Copyright: ©

Саламаттык сактоо министри Республикалык «Арчалы» реабилитациялык борборуна барды

05.02.2024 / Просмотров: 2208

Бүгүн, 2024-жылдын 5-февралында, Кыргыз Республикасынын Саламаттык сактоо министри Алымкадыр Бейшеналиев Кыргызстандын Паллиативдик жана хоспистик жардам ассоциациясынын теңтөрайымы Таалайгүл Сабырбекова менен бирге «Арчалы» республикалык реабилитациялык борбордун иши менен таанышты. Анда калкка медициналык жана реабилитациялык жардамдын сапатын жана жеткиликтүүлүгүн жогорулатуу максатында медициналык-реабилитациялык жана паллиативдик жардам көрсөтүүчү бөлүмдөр ачылган.

Министр бөлүмдү кыдырып, бейтаптар менен баарлашты. Ал инсульт алган бейтаптар дарылангандан кийин жакшы реабилитацияга муктаж экенин белгиледи. Паллиативдик жардам бөлүмүндө тажрыйбалуу кызматкерлер төшөктө жаткан бейтаптарга жардам көрсөтө алышат. «Учурда бөлүмгө дарыгердин туруктуу көзөмөлүсүз күнү-түнү жардамга муктаж бейтаптар кайрыла алышат. Бөлүмдө ден соолугунун көрсөткүчтөрү боюнча бейтаптарга акысыз жана акы төлөнүүчү медициналык жардам көрсөтүлөт», - деди КР Саламаттык сактоо министри Алымкадыр Бейшеналиев.

«Биздин өлкөдө паллиативдик жардам мамлекеттик деңгээлде өнүгө баштаганына кубанычтамын. Мындай реабилитациялык, паллиативдик жардам көрсөтүүчү жана медайымдык камкордукту камтыган борбордун ачылышы өлкөбүз үчүн абдан чоң кадам. Паллиативдик жардамдын маңызы өмүрдү узартуу же кыскартуу эмес, ал бейтаптын жашоо сапатын жакшыртуу болуп саналат. Паллиативдик жардам өтө гумандуу, бул адамдын өзүнө жана анын жакындарына кам көрүү. Анткени кээде айыккыс ооруга чалдыккандардын жакындары чарчайт, айла таппай калат, аларга кантип туура кам көрүү керектигин билишпейт», - деди Кыргызстандын Паллиативдик жана хоспистик жардам ассоциациясынын теңтөрайымы Таалайгүл Сабырбекова.

РРБнын директору Нурлан Дүйшөналиев аларга №1 шаардык клиникалык ооруканадан төрт бейтап ангионеврология бөлүмүнөн жолдомо менен келип, дарыланып жатканын билдирди. Бүгүнкү күндө биздин дарыгерлер аларга бардык керектүү медициналык жардамдарды көрсөтүп жатышат. Кошумчалай кетсем, бул бөлүмдөргө жаткыруу дарылоочу дарыгердин жолдомосунун негизинде жүргүзүлөт. Жолдомодо бейтаптын абалы, толук клиникалык диагнозу жана колдоочу дарылоо боюнча сунуштар камтылат.

Маалымат үчүн:

Бөлүмдөр төмөнкү функцияларды аткарат:

- врачтын көрсөтмөсү боюнча симптоматикалык колдоочу терапия;

- организмдин оорудан кийинки жоголгон же начарлаган функцияларын жана психологиялык жөндөмдөрүн калыбына келтирүү

- бейтаптарга кам көрүү, анын ичинде басымдагы жаралардын (пролежни) алдын алуу жана дарылоо;

- туугандарын бейтаптарды багуу көндүмдөрүнө үйрөтүү;

- негизги оорунун профили боюнча адис-врач жана башка адистиктеги дарыгерлер менен пациенттердин консультацияларын уюштуруу;

- бейтаптарды багуунун заманбап методдорун иш практикасына киргизүү;

-санитардык-гигиеналык иш-чараларды өткөрүү;

- социалдык тейлөө системасынын органдары жана уюмдары менен өз ара аракеттенүү ж. б.

Бул бөлүмдөргө жаткыруу дарылоочу дарыгердин жолдомосунун негизинде жүргүзүлөт. Жолдомодо бейтаптын статусу, толук клиникалык диагнозу жана колдоочу дарылоону жүргүзүү боюнча сунуштар чагылдырылат.

Бардык суроолор боюнча Республикалык реабилитациялык борбордун жетекчиси Нурлан Дүйшөналиевге 0555 09-33-47 телефону аркылуу кайрылсаңыздар болот.

Прикрепленные файлы:

Другие Новости

28.02.2024
Түркмөнстандын делегациясы менен санариптик саламаттыкты сактоо жаатында тажрыйба алмашуу

Саламаттыкты сактоо министринин санариптик өнүктүрүү боюнча орун басары Түркмөнстандын делегациясын кабыл алды. Жыйында министрдин орун басары саламаттыкты сактоону санариптик трансформациялоо жаатындагы мамлекеттик саясат жана артыкчылыктуу багыттарга токтолду. “iEPID” – саламаттыкты сактоо тармагындагы инциденттерге мониторинг жүргүзүү үчүн маалымат системасы, “iEMDOO” – иммунизациялоонун толук циклдүү маалыматтык системасы, “Санариптик убактылуу эмгекке жарамсыздык баракчасы”, “Санариптик медициналык маалымкат” - төрөлүү жана өлүм фактыларын алгачкы каттоонун маалыматтык системасы сыяктуу саламаттыкты сактоо тармагындагы санарип продуктулары талкууланды.

 

«Биз санариптик саламаттыкты сактоону өнүктүрүү үчүн экспертиза жана тажрыйба алмашуу жаатында бардык жардамдарды көрсөтүүгө даярбыз», - деп жыйынтыктады Б.Джангазиев.

 

Жолугушуунун жыйынтыгында тараптар мүмкүнчүлүктөрдү жогорулатуу жана туруктуу негизде тажрыйба алмашуу жаатында кызматташуу боюнча макулдашууга жетишти.

22.02.2024
Эне жана баланы коргоо улуттук борборунун дарыгерлер тобу Түркияда жилик чучугун трансплантациялоо технологиясын өздөштүрүүдө

Кыргыз Республикасынын Саламаттык сактоо министрлиги менен Түркиянын «Инөнү» университетинин ортосундагы кызматташуу боюнча кол коюлган келишимдин алкагында Эне жана баланы коргоо улуттук борборунун дарыгерлер, лаборанттар жана медайымдар кирген 8 адамдан турган дарыгерлер тобу Түркиянын Малатья шаарына келишти.

«Инөнү» университетинин клиникасында дарыгерлер тобу окутулуп, жилик чучугун алмаштыруунун технологиясын өздөштүрүшөт. Бул университеттик клиника чоңдор жана балдар үчүн органдарды, анын ичинде жилик чучугун трансплантациялоо операцияларын жасайт.

«Түрк клиникасынын жетекчилиги бизди абдан жылуу тосуп алды. Малатьядагы Эне жана баланы коргоо улуттук борборунун медициналык командасы кийин мекенибизде колдонуу үчүн жетишерлик билим алып келишет деп үмүттөнөбүз. Президентибиздин көрсөтмөсү менен бул долбоорду баштап, бизди ушундай керектүү окууга жиберген министрибиз Алымкадыр Бейшеналиевге онкологмдарыгерлер терең ыраазычылыктарын билдиришет”, - деп бөлүштү Эне жана баланы коргоо улуттук борборунун онкология бөлүмүнүн башчысы Султан Стамбеков.

Эскерте кетсек, 2024-жылдын 11-12-январында Кыргыз Республикасынын Саламаттык сактоо министри Алымкадыр Бейшеналиев клиникасы органдарды трансплантациялоо боюнча беш эң мыкты мекеменин бири болуп саналган Түркиянын «Инөнү» университетинде болгон. Иш сапардын жыйынтыгында КР Саламаттык сактоо министрлиги менен «Инөнү» университетинин ортосунда кызматташуу келишимине кол коюлган.

21.02.2024
КР Саламаттыкты сактоо министри менен Жогорку Кеңештин депутаты Кыз-келиндер күрөшү залында болуп, Олимпиадага чейин спортчуларга дары-дармек сатып алуу көйгөйлөрүн талкуулашты

2024-жылдын 20-февралында Кыргыз Республикасынын Саламаттык сактоо министри Алымкадыр Бейшеналиев Кыргыз Республикасынын Жогорку Кеңешинин депутаты Таалайбек Масабировдун коштоосунда Кыргыз Республикасынын Маданият, Маалымат, спорт жана Жаштар саясаты министрлигине караштуу Дене тарбия жана спорт департаментинин бөлүмчөсү болгон Спорттун олимпиадалык түрлөрү боюнча дирекциянын чакыруусун кабыл алып, Кыз-келиндер күрөшү залына барды.

Иш сапардын алкагында коноктор Кыргызстандын кыз-келиндер күрөшү боюнча курама командасынын алдыдагы мелдештерге даярдыгы менен таанышты. Жолугушуунун жүрүшүндө Парижде боло турган жайкы Олимпиада оюндарына байланыштуу команданын алдында турган актуалдуу көйгөйлөр, аларды чечүүнүн жолдору талкууланды.

Спорттун олимпиадалык түрлөрү боюнча департаменттин директору Мелис Тобокелов менен улуттук курама команданын башкы машыктыруучусу Нурбек Изабеков спортчуларга витамин жана дары-дармек сатып алуу кечеңдеп жатканына тынчсыздануусун билдиришти. Каржылоо өз деңгээлинде каралганы менен керектүү дары-дармектерди сатып алуу боюнча тендер арыздар түшпөгөндүктөн өтпөй калган. Бул квалификациялык курамды даярдоодо олуттуу кыйынчылыктарды жаратат жана биздин спортчулардын олимпиадалык аренадагы ийгилигине терс таасирин тийгизиши мүмкүн.

Саламаттык сактоо министри Алымкадыр Бейшеналиев айтылган кооптонууларга жооп кылып, витаминдерди жана дары-дармектерди сатып алууну каржылоо КР Саламаттык сактоо министрлиги аркылуу жүрбөй турганын баса белгиледи. Ал «Кыргызфармация» мамлекеттик ишканасына дары-дармектерди тендердик жол-жоболорду өткөрбөстөн түз жеткирүүчүлөрдөн сатып алууга мүмкүндүк берүүчү Кыргыз Республикасынын Министрлер Кабинетинин буйругун даярдоону сунуштады. Анын үстүнө керектүү дары-дармектердин 80%га жакыны “Кыргызфармация” мамлекеттик ишканасынан жеткиликтүү. Министр сатып алууларды жөнөкөйлөтүү демилгеси депутаттар тарабынан колдоого алынып, жакынкы аралыкта ишке ашат деген ишенимин билдирди.