөдөгү саламаттыкты сактоо системасындагы ролуна таазим этебиз. Дүйнөлүк статистикага ылайык, бүгүнкү күндө өнүккөн өлкөлөрдө ден-соолукка байланыштуу бардык көйгөйлөрдүн 80% га чейин үй-бүлөлүк дарыгерге кайрылуу стадиясында чечилет: ал биринчилерден болуп бейтаптын даттанууларын угуп, кайсы адиске кайрылуу керектигин чечет.

Сиздин эмгегиңиз улуттун саламаттыгына маанилүү салым кошууда. Анткени, үй-бүлөлүк дарыгердин кесиби асыл жана маанилүү, татаал жана жоопкерчиликтүү, чечим кабыл алуу жөндөмүн, өзүн өзү өркүндөтүүгө жана жаңы технологияларды өнүктүрүүгө умтулууну – адам өмүрү көз каранды болгон сапаттарды талап кылат.

Оорулуулардын жыргалчылыгы үчүн жан аябас эмгегиңиз үчүн рахмат. Сиздин жогорку кесипкөйлүгүңүз, сезимтал жүрөгүңүз жана алтын колдоруңуз ар дайым бейтаптарыңыздын ыраазычылыгына жана сүйүүсүнө бөлөнсүн!

Сиздерге ден соолук, келечекке ишеним, бакубатчылык жана медицинада жаңы ийгиликтерди каалайбыз!

20.05.2024
Саламаттык сактоо министри медициналык ЖОЖдордун ректорлору менен чет элдик студенттердин коопсуздугу жана ден соолугуна байланыштуу маселелерди талкуулады

Бүгүн, 2024-жылдын 20-майында, Кыргыз Республикасынын Саламаттык сактоо министри Алымкадыр Бейшеналиев Кыргызстандын медициналык жогорку окуу жайларынын ректорлору менен жолугушту.

Жолугушууда Кыргызстандагы ЖОЖдордогу чет элдик студенттердин коопсуздугу, ден соолук жана билим алуу маселелери талкууланды.

Министр чет элдик студенттерди Кыргызстанда билим алууга тартуунун маанилүүлүгүн белгилеп, муну эл аралык билим берүү байланыштарын жана маданий алмашууну өнүктүрүү контекстинде негиздеди. Ал студенттер менен түшүндүрүү иштерин жүргүзүүнү суранып, кырдаал бардык тиешелүү органдардын көзөмөлүндө экенине ишендирди. Ал ошондой эле ректорлорду ЖОЖдордун университеттик клиникаларында жаткан чет элдик жарандарга дарыланууга ар тараптуу жардам көрсөтүүгө чакырды.

Медициналык жогорку окуу жайлардын ректорлору студенттерге сапаттуу медициналык жардамдын жеткиликтүүлүгүн камсыздоо жана дарылоого кеткен чыгымдарды толук жабууга кепилдик берүү боюнча алар менен түшүндүрүү иштерин өткөрүүгө даяр экендиктерин билдиришти.

Бул жолугушуу окуу жайлар менен эл аралык студенттердин ортосундагы ишенимди бекемдөөгө, ошондой эле университет чөйрөсүндөгү медициналык тейлөө стандарттарын жакшыртууга багытталган.

 

Маалымат үчүн: Азыркы учурда 5 чет элдик жаран стационардык дарылануудан өтүүдө. Тез жардам ооруканасында - 2, Улуттук госпиталда - 1, Аманат клиникасында – 2. Жабырлануучулардын абалы туруктуу. 

8 бейтап Эл аралык медициналык универститетинин клиникасынан канааттандырарлык абалда амбулатордук дарыланууга жөнөтүлдү.

18.05.2024
Бишкекте жүрөк-кан тамыр оорулары боюнча VII эл аралык илимий-практикалык конференция өтүүдө

Бүгүн, 2024-жылдын 18-майында, Бишкек шаарында маанилүү юбилей - академик Иса Коноевич Ахунбаев жасаган Борбордук Азиядагы алгачкы жүрөк операциясынын 65 жылдыгына арналган жыл сайын өтүүчү VII Эл аралык илимий-практикалык конференция ишин баштады.

Конференция Кыргыз Республикасынын Саламаттык сактоо министри Алымкадыр Бейшеналиевдин катышуучуларга жана алыскы жана жакынкы чет өлкөлөрдөн келген конокторго амандашуу сөзү менен ачылды.

Министр өз сөзүндө көрүнүктүү академик, хирург жана таланттуу дарыгер – Иса Коноевич Ахунбаевге терең ыраазычылык билдирди, анын эмгеги аймактагы медицина тармагындагы көптөгөн жетишкендиктерге башат болгон. Бул конференция тажрыйба жана билим алмашууга гана мүмкүнчүлүк бербестен, биз кесиптештердин идеяларынан шыктанып, илимий жана практикалык билимибизди тереңдетип, адамдардын ден соолугун жана жашоосун жакшыртуу үчүн жаңы чечимдерди жана технологияларды издөөдө бириге турган жайга айланат.

Талкуунун негизги темалары жаңы технологияларды, дарылоо жана диагностикалык методдорду, ошондой эле келечекте медицинаны өнүктүрүүнүн перспективаларын камтыды.

Мындан тышкары 19-майда Ысык-Көлдө салттуу веложүрүш жана Тору-Айгыр айылындагы И.К. Ахунбаевдин эстелигине гүл коюу иш-чарасы болот.

18.05.2024
Бир катар саламаттык сактоо уюмдарына тез жардам унаалары тапшырылды

Бүгүн, 2024-жылдын 18-майында Кыргыз Республикасынын Саламаттык сактоо министрлигинде Ысык-Көл жана Чүй облусунун саламаттык сактоо уюмдарына тез жардам унааларын тапшыруу иш-чарасы болду. Автоунаалардын ачкычын КР саламаттыкты сактоо министри Алымкадыр Бейшеналиев тапшырды.

 Министр Кыргыз Республикасынын Президенти Садыр Нуркожоевич Жапаров Кыргыз Республикасынын саламаттык сактоо тармагына жети тез жардам унаасын өткөрүп бергенин, анын бири мурда Тамчы айылындагы тез жардам пунктуна, дагы үч унаа Балыкчыдагы Жалпы дарыгерлик практика борборуна, Боом капчыгайындагы тез жардам пунктуна жана Ысык-Көл районунун Жалпы дарыгерлик практика борборуна тапшырылып жатканын билдирди.

«Бардык керектүү жабдыктар менен жабдылган тез медициналык жардам унааларынын тапшырылышы Ысык-Көл облусунун тургундарына жана конокторуна тез медициналык жардам көрсөтүүнүн жеткиликтүүлүгүн жакшыртууга жасалган олуттуу кадам болуп саналат. Саламаттык сактоо тармагына өзгөчө көңүл буруп, ар тараптуу колдоо көрсөтүп жаткан  Кыргыз Республикасынын Президенти Садыр Жапаровго терең ыраазычылык билдиребиз», - деп баса белгиледи Кыргыз Республикасынын Саламаттык сактоо министри Алымкадыр Бейшеналиев.

18.05.2024
Бишкектеги окуяда жабыркагандар тууралуу маалымат

17-майдан 18-майга караган түнү тез жардам кызматына 29 адам медициналык жардам сурап кайрылган. Алардын ичинен 15  адам Шаардык тез жардам ооруканасына жана Улуттук госпиталга жеткирилип, калгандарына жеринде жардам көрсөтүлдү.

18-майдын таңына карата Шаардык тез жардам ооруканасында эки бейтап дарыланууда. Диагнозу: баш мээнин жабык травмасы, мээнин чайкалышы. Бейтаптардын абалы салыштырмалуу канааттандырарлык деп бааланууда. Бир жабырлануучуга медициналык жардам көрсөтүлгөндөн кийин амбулатордук дарыланууга кеткен.

12 жабырлануучу ар кандай жаракаттар менен Улуттук госпиталга жаткырылып, алардын 11и тиешелүү медициналык жардам көрсөтүлгөндөн кийин амбулатордук дарыланууга чыгышты.

18-майда КР Саламаттык сактоо министри Алымкадыр Бейшеналиев Улуттук госпиталдын Бет-жаак хирургиясы бөлүмүнө барып, жаак сөөгү сынган деген диагноз менен жаткырылган пакистандык жарандын ден соолугунун абалы менен таанышты. Бейтап операцияга даярдалып жатат: жаак сөөгүнүн сынган жерин ордуна келтирүү. Министр Улуттук госпиталдын жетекчилигине жабырлануучуга бардык керектүү медициналык жардам көрсөтүүнү тапшырды.


 

 

17.05.2024
Бишкекте эне жана баланын ден соолугунун жана жашоо сапатынын көйгөйлөрүн чечүү жолдору талкууланууда

17-18-майда Бишкекте Эне жана баланы коргоо улуттук борборунун 60 жылдыгына, ошондой эле А. Ильин жана В. Кононовдун 100 жылдыгына арналган “Эне жана бала: ден соолук жана жашоо сапатынын көйгөйлөрүн чечүү жолдору” аттуу Эл аралык илимий-практикалык конференция өтүүдө.

 

Конференциянын программасы бир нече пленардык сессияларды жана симпозиумдарды камтыйт - “Ден соолук жана татыктуу жашоо сапаты – балдар медицинасындагы артыкчылык”; «Эне жана баланын ден соолугунун тарыхый жана заманбап аспектилери»; «Борбордук Азия жана Россия: педиатриялык көйгөйлөрдү чечүүгө болгон мамиле»; «Үй-бүлөнү пландаштыруу жана коопсуз эне болуу»; «Балдардын ооруларынын диагностикасынын, терапиясынын жана алдын алуунун заманбап аспектилери»; «Оорулуу балдарды алып барууда жана дарылоодо чечилген жана чечилбеген маселелер»; «Балдардагы тамактануунун бузулушу – бир тыйындын эки бети»; «Балдар хирургиясын өнүктүрүүнүн көйгөйлөрү жана келечеги»; «Балдар хирургиясы: салттар жана инновациялар»; «Неонатология – чакырыктар жана реалдуулук»; «Перинатология — ресурстар жана мүмкүнчүлүктөр».

 

Конференцияны Кыргыз Республикасынын Министрлер Кабинетинин Төрагасынын орун басары Эдил Байсалов, Кыргыз Республикасынын Саламаттык сактоо министри Алымкадыр Бейшеналиев, Жогорку Кеңештин депутаты, Социалдык саясат боюнча комитетинин төрайымы Винера Раимбачаева куттуктоо сөздөрү менен ачты.

Саламаттыкты сактоо тутуму үчүн илимий кадрларды жана кадрларды даярдоого, материалдык-техникалык базаны чыңдоого, ошондой эле илимий долбоорлорду ишке ашырууга кошкон зор салымы үчүн дарыгер-окумуштууларга Эне жана баланы коргоо улуттук борборунун “Ардактуу профессору” наамы ыйгарылды. 

Саламаттыкты сактоо министри Алымкадыр Бейшеналиевдин айтымында, «юбиляр борбор жогорку кадрдык, илимий, материалдык-техникалык потенциалы менен айырмаланып, Кыргыз Республикасынын аялдардын жана балдардын ден соолугун сактоого жана чыңдоого баа жеткис салым кошууда. Бул конференциянын жүрүшүндө аялдардын, балдардын жана өспүрүмдөрдүн ооруларынын жана ден соолугунун көптөгөн аспектилери каралат. Медицина илими жана саламаттыкты сактоо кайра жаралууга, реабилитацияга муктаж жана кечиктирилгис комплекстүү чараларды талап кылары талашсыз. Саламаттыкты сактоо уюмдарын, анын ичинде педиатриялык профилдеги уюмдарды дагы эле кадрлар, оорукана керебеттери менен камсыз кылуу, инфраструктурасын жаңылоо жана чыңдоо, медицина кызматкерлеринин квалификациясын жогорулатуу, диагностикалык жана дарылоонун жаңы технологияларын киргизүү зарыл. Медицина кызматкерлерин социалдык-укуктук жактан коргоо маселеси курч турат. Реформалардын алга жылышын жаңы кадрларсыз, жаш, билимдүү, таланттуу жана чыгармачыл кадрларсыз элестетүү кыйын.

 

Бүгүнкү күндө Кыргыз Республикасында балдардын, өспүрүмдөрдүн жана аялдардын абалын жакшыртуу боюнча мамлекеттик, жеке, өкмөттүк эмес жана эл аралык уюмдардын ишин координациялоо механизмдери түзүлүүдө. Амбулатордук жана стационардык жардамдын сапатын жана жеткиликтүүлүгүн жогорулатуу, абилитациялоо жана реабилитациялоо, балдардын ооруларын алдын алуу боюнча иштерди активдештирүү зарыл.

 

Кыргыз Республикасынын Саламаттык сактоо министрлиги Кыргыз Республикасынын Саламаттык сактоо министрлигинин башкы штаттан тышкаркы жана жетектөөчү адистери, ошондой эле кесиптик медициналык ассоциациялар менен биргеликте аялдардын, балдар жана жаңы төрөлгөн ымыркайлардын ооруларын диагностикалоо жана дарылоодо инновациялык ыкмаларды иштеп чыгууда жана ишке ашырууда. Бүгүнкү күндө Эне жана баланы коргоо улуттук борборунун клиникалык-диагностикалык базасы кыйла жаңыланып, кадрдык потенциалы чыңдалууда”.

 

«Педиатрия мамлекет тарабынан колдоону жана субсидияларды талап кылган өзүнчө тармак жана аны бардык багыттар боюнча өнүктүрүү керек», - дейт балдар кардиологу, Педиатрия оюндарынын активдүү уюштуруучусу жана катышуучусу, И.К. Ахунбаев атындагы КММАнын педиатрия факультетинин ассистенти Данияр Аматов. - Педиатрияны бала ооруп калганда эле эмес, бир топ кеңири караш керек. Бул системалуу бүтүндөй бир организм. Жалпы терапиядан тышкары биздин өлкөдө балдардын кардиологиясы, нефрологиясы, эндокринологиясы, балдар гастроэнтерологиясы, хирургиясы, стоматологиясы, ошондой эле зат алмашуу оорулары, балдардын генетикасы сыяктуу али өтө начар өнүккөн тармактар ​​да өнүгүп, жакшы колдоого алынышына умтулуу керек. Менин оюмча, биз үчүн умтулуп, үйрөнө турчу нерсе көп, анткени биздин өлкө балдарды жакшы көрөт, бизде төрөлүү көрсөткүчү жогору, ошондуктан педиатрияны стратегиялык багыт катары караш керек».

Конференцияда «Мыкты педиатриялык медициналык уюм - 2024»; "Мыкты балдар дарыгери - 2024"; «Мыкты педиатрдык медайым – 2024»; «Кыргыз педиатриясынын тарыхы боюнча эң мыкты көркөм-тарыхый очерк» сынактарынын жеңүүчүлөрүнө жана жаш окумуштуулардын илимий иштеринин сынагына катышкандыгы үчүн дипломдор тапшырылат.

 

Эне жана баланы коргоо улуттук борборунун калыптануу тарыхына токтолсок, узак убакыт бою кош бойлуу аялдарга медициналык жардам көрсөтүү бөлүмү медициналык бөлүмдөрдүн курамында болуп, 1927-жылы гана эне жана баланы коргоо бөлүмүнө бириктирилген. Ошол убактан тартып ушундай бөлүмдөр өлкөнүн бардык аймактарында ачыла баштады. 1926-жылы Кыргыз АССРинин Саламаттык сактоо элдик комиссариатынын алдында эне жана баланы коргоо боюнча өз алдынча бөлүм түзүлүп, калкты медициналык жактан тейлөө байкалаарлык жакшыра баштаган. Кыргызстанда балдардын саламаттыгын сактоону уюштурууда чоң роль ойногон дарыгерлер С.М. Коплан жана В.Ф. Княгичева болгон. 1924-жылы Саратовдон Пишпекке келген А. Покровскийди республикадагы педиатриялык кызматтын уюуштуруучусу, алгачкы педиатр деп эсептөөгө болот. 1960-жылы Фрунзеде 150 койкалуу республикалык балдар ооруканасы ачылып, анын базасында 1961-жылы Эне жана баланы коргоо кыргыз илим-изилдөө институту уюштурулуп, ал илимий иштин борборуна гана эмес, ошондой эле Кыргызстандагы балдардын жана аялдардын ден соолугун коргоодогу бардык маселелер боюнча методикалык жетекчилик борборуна айланган. Балдарга адистештирилген стационардык хирургиялык жардамды өнүктүрүүнүн башталышы деп 1961-жылы Эне жана баланы коргоо боюнча кыргыз илим-изилдөө институтунун алдында 40 койкалуу хирургиялык бөлүмдүн ачылышын эсептөө керек. 1964-жылы бул бөлүм 110 койкага чейин кеңейтилип, жаңы ачылган 3-балдар ооруканасына өткөрүлүп берилген. Алгачкы күндөрдөн тартып бул бөлүмдү ошол кездеги медицина илимдеринин кандидаты В.С. Кононов жетектеген. Андыктан дал ошол В.С. Кононовду республикадагы балдар хирургиясынын негиздөөчүсү деп эсептөө керек.

16.05.2024
Кант шаарында Үй-бүлөлүк дарыгерлер тобунун имараты курулду

2024-жылдын 16-майында Чүй облусунун Кант шаарында Үй-бүлөлүк дарыгерлер тобунун (ҮДТ) жаңы имараты пайдаланууга берилди.
ҮДТнын курулушу Түрк кызматташтык жана координация агенттиги (TIKA) тарабынан 115 миң АКШ доллары өлчөмүндө каржыланды. Ошондой эле ҮДТнын имаратынын айланасын тосуу, көрктөндүрүү жана жашылдандыруу иштерине жергиликтүү бюджеттен 1,5 млн сом бөлүнүп, тез жардам унаасы да сатылып алынды.
Иш-чара Кыргыз Республикасынын Саламаттык сактоо министри Алымкадыр Бейшеналиев, Түркия Республикасынын Кыргызстандагы элчиси Ахмет Садык Доган, Түрк кызматташтык жана координация агенттигинин (TIKA) президенти Серкандын Каялар, Президенттин Чүй облусундагы Ыйгарым укуктуу өкүлү Канат Жумагазиевдин катышуусунда өттү.
Саламаттык сактоо министри Алымкадыр Бейшеналиев өз сөзүндө Кыргызстан менен Түркиянын саламаттык сактоо тармагындагы жемиштүү кызматташтыгынын бир мисалы катары эл аралык стандарттарга ылайык курулган Кыргыз-Түрк достугу ооруканасынын курулушу экендигин баса белгиледи. Бул оорукана медицина илимдеринин жетишкендиктерин жана технологияларын киргизүү борбору болуп саналат. «Ошондой эле сиздердин жардамыңыздар менен Кыргыз Республикасындагы саламаттык сактоо уюмдарынын инфраструктурасын жакшыртуу боюнча башка долбоорлор ишке ашырылууда, алсак, Ош шаарындагы кыргыз-түрк достугу бейтапканасынын курулушу. Саламаттык сактоо системасынын инфраструктурасын жакшыртууга кошкон салымы үчүн боордош түрк элине ыраазычылык билдирем жана мындан ары да жемиштүү кызматташуунун улануусуна ишенем», — деди Алымкадыр Бейшеналиев.
Кант шаары Бишкек-Токмок жолунун 20-70-чакырымында жайгашкан, анда жалпысынан 100 миңге жакын адам жашайт. ҮДТнын имараты жол боюнда жайгашкан жана бүтүндөй Ысык-Ата районунун тургундарына медициналык кызмат көрсөтө алат.
Жалпы аянты 250 м2 болгон эки кабаттуу имаратта 9 дарыгерлер бөлмөсү, 2 медайымдык жана 1 карантин бөлмөсү, ашкана жана кампа бар.6816:46


 

16.05.2024
Бишкекте Европалык иммунизация жумалыгынын жыйынтыгы чыгарылды

15-майда Бишкекте 2024-жылдагы Европалык эмдөө жумалыгынын жыйынтыгын талкуулаган жыйын өттү. Быйыл эмдөө жумалыгы «Муундарды коргойбуз» деген ураан астында бардык курактагы адамдарды пландуу эмдөө менен камтуунун жогорку деңгээлин сактоо максатында уюштурулду.

Иш-чарага КР Саламаттык сактоо министрлигинин, Бишкек шаарынын саламаттыкты сактоо уюмдарынын өкүлдөрү жана массалык маалымат каражаттарынын өкүлдөрү катышты.

Кыргыз Республикасында калкты пландуу эмдөөнүн аркасында 19 жашка чейинки курактагылар арасында кептөөр, селейме, кургак учук менингити, В вирустук гепатити катталган эмес; 1993-жылдан бери полиомиелиттен эркин өлкө статусу бар.

Иш-чаранын жүрүшүндө Республикалык иммунопрофилактика борборунун директору эмдөө жумалыгынын калк үчүн мааниси жана эмдөө менен камтуу боюнча маалыматтарга токтолду. Алсак, бир жума ичинде Кыргыз Республикасынын профилактикалык эмдөө календары боюнча 54 362 адам кошумча эмдөө алды. Эмдөө стационардык пункттарда жана мобилдик бригадалардын жардамы менен жүргүзүлдү. Гүлбара Ишенапысова ошондой эле калкты маалымдоодо медицина кызматкерлеринин салымын белгиледи, мында эмдөө менен камтууну жогорулатуудагы негизги максат ар бир бала вакцина менен алдын ала турган оорулардан коргоого муктаж жана мындай коргоого укугу бар деген маалыматты жайылтуу болуп саналат.

Мындан тышкары, ДССУнун Кыргызстандагы өкүлчүлүгүнүн колдоосу менен иштелип жана басылып чыккан бардык денгээлдеги саламаттыкты сактоо уюмдарынын медицина кызматкерлери үчүн арналган “Иммунопрофилактика боюнча чөнтөк колдонмо” көрсөтүлдү.

15.05.2024
Ысык-Көл облусунун жалпы дарыгерлик практика борборуна тез жардам унаасы тапшырылды

Бүгүн, 2024-жылдын 15-майында, Ысык-Көл облусунун Ысык-Көл районундагы Тамчы айылында тез жардам пунктунун ачылыш аземинде Кыргыз Республикасынын Саламаттык сактоо министри Алымкадыр Бейшеналиев тез жардам унаасынын ачкычын тапшырды.

           Министр өз сөзүндө, Кыргыз Республикасынын Президенти Садыр Нуркожоевич Жапаров тарабынан Кыргыз Республикасынын саламаттык сактоо тармагына жети тез жардам унаасы өткөрүлүп берилгендигин, анын бири Тамчы айылындагы Тез жардам көрсөтүү пунктуна өткөрүлүп берилгендигин белгиледи.

             «Бүгүн биз Тамчы айылдык тез жардам борборуна тез жардам унаасынын ачкычын тапшырып жатабыз. Бул Ысык-Көл облусунун тургундарына тез жардам көрсөтүүнүн жеткиликтүүлүгүн жакшыртуудагы олуттуу кадам болуп саналат. Кыргыз Республикасынын саламаттыкты сактоо тармагына ар тараптуу колдоо көрсөткөндүгү үчүн Президент Садыр Жапаровго ыраазычылык билдиребиз», - деди Кыргыз Республикасынын Саламаттык сактоо министри Алымкадыр Бейшеналиев.

15.05.2024
Тамчы айылында Тез жардам пункту ачылды

2024-жылдын 15-майында Ысык-Көл облусунун Ысык-Көл районундагы Тамчы айылында тез медициналык жардам көрсөтүү пунктунун расмий ачылыш аземи болуп өттү.

Иш-чара КР Саламаттык сактоо министри Алымкадыр Бейшеналиев, Кувейт Ас-Сафа фондунун негиздөөчүсү, шейх Мухаммад Абдурахман Алшая, Саламаттык сактоо министрлигинин Медициналык жардам жана дары саясаты бөлүмүнүн башчысы Нургүл Ибраеванын, ошондой эле Ысык-Көл областынын Жалпы дарыгерлик практика борборунун жетекчилиги жана кызматкерлеринин катышуусунда өттү. Тез медициналык жардам пунктунун курулушу толугу менен «Ас-Сафа Борбору» коомдук кайрымдуулук фонду тарабынан каржыланып, жалпы суммасы 38,5 млн сомду түздү.

Тамчы айылындагы 2 кабаттуу Тез медициналык жардам пунктунун имаратында жалпы аянты 476 м2 болгон күндүзгү стационар, операция, реанимация, дарылоо, стерилизация бөлмөлөрү жана башкалар камтылган. Көчмө рентген аппараты, УЗИ жана башка керектүү медициналык жабдуулар бар. Ошондой эле кызматкерлердин жана бейтаптардын ыңгайлуулугу үчүн лифт орнотулган. Алымкадыр Бейшеналиев өз сөзүндө Тамчы айылында тез медициналык жардам пункту ачылып жатканы өтө маанилүү экенин белгиледи. Анткени Ысык-Көлгө келген көптөгөн туристтер ар кандай медициналык өзгөчө кырдаалдарга, анын ичинде травма, курч кармаган оору жана башка медициналык өзгөчө кырдаалдарга дуушар болушу мүмкүн. Мындай пункттун болушу калкка жана конокторго тез жана натыйжалуу медициналык жардам көрсөтүү менен бирге алардын коопсуздугуна жана ден соолугуна да салым кошот. Министр Кувейт «Ас-Сафа» Фондунун негиздөөчүсү шейх Мухаммад Абдурахман Альшаяга саламаттыкты сактоо системасын өнүктүрүүгө, медициналык кызматтардын жеткиликтүүлүгүн жана сапатын жогорулатууга кошкон салымы үчүн ыраазычылык билдирди.

«Ас-Сафа Борбору» коомдук бирикмесинин кайрымдуулук ишмердүүлүгүнүн негизги багыттарынын бири – саламаттык сактоо тармагы. 2015-жылдан бери бирикме тарабынан 70ке жакын фельдшердик-акушердик пункт, балдар онкологиясы, лор, гематология бөлүмдөрү, Эне жана баланы коргоо улуттук борборунун консультациялык бөлүмү, аймактарда 4 төрөт үйү курулуп, пайдаланууга берилген. Учурда Эне жана баланы коргоо улуттук борборунда гемодиализ борборунун курулушу жүрүп жатат, ал эми бир күн мурун Токмок шаардык жалпы дарыгердик практика борборунун патология менен төрөлгөн балдар үчүн бөлүм ачылды.

14.05.2024
Токмокто патология менен төрөлгөн балдардын жана балдардын соматикалык бөлүмү ачылды

Бүгүн, 2024-жылдын 14-майында Чүй облусунун Токмок шаарында патология менен төрөлгөн балдардын жана балдардын соматикалык бөлүмүнүн расмий ачылыш аземи болуп өттү. Иш-чара КР Саламаттык сактоо министри Алымкадыр Бейшеналиев, президенттин Чүй облусундагы ыйгарым укуктуу өкүлүнүн орун басары Гүлмира Кыштобаева, Кувейт Аль-Сафа фондунун негиздөөчүсү, шейх Мухаммад Абдурахман Алшаянын, о.э. Токмок шаардык жалпы дарыгерлик практика борборунун жетекчилиги жана кызматкерлеринин катышуусунда өттү.

Бөлүмдүн курулушу толугу менен “Ас-Сафа Борбору” коомдук кайрымдуулук фонду тарабынан каржыланып, жалпы суммасы 42 миллион сомдон ашык каражатка каржыланды.

   Жалпы аянты 634 м2 болгон эки кабаттуу бөлүм төмөнкүлөрдү камтыйт: тамбур, вестибюль, күтүү зонасы, бөлүм башчынын бөлмөсү, каттоо жайы, кароо бөлмөсү, дарыгерлердин бөлмөлөрү, кызматкерлердин бөлмөсү, медайымдардын бөлмөсү, стерилизация бөлмөсү, алты күндүзгү стационар бөлмөлөрү, душ бөлмөсү, эмдөө бөлмөлөрү, процедуралык бөлмөлөр, медициналык буюмдарды сактоо жана чарбалык бөлмөлөр. Ошондой эле имарат медициналык жабдуулар жана керектүү эмеректер менен толук камсыздалган.

Министр өз сөзүндө энелердин жана балдардын ден соолугун коргоо Саламаттык сактоо министрлигинин ишиндеги артыкчылыктуу багыт экенин баса белгиледи. Үстүбүздөгү жылдын башында Кыргыз Республикасынын Президенти Садыр Жапаровдун катышуусунда заманбап кызматтарды камтыган жаңы перинаталдык борбордун ачылышы болгон. Министр ошондой эле статистикага ылайык, Кыргызстанда жыл сайын төрөлгөн 150 миң баланын 5% ара төрөлгөн ымыркайлар экенин белгиледи. Белгилей кетсек, акыркы 10 жылдын ичинде өтө аз салмактуу балдардын аман калуу деңгээли 5тен 7% га чейин өскөн. Мунун баары медициналык кызмат көрсөтүүлөрдүн жеткиликтүүлүгүн жакшыртуу жана жогорулатуу боюнча көрүлгөн чаралардын аркасында ишке ашты. Сөзүн жыйынтыктап жатып, министр Кувейт Аль-Сафа Фондунун негиздөөчүсү Шейх Мухаммад Абдурахман Альшаяга саламаттык сактоо системасын өнүктүрүүгө, медициналык кызматтардын жеткиликтүүлүгүн жана сапатын жогорулатууга кошкон салымы үчүн ыраазычылык билдирип, бул бөлүмдүн ишке киргизилиши көптөгөн ымыркайлардын өмүрүн сактап калууга жардам берерин белгиледи.

14.05.2024
Калыбына келтирүү жана спорттук медицина борборунда спортчулар жогорку тактыктагы диагностикага мүмкүнчүлүк алышат

Бүгүн, 2024-жылдын 14-майында, Кыргыз Республикасынын Саламаттык сактоо министри Алымкадыр Бейшеналиев Калыбына келтирүү жана спорттук медицина борборуна барып, жаңы санарип рентген-флюорографиялык аппаратты тапшыруу аземине катышты.

Грек-рим күрөшү боюнча Азиянын үч жолку чемпиону Жоламан Шаршенбеков спортчулардын, дарыгерлердин жана машыктыруучулардын биргелешкен эмгеги мыкты жыйынтыктарга жетишүүгө мүмкүнчүлүк түзөрүн баса белгиледи. Ал жаңы жабдуулар үчүн ыраазычылыгын билдирип, бул кадам кыргыз өкмөтүнүн спортчуларды заманбап медициналык жабдуулар менен камсыз кылуу, алардын ден соолугун жана кесиптик жетишкендиктерин колдоого умтулуусун чагылдырарын белгиледи.

Министр спортчуларга медициналык кызмат көрсөтүүнүн сапатын жогорулатуу Кыргыз Республикасынын Саламаттык сактоо министрлигинин артыкчылыктуу багыты болуп саналарын белгиледи. Спорттук-реабилитациялык борбордун материалдык-техникалык базасы кыйла начар, бирок абалды жакшыртуу үчүн бардык чаралар көрүлүүдө: 2023-2024-жылдарга керектүү медициналык жабдууларды сатып алуунун сметалык планы түзүлгөн. Бүгүн рентген кабинетинин жабдылышына күбө болдук. Буга чейин апрель айында Бишкектеги Үй-бүлөлүк медицина борборлору жана бир катар аймактардын саламаттыкты сактоо уюмдары жаңы санарип рентгендик флюорографиялык аппараттарды алышкан. «Көптөгөн саламаттыкты сактоо уюмдары аналогдук флюоро-аппараттар үчүн пленкалар менен көйгөйлөргө туш болушчу. Бул көйгөйдү чечүү үчүн “Кыргызфармация” мамлекеттик ишканасы аркылуу 24 аппарат түздөн-түз өндүрүүчүлөрдөн сатылып алынган. Сатып алууга бөлүнгөн 200 миллион сомдун 71 миллионун үнөмдөөгө жетиштик, бул каражат кошумча рентген аппараттарын сатып алууга жумшалат. Эми Реабилитациялык жана спорттук медицина борборунда спортчуларга флюорографиялык текшерүүдөн өтүү үчүн шарттар түзүлдү», - деди КРнын саламаттыкты сактоо министри Алымкадыр Бейшеналиев.

13.05.2024
Эне жана баланы коргоо улуттук борборуна Катардан медициналык топ келди

Үстүбүздөгү жылдын 10-майында Эне жана баланы коргоо улуттук борборуна Катар мамлекетинен хирургдар тобу келген. Кол коюлган меморандумга ылайык, Катар Мамлекетинин Өкмөтү Кайрымдуулук жана Ислам иштери министрлиги аркылуу бардык зарыл финансылык чыгымдарды, анын ичинде кохлеардык имплант системасын камсыз кылуу, хирургиялык операциялар, Эне жана баланы коргоо улуттук борборунан бир хирургду жана жардамчы медициналык кызматкерди окутууну өз мойнуна алат. Алар ошондой эле операциядан кийин балдардын реабилитациясы менен байланышкан чыгымдарды камтыйт.

11-майга карата 8 балага операция жасалды. Бул жолу мындай операциялар 2024-жылдын 18-майына чейин уланат.

Бул операциянын маңызы ички кулакка орнотулган импланттын ички бөлүгү өмүр бою калат. Сырткы бөлүгү - сүйлөө процессору - 5 жылда бир алмаштырылышы керек.

Белгилей кетсек, операциялар Эне жана баланы коргоо улуттук борборунда жасалат, анда угуусу начар балдарды диагностикалоо, хирургиялык кийлигишүү жана операциядан кийинки медициналык реабилитациялоо үчүн бардык керектүү жабдыктар бар жана кохлеардык имплантацияга балдарды тандоо үчүн комиссия жөнүндө бекитилген жобо бар (Кыргыз Республикасынын Саламаттык сактоо министрлигинин 17.02.2023-ж. № 153 буйругу).

Жалпысынан Эне жана баланы коргоо улуттук борборунда буга чейин кохлеардык имплантация боюнча 167ден ашык балага операция жасалган.

13.05.2024
Эне жана баланы коргоо улуттук борборунда Кувейт мамлекетинен келген медициналык бригада акысыз операцияларды жасайт

2024-жылдын 12-майында Эне жана баланы коргоо улуттук борборуна Кувейт мамлекетинен медициналык бригада келди. Конокторду министр Алымкадыр Бейшеналиев кабыл алды. Топтун курамында 18 дарыгер жана 10 орто медициналык кызматкер бар. Бригаданы профессор Хишан жетектейт. 13-майдан 16-майга чейин 4 күн аралыгында көрүү органдарынын, бет-жаак түзүлүшүнүн, табарсык-жыныс системасынын патологиясы бар балдарга операция жасашат. Медициналык бригада өздөрүнүн жабдуулары жана медициналык буюмдарын ала келген. Операциялар бекер болот.