Ден соолук жаңылыктары

Акыркы жанылыктар

13

04

2024

Бишкектеги №6 үй-бүлөлүк дарыгерлер борбору оңдоп-түзөө иштерин бүтүрүп, бейтаптар үчүн жаңы жакшыртууларды тартуулады

12.04.2024

КР Саламаттык сактоо министри Ош шаардык клиникалык ооруканасынын төрөт үйүнүн иши менен таанышты

12.04.2024

Президент Садыр Жапаров Жалал-Абад облустук клиникалык ооруканасынын жаңы курулган имаратын ачты

08.01.2024
КРВИ жана сасык тумоо боюнча эпидемиологиялык абал

Мамлекеттик санитардык эпидемиологиялык көзөмөл департаментинин ыкчам маалыматына ылайык, 2023-жылдын 52-жумасына (и.к. 194,5) салыштырмалуу 2024-жылдын 1-жумасында (01.01-07.01.2024-ж.) республика боюнча КРВИ жана сасык тумоонун 8201 учуру (и.к. 116,3) катталды, б.а. - 40,2% төмөн. Ооругандардын ичинен 72,2%ын (5961 учур) 14 жашка чейинки балдар түзөт.

Октябрь айынан тарта 1315 оорулуудан анализ алынды, лабораториялык изилдөөнун жыйынтыгы боюнча эпидсезон сасык тумоонун А/Н3N2 түрү менен негизделет.

Мындан сырткары, курч респиратордук вирустук инфекциялардын циркуляциясы да байкалууда, алардын ичинен көбүрөөк риновирус 35,4%, респиратордук-синцитиалдык вирус 24,2%, парагрипп 20% жана башка вирустар 20,4% түзөт.

Оорунун жогорку көрсөткүчү Бишкек, Ош шаарларында жана Чуй облусунда катталды, и.к. 200,7; 194,0 жана 208,4 түздү.

Республика боюнча КРВИ, сасык тумоо жана COVID-19дун эпидемиологиялык кырдаалына мониторинг жүргүзүү уланууда. Мониторингдин жыйынтыгы боюнча ар жума сайын 2ден 6 учурга чейин катталып, эпид кырдаал туруктуу деп бааланууда.

 

Пандемия башталгандан бери өлкөдө 206 минден ашуун COVID-19 оорусунун учурлары катталып, алардын ичинен 2023-жылы 491 учур катталды (100 000 калкка инт. көрс. 6,8)

 Октябрь айынан тарта бардык саламаттык сактоо уюмдарында карантин жана бет кап тагынуу режими киргизилген.

 Эпидсезондун башталышы менен калк арасында беткап тагынуу, антисептик колдонуу сунушталат. Мектепке чейинки курактагы, окуучу балдар арасында оорунун белгилери пайда болгон учурда мектепке, мектепке чейинки мекемелерге жибербей, өзүн-өзү дарылабастан, оорунун өтүшүп кетишин болтурбоо максатында туура медициналык жардам алуу үчүн медициналык уюмдарга кайрылуу зарыл.

08.01.2024
Кыргыз Республикасынын Саламаттык сактоо министри кыргызстандыктарды COVID-19га каршы эмдөөдөн өтүүгө чакырды

Бүгүн, 2024-жылдын 8-январында Кыргыз Республикасынын Саламаттык сактоо министри Алымкадыр Бейшеналиев кайрадан COVID-19га каршы эмдөө алды. Министр ДССУнун алдын ала квалификациясынан өткөн «Синовак» вакцинасын алды.

«Кыргызстанда COVID-19 боюнча абал туруктуу, бирок Дүйнөлүк саламаттык сактоо уюму бардык өлкөлөрдө беткап тагынууга жана COVID-19га каршы эмдөө алууга чакырат. Мен да бүгүн эмдөө алдым жана бардык кыргызстандыктарды эмдөө алууга чакырам. Биз бардыгыбыз вакцина менен алдын ала турган оорулар менен, анын ичинде COVID-19 менен күрөшүүнүн эң натыйжалуу ыкмаларынын бири эмдөө экенин түшүнүшүбүз керек. Эмдөө оорулардан коргой алат жана вирусту жуктуруп алуу коркунучун бир топ азайтат”, - деп белгиледи Алымкадыр Бейшеналиев.

Бүгүнкү күндө Кыргызстанда ДССУ тарабынан алдын ала квалификацияланган жарактуулук мөөнөтү 2024-жылдын июнь айына чейин болгон 150 000 доза көлөмүндө “Синовак” вакцинасы бар. 2024-жылдын биринчи кварталындаPfizer вакцинасынын20 000 дозасынын келиши күтүлүүдө.

 

Белгилей кетсек, Мамлекеттик санитардык-эпидемиологиялык көзөмөл департаментинин маалыматы боюнча, республикада COVID-19 илдетине жумалык мониторинг улантылууда. Ага ылайык, жумасына 2ден 6га чейин учур катталып, эпидемиологиялык абал туруктуу деп бааланууда. Курч респиратордук оорулар менен ооруканага жаткырылган бейтаптардын ичинен көрсөткүчтөр боюнча COVID-19га анализдер тандалып алынат, лабораториялык жыйынтыктар боюнча 1 жуманын ичинде 1 тастыкталган учур катталган (Ош ш.).

  Ошондой эле, COVID-19га шектелген учурда ПЦР изилдөөгө анализ алынат. Учурда баардык облустук Оорулардын алдын алуу жана мамлекеттик санитардык көзөмөл борборлорунда ПЦР лабораториялары иштеп, тесттик системалар менен камсыздалган.

Маалымат үчүн:

2021-жылдын мартынан 2023-жылдын декабрына чейинки мезгил аралыгындажалпысынан 6 889 780 доза вакцина келип түштү жана сатылып алынды, анын ичинен:

1 548 780 доза - COVAX механизми боюнча;

2 780 200 доза – гуманитардык жардам;

Республикалык бюджеттин эсебинен «Синофарм» өндүрүшүнө таандык 2 560 800 доза вакцина сатылып алынган, алар өзгөчө кырдаалдарда колдонуу үчүн ДССУнун өзгөчө тизмесине киргизилген. Бул дозалар 2021-2022-жылдары колдонулган, эмделген адамдар жөнүндө маалыматтар коронавируска каршы эмдөөлөрдүн электрондук реестрине киргизилген. Бул системага 3,2 миллиондон ашык маалымат киргизилип, 1,5 миллиондон ашык сертификат түзүлгөн.

Эмдөө боюнча маалыматтар:

- Биринчи дозасы менен эмделгендердин саны 1 700 833 адамды (76%) түзөт;

- экинчи дозасы менен эмделгендердин саны 1 516 904 адамды (63%) түзөт;

- Үчүнчү доза менен эмделгендердин саны 430 329 адам.

- Жалпы колдонулган – 4 700 439 доза вакцина.

Бул дозалар калкты кошумча жана кайталап эмдөө үчүн колдонулат. Бүгүнкү күндө республикадагы бардык эмдөө пункттарында коронавирустук инфекцияга каршы эмдөө иштери жүргүзүлүүдө. Жарактуулук мөөнөтү 2024-жылдын июнь айына чейин болгон 150 000 доза өлчөмүндө ДССУ тарабынан алдын ала квалификацияланган “Синовак” вакцинасы бар. 2024-жылдын биринчи кварталында Pfizer вакцинасынын20,000 дозасы келет деп күтүлүүдө.

06.01.2024
Сузак районунун тургундары эми арзан баадагы дары-дармек алуу мүмкүнчүлүгүнө ээ болушту

2024-жылдын 6-январында Кыргыз Республикасынын Саламаттык сактоо министри Алымкадыр Бейшеналиев «Эл Аман» мамлекеттик дарыканасынын ачылыш аземине катышты. Жалал-Абад облусунун Сузак районундагы Үй-бүлөлүк дарыгерлер борборунда дагы бир мамлекеттик дарыкана ачылды.
Дарыканада турмуштук маанилүү дарылардын тизмесине кирген 1500дөй дары-дармек бар. Калк аларды жеке дарыканаларга караганда 10-15% арзан сатып ала алат. Мамлекеттик аптекаларды ачуунун негизги максаты - калкты жеткиликтүү дары менен камсыздоо маселелерин чечүү.
Республика боюнча жалпысынан 55 мамлекеттик дарыкана иштей баштаганын белгилейбиз.

06.01.2024
Жалал-Абад облусунда алтынчы мамлекеттик “Эл Аман” дарыканасы ачылды

2024-жылдын 6-январында Кыргыз Республикасынын Саламаттык сактоо министри Алымкадыр Бейшеналиев Жалал-Абад облусуна болгон жумушчу сапарынын алкагында Таш-Көмүр Жалпы дарыгерлик практика борборуна барып, шаардын вице-мэри Талант Мырзабеков менен бирге “Эл Аман” мамлекеттик дарыканасынын ачылыш аземине катышты.
Дарыканада маанилүү дары-дармектердин тизмесине кирген 1500дөй дары-дармек бар. Калк аларды жеке дарыканаларга караганда 10-15% арзан сатып ала алат. Мамлекеттик аптекаларды ачуунун негизги максаты - калктын жеткиликтүү дары менен камсыздоо маселелерин чечүү.
Эскерте кетсек, Жалал-Абад облусунда 2023-жылы Жалал-Абад облустук клиникалык ооруканасында, Базар-Коргон, Ноокен, Кочкор-Ата жана Токтогул шаарларындагы Жалпы дарыгерлик практика борборлорунда «Эл Аман» мамлекеттик дарыканалары ачылган.

05.01.2024
Кара-Суу аймактык ооруканасында тез жардам бөлүмү жана мамлекеттик дарыкана ачылды

2024-жылдын 5-январында Кара-Суу аймактык ооруканасында Медициналык тез жардам бөлүмүнүн жана кезектеги «Эл Аман» мамлекеттик дарыканасынын ачылыш аземи болуп өттү. Иш-чаралар КР саламаттыкты сактоо министри Алымкадыр Бейшеналиевдин катышуусунда өттү.

Аймактык оорукананын директору Дамира Бегматованын айтымында, Тез жардам бөлүмүнүн жаңы имаратынын курулушу 2021-жылы башталган. Курулуш оорукананын атайын эсебинин жана бюджетти үнөмдөөнүн аркасында мүмкүн болуп, 32 миллион сомдон ашык каражатты түздү. Бөлүм 6 керебетке ылайыкталган, ошондой эле көзөмөл бөлмөсү, изолятор, интенсивдүү терапия бөлмөсү жана башкалар каралган. Ошондой эле бейтаптарга тез медициналык жардам көрсөтүү үчүн УЗИ жана ЭКГ аппараттары, гастроскопия сыяктуу бардык керектүү медициналык жабдуулар менен жабдылган. Рентген диагностикасы жана лабораториялык изилдөөлөр үчүн өзүнчө бөлмөлөр каралган. Аймактык оорукана Ош облусунун Кара-Суу районунун 460 миң тургунун тейлейт.

Министр тез жардам бөлүмүнүн ачылышы менен бейтаптарды ооруканага түшкөндөн баштап 48 саатка чейин көзөмөлдөп, дарылоого болоорун баса белгиледи. «Мындай кыска мөөнөттүү дарылоо бөлүмдөрү облустун тургундарына медициналык жардам көрсөтүүнүн сапатын жакшыртууга жардам берет. Бүгүн биз дагы бир мамлекеттик дарыкана ачып жатабыз, ал Ош областынын ири райондорунун биринин калкын сапаттуу жана арзан дарылар менен камсыздайт. Мамлекеттик аптекалар ачылганда 800гө жакын дары-дармектердин түрү болсо, учурда алардын саны 1500гө жетти. Быйыл калкты дары-дармек менен камсыз кылуу максатында республиканын саламаттыкты сактоо уюмдарынын аймагында «Эл Аман» мамлекеттик дарыканалары ачуу иштери уланат», - деди Алымкадыр Бейшеналиев.

31.12.2023
Саламаттыкты сактоо министри Алымкадыр Бейшеналиевдин Жаңы жылдык куттуктоосу

Урматтуу кыргызстандыктар! Кымбаттуу кесиптештер!

Сиздерди келе жаткан Жаңы жылыңыздар менен чын жүрөктөн куттуктайм! Ар бирибиз бакыттын, кубанычтын жана гармониянын атмосферасына бөлөнгөн бул үй-бүлөлүк майрамды жаркын өзгөрүүлөрдү күтүү менен тосуп алабыз. Ар бир адам жаш курагына карабастан, жаңы жылда бардык тилектер сөзсүз орундалат, жакындарыбыз жаныбызда болуп, ден-соолукта болот деп ишенет.

Өтүп бара жаткан жылы саламаттык сактоону чыңдоого, ошондой эле артыкчылыктуу багыттар боюнча республиканын саламаттык сактоо уюмдарында медициналык кызмат көрсөтүүнүн сапатын жогорулатууга олуттуу көңүл бурулуп, өтүп бара жаткан КОЁН жылы саламаттык сактоо тармагы үчүн жемиштүү болду. 

Саламаттык сактоо уюмдарынын материалдык-техникалык базасын чыңдоого олуттуу көңүл бурулду. Бир катар жогорку технологиялуу жана кымбат баалуу медициналык жабдууларалынды, калкка жеткиликтүү дары-дармекти камсыз кылган “Эл Аман” мамлекеттик дарыканалар республиканын бардык аймактарында ачылууда. Ошондой эле балдарга медициналык кызматтын жеткиликтүүлүгүн арттыруу максатында Бишкек шаарынын Үй-бүлөлүк медицина борборлорунда балдардын ден соолугу боюнча кеңеш берүү бөлүмдөрү ишке киргизилди.

Оору майрам жана дем алыш күнгө карабайт, ошондуктан көптөгөн медицина кызматкерлери мекендештерибиздин өмүрүн сактап, ден соолугуна кам көрүү үчүн Жаңы жылды үй-бүлөсү менен эмес, нөөмөттө тосууга туура келет. Кээ бириңиздер сааттын жебеси 12ни каккан учурда жаңы адамдын төрөлүшүнө жардам берүү бактысына ээ болосуздар. Медициналык адистикти тандап алгандардын миссиясы оор, бирок ардактуу.

Мына ушул жаркыраган майрамдын алдында мен өлкөбүздүн бардык медицина кызматкерлерине — адам өмүрүн сактап калуу үчүн талыкпай эмгектенген дарыгерлерге, фельдшерлерге, медайымдарга, кенже медициналык кызматкерлерге: баштапкы звенонун кызматкерлерине, айылдык дарыгерлерге, тез жардам кызматкерлерине, коомдук саламаттык сактоо кызматынын дарыгерлерине ыраазычылык билдиргим келет! 

Жаңы жылда биздин алдыбызда олуттуу милдеттер турат. Дарыгерлердин, медайымдардын жана кичи медкызматкерлердин талыкпаган эмгеги жана кесипкөйлүгү, алардын жоопкерчиликтүүлүгү, жан-дили менен кызмат кылуусу жетишилген натыйжаларды бекемдеп гана тим болбостон, жаңы ийгиликтерге жетишүүгө да жардам берерине ишенем.

Кымбаттуу достор! 2024-жылы бардык пландарыңар, тилектериңер жана максаттарыңар ишке ашсын. Жаңы жылда сиздерге жана жакындарыңызга тынчтык, бейкутчулук, бакубатчылык жана, албетте, чың ден соолук каалайм!

Жаңы жылыңыздар менен!

29.12.2023
Дарыгерге онлайн жазылуу: Саламаттык сактоо министрлиги кызматты жаңылады

Министрлик Санарип MED Саламаттык сактоону өнүктүрүүнүн максаттуу моделин ишке ашыруунун алкагында интеграцияланган санариптик медициналык картаны жана дарыгердин кабыл алуусуна онлайн жазылуу кызматын киргизүүдө.

Кызматтын техникалык модернизациясы бейтаптарга ыңгайлуулукту жогорулатууга жана үзгүлтүксүз иштөөнү камсыз кылууга мүмкүндүк берди.

Модернизацияланган кызмат баштапкы денгээлдеги саламаттык сактоо уюмдарынын (ҮМБ, ҮДТ) үй-бүлөлүк дарыгерлеринин кабыл алуусун онлайн режиминде түзүүгө мүмкүндүк берет, өз кезегинде кууш адистиктеги дарыгердин кеңешин алуу зарыл болсо, медициналык каттоочу, дарыгер же медайым бейтапты кеңеши зарыл болгон кууш адистерге, мисалы, ЛОР, эндокринолог, кардиолог жана башкаларга жөнөтө алат.

Ошондой эле кызматты “Түндүк” электрондук кызматтардын мамлекеттик порталы жана MEGA мобилдик операторунун мобилдик тиркемеси менен интеграциялоо боюнча иштер жүргүзүлдү. Бул кызматты колдонуу каналдарын кеңейтип, аны жарандар үчүн ыңгайлуу жана жеткиликтүү кылат.

Ошентип, сиз онлайн режиминде бир нече жол менен дарыгерге жазыла аласыз:

№1 вариант. Бирдиктүү санариптик ден соолук порталынын сайты

1. i.med.kg бирдиктүү санариптик ден соолук порталына өтүңүз

2. " Дарыгердин онлайн кабыл алуусуна жазылууну" тандаңыз

3. ПИН жана телефон номериңизди киргизиңиз

4. Керектүү адисти тандаңыз

5. Ыңгайлуу күндү жана убакытты тандаңыз.

Онлайн каттоо даяр, электрондук талонду сактап, кабыл алуу күнү медициналык каттоочуга жана/же дарыгерге көрсөтүңүз.

№2 вариант. "Түндүк" мобилдик тиркемеси

1. “Түндүк” мобилдик тиркемесин ачыңыз

2. “Менин ден соолугум”, андан кийин “Дарыгерге онлайн жазылууну” тандаңыз.

3. Система сиздин маалыматтарыңызды автоматтык түрдө көрсөтөт (ПИН, сиз катталган саламаттык сактоо уюмду жана медициналык камсыздандыруунун бар экендиги, ошондой эле сиздин уюлдук телефонуңуздун номери).

4. Керектүү адисти тандаңыз

5. Ыңгайлуу күндү жана убакытты тандаңыз.

Онлайн каттоо даяр, маалыматтык документти сактап, кабыл алууга барган күнү медициналык каттоочуга жана/же дарыгерге көрсөтүңүз.

№3 вариант. Мобилдик тиркеме "MegaPay". Тиркеменин каалаган идентификацияланган колдонуучусу бул кызматты колдонуп, онлайн режиминде дарыгерге жазыла алат. Бул үчүн сиз:

1. “MegaPay” мобилдик тиркемесин ачыңыз

2. Кызматтардан "Дарыгерге онлайн жазылууну" тандап, "Жазылуу" баскычын басыңыз.

3. Өздүк маалыматтар тастыкталгандан кийин, система сиздин маалыматыңызды автоматтык түрдө көрсөтөт

4. Керектүү адисти тандаңыз

5. Ыңгайлуу күндү жана убакытты тандап, ырастаңыз.

Онлайн каттоо даяр, санариптик талонду сактап, кабыл алууга барган күнү медициналык каттоочуга жана/же дарыгерге көрсөтүңүз.

Кандайдыр бир себептерден улам сиз дарыгерге бара албай калсаңыз, "Жазылууну жокко чыгаруу" жаңы функциясы бар экенин эске алыңыз.

Хирург жана травматолог сыяктуу кууш адистердин кабыл алуусу да бар. Министрликтин жумушчу тобу онлайн режиминде жазылуу мүмкүн болгон кууш адистердин тизмесин кеңейтүү зарылдыгын карап жатат.

Эскерте кетсек, бейтап ден соолугун текшертүү үчүн кайрыла турган эң алгачкы медкызматкер бул үй-бүлөлүк дарыгер же үй-бүлөлүк медайым болуп саналат.

Үй-бүлөлүк дарыгер үй-бүлөлүк медайым менен биргеликте көпчүлүк ооруларды аныктайт жана дарылайт, баланын өнүгүшүнө жана өнөкөт оорулары бар бейтаптардын ден соолугунун абалына көз салат, бейтаптарды керектүү кууш адистерге жана лабораториялык жана/же инструменталдык изилдөөлөргө жиберет, ошондой эле ооруларды алдын алуу жана дарылоо боюнча сунуштарды берет.

Министрлик ошондой эле «Дарыгерге онлайн жазылуу» кызматын жөнөкөй жана ыңгайлуу кылуу максатында популярдуу мобилдик тиркемелер менен интеграциялоонун үстүндө иштеп жатат.

28.12.2023
Саламаттык сактоо министри Бишкектеги №1 төрөт үйүндө болду

Бүгүн, 2023-жылдын 28-декабрында, Кыргыз Республикасынын Саламаттык сактоо министри Алымкадыр Бейшеналиев Бишкек шаарындагы №1 төрөт үйүндө болуп, капиталдык оңдоодон өткөн операциялык, кабыл алуу жана реанимация бөлүмүнүн иши менен таанышты. Жалпысынан оңдоо иштерине 4 млн сом бөлүнгөн.

Төрөт үйүнүн башкы дарыгери Замира Матубраимова алардын мекемеси борбордогу эң алгачкы төрөт үйү экенин, имарат 1939-жылы курулганын белгиледи. Бул жерде жылына 5-5,5 миңге жакын бала төрөлөт. Үстүбүздөгү жылдын 9 айында 4620 бала төрөлсө, анын 273ү ара төрөлгөн, 78и эгиз. Ошондой эле, сапаттуу медициналык кызмат көрсөтүү үчүн тиешелүү шарттарды камсыз кылуу үчүн ири көлөмдөгү жабдуулар сатылып алынды, анын ичинен: 6 керебет мониторлору, 6 түйүлдүк мониторлору, 1 операциялык стол, неонаталдык инфузоматтар, буу стерилизатору, кургатуучу меш, биохимиялык жана гематологиялык анализаторлор, коагулометр. «Жыл сайын жашоочулардын саны көбөйүп, ага жараша кайрылуулардын саны да көбөйүүдө. Ал эми биздин төрөт үйүнүн аймагына дагы жаңы имарат курулса абдан жакшы болмок», - деди башкы дарыгер.

Министр кызматкерлерди келе жаткан Жаңы жылы менен куттуктап, иштерине ийгиликтерди, биримдикти каалап, медицинага кошкон салымы үчүн ыраазычылык билдирди. Ал ошондой эле төрөттүн жыл сайын көбөйүшүнө байланыштуу энелерге жана жаңы төрөлгөн ымыркайларга сапаттуу медициналык кызмат көрсөтүүгө мүмкүнчүлүк түзө турган жаңы заманбап имарат куруу зарылдыгын баса белгиледи. Ал төрөт үйүнүн башкы дарыгерине маселени мындан ары чечүү үчүн Саламаттык сактоо министрлигине жаңы имарат куруу долбоорун сунуштоону тапшырды.

28.12.2023
2 миллиондон ашык санариптик эмдөө карталары түзүлдү

Кыргыз Республикасынын Саламаттык сактоо министрлиги «iEmdoo» маалыматтык тутумунун жардамы менен вакциналарды алган адамдарды персоналдык эсепке алууну жүргүзүүдө.

Санариптик эмдөө картасы эмдөөлөрдүн бардык түрлөрү, анын ичинде пландуу жана эпидемиологиялык себептер боюнча жүргүзүлгөндөр боюнча толук жана персоналдаштырылган маалыматтарды камтыйт. Ал ошондой эле медициналык каршы көрсөтмөлөр, эмдөөдөн кийинки мүмкүн болуучу терс таасирлер жана бейтаптын өмүр бою ден соолугунун башка маанилүү аспектилери жөнүндө маалыматтарды камтыйт.

Санариптик эмдөө картасын түзүү процесси автоматташтырылган жана төрөт үйүндө жаңы төрөлгөн баланы биринчи эмдөө учурунда башталат. Андан кийин алынган маалыматтар саламаттык сактоо системасынын бардык деңгээлдеринде эмдөөлөрдүн ишенимдүү жана бирдиктүү эсепке алынышын камсыз кылуу менен баштапкы деңгээлдеги саламаттык сактоо уюмдарына өткөрүлүп берилет.

Санариптик чечимдин маанилүү артыкчылыктарынын бири – үч тилде – кыргыз, орус жана англис тилдеринде эмдөө сертификаттарын түзүү мүмкүнчүлүгү.

Бүгүнкү күндө биринчи жолу 2 015 166 санариптик эмдөө карталары түзүлүп, алдын ала 20,1 млн сом үнөмдөлгөн. Санариптик эмдөө карталары маалыматтын жоголушуна жол бербестен, ар кандай медициналык мекемелердин ортосунда маалымат алмашууну жөнөкөйлөтүп, ошондой эле коомдук саламаттык сактоо тармагында натыйжалуу башкаруу чечимдерин кабыл алууга негиз түзөт.

Эскерте кетсек, жарандар санариптик эмдөө картасы “Түндүк” мобилдик тиркемесиндеги “Санарип Ден соолук профили” аркылуу жеткиликтүү. Бул санариптик чечим ден соолугуңузга жана маанилүү медициналык маалыматтарды көзөмөлдөө үчүн негизги курал болуп калат. Белгилей кетчү нерсе, ата-энелер да бул тиркеме аркылуу жашы жете элек балдарынын эмдөө боюнча маалыматын алуу мүмкүнчүлүгүнө ээ, муну менен үй-бүлөнүн бардык мүчөлөрүнун медициналык тарыхын көрүүгө толук жана ыңгайлуу мүмкүнчүлүк түзүлөт.

Учурда профилактикалык эмдөө календарына ылайык адамдарга вакцинаны алууну эскерткен кабарлоо системасын иштеп чыгуу иштери жүрүп жатат. Бул билдирүүлөр автоматтык түрдө “Түндүк” мобилдик тиркемесине жөнөтүлүп, жарандарга профилактикалык иш-чаралардын зарылчылыгы жана маанилүүлүгү тууралуу өз убагында маалымат берилет.

Министрлик эмдөө процессин бардык жарандар үчүн мүмкүн болушунча ыңгайлуу жана маалыматтуу кылууга умтулат жана бул максатка жетүү үчүн “Түндүк” мобилдик тиркемесин колдонуу негизги ролду ойнойт.

28.12.2023
ЮНИСЕФ Кыргызстанга вакциналарды сактоо үчүн 11 жаңы муздаткыч камераларды берди

Декабрь айында ЮНИСЕФ жана Саламаттык сактоо министрлиги Кыргызстан боюнча саламаттыкты сактоо мекемелерине 11 жаңы муздаткычтарды жеткирүү демилгесин көтөрүшкөн. Жабдуулардын жана монтаждын жалпы баасы 35 миллион сомдон ашат. Бул объекттер Канада өкмөтү тарабынан вакциналардын коопсуз сакталышын камсыздоо боюнча глобалдык демилгенин алкагында каржыланат.

Муздаткыч камералар Баткен, Чүй, Ысык-Көл, Жалал-Абад, Нарын жана Ош облустарына орнотулат. Бул жерлер Саламаттыкты сактоо министрлиги менен макулдашып, ар бир аймактын өзгөчө муктаждыктарын эске алуу менен тандалып алынган.

Имараттардын көлөмү 10 м3 жана 30 м3, бул вакциналардын олуттуу көлөмүн сактоого мүмкүндүк берип, жакынкы жылдарда бул аймактардын күтүлүүчү керектөөлөрүн жабат.

Имараттарда көпчүлүк вакциналарды жана дары-дармектерди туура сактоо үчүн зарыл болгон +2ден +8ге чейин туруктуу температура сакталат. Жабдуулар бардык катаал стандарттарга шайкеш келүүсүн камсыздоо үчүн Дүйнөлүк саламаттыкты сактоо уюму тарабынан алдын ала квалификациядан өткөн.

Бардык камералар 2024-жылдын февралына чейин орнотулат. Муздаткыч камералар вакциналардын ай сайын берилишин камсыз кылууда, алардын субнационалдык деңгээлде жеткиликтүүлүгүн камсыз кылууда маанилүү ролду ойнойт.

27.12.2023
Саламаттык сактоо министри Алымкадыр Бейшеналиев Бишкек мамлекеттик кыргыз-түрк достук ооруканасына барды

2023-жылдын 27-декабрында Министр Алымкадыр Бейшеналиевдин катышуусунда Бишкек мамлекеттик кыргыз-түрк достук ооруканасынын башкы дарыгери, доктор Илкер Акардын башкы дарыгер жана хирург кызматтык мөөнөтү аяктагандыгына байланыштуу Достук ооруканасынын коллективи менен коштошуусу болуп өттү.

Доктор Илкер Акарга 1 жылдык кызмат мөөнөтү учурунда Достук ооруканасын жетектеп, эки өлкөнүн медициналык кызматкерлерин бириктирип, достугун чыңдоо, жарандарга медициналык жардамды уюштурууда жана оорукананын базасында алгачкы жолу бөйрөк трансплантациясын уюштурууда жетишкен ийгиликтерин баалап “Саламаттык сактоонун отличниги” төш белгиси тапшырылды.

Өз учурунда доктор Илкер Акар Кыргызстанда өз өлкөсүндөгүдөй сезип, кыргыз элин бир тууган катары кабыл алганын белгилеп ыраазычылык билдирди.

 

27.12.2023
Шаардык перинаталдык борбордо төрөт бөлүмү капиталдык оңдоодон өткөрүлдү

Шаардык перинаталдык борбор Бишкек шаарындагы эң чоң төрөт үйү болуп саналат, быйылкы жылдын тогуз айында Перинаталдык борбордо 9 миңден ашуун төрөт катталып, алардын ичинен 1400 ара төрөлгөн, 149 эгиз, төрт үч эм жана бир төрт эм төрөлгөн.

Төрөт үйүнө түшкөн энелерге шарт түзүү үчүн Бишкек шаардык Перинаталдык борбордо жаңылоо иштери жүрүп жатат. Быйыл төрөт бөлүмү толук капиталдык ремонттон өткөрүлгөн. 

Жасалган жумуштар менен жеринен барып Саламаттык сактоо министри Алымкадыр Бейшеналиев таанышып келди. Борборго болгон иш сапарынын алкагында министр кош бойлуу аялдарга жана энелерге шарт түзүүнүн маанилүүлүгүн белгиледи. Ошондой эле республикада энелерге жана жаңы төрөлгөн ымыркайларга сапаттуу жардам көрсөтүү үчүн перинаталдык борборлорду, балдар ооруканаларын, төрөт үйлөрүн куруу, аларда медициналык кызмат көрсөтүүнүн сапатын жогорулатуу маанилүү экенин белгиледи.

Капиталдык ремонтко 10 млн сом сарпталганын Перинаталдык борбордун жетекчилиги билдирди. Ошондой эле ара төрөлгөн балдардын ден соолугун турукташтырууга жардам берип, кычкылтек менен камсыз кылгам аппараты коюлганын да белгиледи. “Биздин борбордо 10 бөлүм бар, ачылгандан бери ремонт иштери жүргүзүлбөй келген. Акыркы жылдары бул иштер колго алынып,  кабыл алуу бөлүмү, кош бойлуу аялдардын патологиясы, жаңы төрөлгөн балдардын реанимациясы сыяктуу беш бөлүм капиталдык ремонттон өткөрүлдү. Быйылкы жылдын эсебинен Капиталдын оңдоп-түзөө иштерине кеткен каражаттын жалпы суммасы 18 млн түздү, анын ичинен 10 млн 100 мин сому төрөт бөлүмүнө, фасадды оңдоого 4,5 млн, тамак-аш кампасына 2,0 млн сом, андан тышкары майда оңдоп-түзөө иштерине дагы 1,5 млн сом сарпталды. Ошону менен бирге 2023 жылдын ноябрь  айынан министрдин буйругу менен электрондук төрөт баяндары  киргизилди. Лабораториялык анализдердин  жыйынтыгы да автоматташтырылган системага киргизилип,эне менен балага медициналык жардамдын сапаттуу болушуна көмөк  көрсөтүүдө”, - деди Жамила Марипова, Перинаталдык борбордун башкы дарыгери.

27.12.2023
Бишкекте балдардын адистештирилген консультативдик бейтапканасы ачылды

Бүгүн, 2023-жылдын 27-декабрында, Кыргыз Республикасынын Саламаттык сактоо министри Алымкадыр Бейшеналиев Бишкек шаарындагы Манас проспектиси, 12 дарегинде жайгашкан Балдардын адистештирилген консультативдик бейтапканасынын ачылыш аземине катышты.

Министр эне жана баланын ден соолугу Саламаттык сактоо министрлигинин ишиндеги артыкчылыктуу багыттардын бири экенин баса белгиледи. Бишкек шаарындагы балдарга өз убагында, сапаттуу жана квалификациялуу медициналык жардамды камсыз кылуу максатында балдар бейтапканасын уюштуруу чечими кабыл алынган. «Шаардын жашоочуларынын саны өсүп, ошого жараша балдар ооруканаларына кайрылгандардын саны өсүүдө. Жыл сайын КРВИ жана сасык тумоо сезонунда Шаардык балдар клиникалык тез жардам ооруканасында жана Эне жана баланы коргоо улуттук борборунда узун кезек күтүүлөр болот. Күнүнө 700гө жакын бала кайрылса, кайрылгандардын 80% амбулатордук бейтап болуп саналат. Балдардын адистештирилген консультативдик бейтапканасынын ачылышы ооруканалардын жүгүн азайтып, кезек күтүүлөрдү кыскартып, алардын ишин жакшыртат», - деди Алымкадыр Бейшеналиев.

Балдардын адистештирилген консультативдик бейтапканасынын директору Айнура Абдылдаева билдиргендей, бейтапкана башка Үй-бүлөлүк медицина борборлору сыяктуу иш алып барат. Дарыгерлер күн сайын саат 08:00дөн 18:00гө чейин кабыл алышат. КРВИ жана сасык тумоо сезонун эске алып, дарыгерлер ишемби жана жекшемби күндөрү нөөмөттө болуп, саат 14:00гө чейин кабыл алынат. «Бүгүн биз ачылдык, толук кандуу 2024-жылдын 2-январынан тарта иштей баштайбыз деп пландап жатабыз. Бизде азыр педиатрлардан тышкары логопед жана балдар ортопеди, хирург, невропатологдор бар. Балдар адистерин тартуу боюнча иштер активдүү жүрүп жатат. Бизде балдар гинекологу, ЛОР, сурдолог, логопед, невропатолог, ортопед, хирург дарыгерлери кабыл алуу жүргүзүшөт. Биздин консультативдик бейтапканабыздын ишинин аркасында ооруканалардын түйшүгү азайып, балдарга сапаттуу амбулатордук жардам көрсөтүлөт деп ишенебиз», - деди бейтапкананын директору.

27.12.2023
Бишкекте жеке менчик клиникаларга жана стоматологиялык кабинеттерге рейддик текшерүүнү кайра баштоо пландалууда

Бүгүн, 2023-жылдын 27-декабрында Кыргыз Республикасынын Саламаттык сактоо министри Алымкадыр Бейшеналиев Бишкек шаарындагы Мамлекеттик санитардык-эпидемиологиялык көзөмөлдөө борборунун кызматкерлери менен жеринде кеңешме өткөрдү.

Жыйындын жүрүшүндө Бишкек шаарында жугуштуу оорулардын, атап айтканда, сасык тумоо, курч респиратордук вирустук инфекциялар, вирустук гепатит, кызамык ж.б.

Жыйындын жыйынтыгында 2024-жылдын 15-январынан баштап Кыргыз Республикасынын Саламаттык сактоо министрлигинин буйругуна ылайык медициналык ишмердүүлүк жүргүзүүгө лицензиясы жок жеке медициналык клиникаларды, борборлорду жана стоматологиялык кабинеттерди аныктоо боюнча рейддик текшерүүлөрдү кайра баштоо сунушталды. Ал эми жеке менчик бала бакчаларды жана мектептерди санитардык-эпидемиологиялык ченемдер жана эмдөө карталарынын болушу боюнча. 

Ошондой эле коомдук тамактануу жайларында санитардык китептердин бар-жогу жана санитардык нормалардын сакталышы боюнча текшерүүлөр пландалууда.

27.12.2023
Саламаттык сактоо министрлиги ведомстволук отчетторду кагаз түрүндө түзүүдөн баш тартты

Кыргыз Республикасынын Саламаттык сактоо министрлиги санариптик трансформациянын алкагында ведомстволук кагаз түрүндөгү отчеттордон толугу менен баш тартып, маалыматтарды чогултуу жана иштетүү үчүн санариптик платформага өтүү чечимин кабыл алды.

Бул демилге маалыматты чогултуу жана талдоо процесстерин оптималдаштырууга, ошондой эле ресурстарды үнөмдөөгө багытталган. Алдын ала эсептөөлөр боюнча, санариптик отчеттуулукка өтүү саламаттык сактоо тармагына жыл сайын болжол менен 10 миллион сом үнөмдөөгө мүмкүндүк берет. Бул каражаттар мурда жол киреге жана кагаз сатып алууга жумшалган.

Бул демилгенин артыкчылыктары төмөнкүлөрдү камтыйт:

Натыйжалуулук: Санариптик маалыматтарды иштетүү так эсептөөлөрдү жүргүзүүгө жана трендди анализдөөгө мүмкүндүк берет, бул башкаруу чечимдерин туура кабыл алууга өбөлгө түзөт.

Ресурстарды үнөмдөө: Кагаз отчетторун жок кылуу акчаны үнөмдөйт, аны саламаттык сактоонун маанилүү муктаждыктары үчүн колдонсо болот.

Экологиялык туруктуулук: кагазды колдонууну азайтуу экологиялык жоопкерчиликке жана туруктуулукка шайкеш келет.

Бул чечим ошондой эле маалыматтардын жеткиликтүүлүгүн, маалыматтын тезирээк иштетилишин жана саламаттык сактоо системасынын ачыктыгын жакшыртат.

26.12.2023
Бишкекте Кыргызстанда спорттук медицина кызматын жакшыртуу боюнча көйгөйлөр жана аракеттер талкууланды

Бүгүн, 2023-жылдын 26-декабрында, Кыргыз Республикасынын Саламаттык сактоо министри Алымкадыр Бейшеналиев Кыргыз Республикасынын Жогорку Кеңешинин депутаты Улукбек Ормонов менен бирге Спорттук-реабилитациялык борборго барып, борбордун эмгек жамааты, спорт жылдыздары Айсулуу Тыныбекова, Айпери Медет кызы, Акжол Махмудов жана алардын машыктыруучулары менен жолугушту.

Жолугушууда Кыргызстанда спорттук медицина кызматын жакшыртуу боюнча көйгөйлөр жана аракеттер талкууланды.

Министр белгилегендей, учурда иштеп жаткан Спорттук-реабилитациялык борбордун ордуна же ага кошумча катары Кыргыз Республикасынын Маданият, маалымат, спорт жана жаштар саясаты министрлигине караштуу Дене тарбия жана спорт департаментинин алдында «Кыргыз спорттук-ден соолукту чыңдоо медицинасынын борбору» мамлекеттик ишканасын түзүү маселеси көтөрүлүп жатат. Кеп чоң спорт жана 2500 спортчуну тейлөө үчүн ишкана түзүү боюнча жүрүп жатат, анын штаттык бирдиги 26 кызматкердикамтыйт, ал эми бирге Спорттук-реабилитациялык борбордун базасында 24 миң спортчу жана дене тарбия жана спорт менен алектенген адамдар каттоосунда турат - булар Бишкек шаарындагы жана Чүй облусундагыспорттун ар кандай түрлөрү боюнча балдар жана өспүрүмдөр спорт мектептери, Чуркоо клубу, ден соолугунун мүмкүнчүлүгү чектелген жарандар, сергек жашоого үндөгөн борбор калаанын тургундары. Бүгүнкү күндө борбордо 146 медицина кызматкери иштейт. «СРБ КР Саламаттык сактоо министрлигинин спорттук медицина жана дарылоочу дене-тарбия боюнча жалгыз адистештирилген мекемеси болуп саналат жана аны сактап калуу гана эмес, өнүктүрүү керек. Спорт департаментинин алдында Чоң спорт ишканасын түзүүдөн жана коммерциялык ишмердүүлүктү өнүктүрүүдөн мурда көйгөйдү кылдат изилдеп чыгып, ийгиликтүү иштеп жаткан уюмду жоюуну талап кылбай, реалдуулукту өзгөртүү үчүн жаңы идеяларды жана чечимдерди табуу керек”, — деди Алымкадыр Бейшеналиев.

СРБнын материалдык-техникалык базасы чындап эле начар, бирок кырдаалды жакшыртуу үчүн бардык чаралар көрүлүүдө: 2023-2024-жылдарга керектүү медициналык жабдууларды сатып алуунун сметалык планы түзүлгөн. Өткөн 2022-жылы эхокардиограф, санариптик аудиометр, УЗИ аппараты алынып, рентген кабинети жана травматология бөлүмү жаңыланып, жабдылган.

«Чоң спорт ири каржылык инвестицияларды, анын ичинде спорт чиновниктери тарабынан да олуттуу инвестицияларды кылат. Спорт департаменти СРБнын экинчи уюштуруучусу (КР Саламаттыкты сактоо министрлиги менен бирдикте) катары бардык келишимдерди бузуп, борборду өнүктүрүүгө жана жабдууга бир тыйын да жумшаган жок. Медициналык кызматтын сапаты үчүн Саламаттыкты сактоо министрлиги жооп берет, аны аталган борбордун кызматкерлери ийгиликтүү аткарып келишүүдө», - деди өз кезегинде КР Саламаттык сактоо министрлигинин спорттук медицина боюнча башкы штаттан тышкаркы адиси Бактыгүл Алишева.

Азиянын беш жолку чемпиону, дүйнөнүн үч жолку чемпиону, Дүйнө кубогунун жеңүүчүсү, ар кандай эл аралык мелдештердин жеңүүчүсү, Токио Олимпиадасынын күмүш байгесинин ээси, КРнын эмгек сиңирген спорт чебери Айсулуу Тыныбекова дагы азыркы иштеп жаткан спорттук реабилитациялык борборду жоюунун туура эместигине токтолду. «Азыр биз бул борборду жоюу маселеси чыгып жатканына күбө болдук, бул биз үчүн күтүүсүз болду. Анткени бул Кыргызстанда жалгыз гана Улуттук курама команданын спортчулары эмес, дене тарбия жана спорт менен алектенген балдар жана бардык мектеп окуучулары медициналык кароодон өткөн жалгыз борбор. Балдар биздин келечегибиз! Алар биздей чемпион болууга умтулушат, ошондуктан бул борбор аларга керек. Эгерде алар спортчуларды даярдоо үчүн жаңы клиника же борбор курабыз десе, бул башка маселе, бирок азыркы спорттук-реабилитациялык борборду жоюу маселеси болбошу керек. Борборду сактап калуу жана тескерисинче колдоо керек. Мен 14 жылдан ашык убакыттан бери бул борбордун адистерине кайрылып келем, бул жерде Бактыгүл Насыровна Алиева сыяктуу өз тармагынын кесипкөйлөрү иштешет», - деп белгиледи Айсулуу Тыныбекова.

26.12.2023
Бишкекте балдардын сейрек кездешүүчү оорулары боюнча мастер-класстар өткөрүлдү

21-22-декабрда Эне жана баланы коргоо улуттук борборунда россиялык “Көпөлөк-балдар” кайрымдуулук фонду менен биргеликте буллездук эпидермолиз жана тубаса ихтиоз менен ооруган балдарды дарылоо боюнча конференция жана мастер-класстар өткөрүлдү. Эки күндүн ичинде сейрек кездешүүчү оорусу бар 19 бала текшерилип, консультациялар берилди.

Мындай балдарга медициналык жардам көрсөтүүнү уюштуруу татаал болгондуктан, Эне жана баланы коргоо улуттук борбору тарабынан Орусия жана Өзбекстандан дерматологдор чакырылган. Бул өлкөлөрдө адистештирилген дерматологиялык борборлор бар. Чет элдик кесиптештер лекцияларды окуп, мындай балдарды диагностикалоо, башкаруу жана дарылоо боюнча тажрыйбалары менен бөлүшүштү.

“БЭЛА. Көпөлөк-балдар» кайрымдуулук фондунун дарыгерлери жергиликтүү дарыгерлерди окутуп, эпидермолиз жана ихтиоз менен ооруган балдарга дары-дармек жана медициналык буюмдар түрүндө 3 миллион рублга жакын гуманитардык жардам көрсөтүшөөрүн билдиришти.

Россия Федерациясынын жана Кыргыз Республикасынын дарыгерлеринин ортосунда жогоруда аталган оорулардан жапа чеккен адамдарга жардам көрсөтүү жаатында практикалык тажрыйба алмашуунун жакшы келечеги бар.

Орусиялык кесиптештер биздин республикага Россия Федерациясынын медициналык коомчулугу колдонгон керектүү таңуу каражаттарын, буюмдарды, дары-дармектерди жана косметикалык буюмдарды өз каражаттарынын эсебинен алып келишти.

26.12.2023
“COVID-19га ыкчам чара көрүү” долбоорунун алкагында Токтогулдагы Оорулардын алдын алуу жана мамлекеттик санэпидкөзөмөл борборунда вакциналарды сактоочу кампанын курулушу аяктады

2023-жылдын 26-декабрында Кыргыз Республикасынын Саламаттык сактоо министринин орун басары, башкы мамлекеттик санитардык дарыгер Бүбүжан Арыкбаева Токтогул шаарындагы Оорулардын алдын алуу жана мамлекеттик санитардык көзөмөл борборунун вакцина сактоочу кампасын ачуу аземине катышты. Курулуш Дүйнөлүк банк тарабынан каржыланган “COVID-19га ыкчам чара көрүү” долбоорунун аркасында ишке ашты.

Вакцина кампасы абаны эффективдүү желдетүү үчүн желдетүү системасы, жылытуу батареялары жана суу жылыткыч менен жабдылган. Мындан тышкары, жаңы электр менен камсыздоо системасы, коопсуздук жана өрт өчүрүү системасы орнотулду.

Жаңы кампанын имараты бардык санитардык-эпидемиологиялык талаптарга, ошондой эле “муздак чынжыр” талаптарына (белгиленген температуралык шарттар жана сактоонун башка шарттары) жооп берет.

Жаңы кампанын курулушу менен саламаттыкты сактоо уюму өзгөчө температуралык шарттарды талап кылган вакциналарды сактоого мүмкүнчүлүк алды.

«Инфекциянын жайылышын алдын алууда вакциналар негизги ролду ойнойт. Вакциналарды туура сактоонун маанилүүлүгү, өзгөчө муздак чынжырдын талаптарына ылайык, алардын натыйжалуулугун жана коопсуздугун камсыз кылат. Вентиляция, жылытуу, электр менен камсыздоо жана коопсуздук системалары бар атайын кампаларды орнотуу вакциналарды сактоо үчүн оптималдуу шарттарды сактоого жардам берет, бул эмдөө программаларын ийгиликтүү ишке ашыруу жана калктын ден соолугу үчүн өтө маанилүү”, - деп белгиледи Бүбүжан Арыкбаева.

Ушундай эле курулуш иштери Токтогул жана Ала-Бука, Жалал-Абад, Баткен шаарларындагы райондор аралык оорулардын алдын алуу жана мамлекеттик санитардык-эпидемиологиялык көзөмөлдөө борборлорунда, ошондой эле Ош областындагы Араван айылдагы, ошондой эле Ак-Талаа айылындагы санитардык-эпидемиологиялык бөлүмдөрүндө бүткөрүлдү. Ал эми Кербен айылындагы санитардык-эпидемиологиялык бөлүмдүн кампасынын курулушу аяктоо алдында турат.

Долбоордун максаты Кыргыз Республикасынын Өкмөтүнө тиешелүү алдын алуу иш-чараларын камсыз кылуу, дары-дармектерди, керектелүүчү материалдарды жана медициналык жабдууларды сатып алуу, ошондой эле саламаттыкты сактоо уюмдарындагы шарттарды жакшыртуу аркылуу COVID-19 пандемиясына каршы аракеттенүү жөндөмдүүлүгүн күчөтүүгө көмөк көрсөтүү болуп саналат.

26.12.2023
Саламаттык сактоо министрлиги: Майыптык фактысын аныктоо үчүн 450 документтердин пакети онлайн түзүлдү

Саламаттык сактоо министрлиги санариптик чечимдерди колдонуу менен медициналык кызмат көрсөтүүнү дебюрократизациялоону улантууда.

Ошентип, Өкмөттүн акселераторлор программасын ишке ашыруунун алкагында экспертизадан өтүү, кайра экспертизадан өткөрүү жана майыптык фактысын аныктоо тартибин санариптик трансформациялоо жүргүзүлдү. МСЭК органдарына медициналык-социалдык экспертизага электрондук жолдомолорду түзүү жана жөнөтүү процесстери кайра иштелип чыкты. Санариптик чечим бейтаптын активдүү катышуусун талап кылбастан мамлекеттик органдардын ортосундагы өз ара аракеттенүүгө мүмкүндүк берет.

2023-жылдын биринчи жарым жылдыгында ведомстволор аралык кызматташуунун алкагында Бишкек шаары боюнча 450 документтин пакеттери боюнча корутундулар ийгиликтүү түзүлүп, кабыл алынган. 2024-жылы республика боюнча санариптик чечимди жайылтуу пландаштырылууда. Бул өлкөнүн бардык жарандары үчүн медициналык-социалдык экспертиза процессинин ыңгайлуулугун жана натыйжалуулугун бир топ жогорулатат.

26.12.2023
КР Саламаттыкты сактоо министри Сауд өнүктүрүү фондунун өкүлдөрү менен долбоорлордун жүрүшүн талкуулады

2023-жылдын 26-декабрында Кыргыз Республикасынын Саламаттык сактоо министрлигинде Кыргыз Республикасынын Саламаттык сактоо министри Алымкадыр Бейшеналиев менен Сауд өнүктүрүү фондунун (СӨФ) Борбордук жана Батыш АзиядагыОперациялар боюнча директору Мохаммед Алмасуд мырза жетектеген өкүлдөрүнүн жолугушуусу болуп өттү. Ошондой эле жыйынга депутат, Кыргыз Республикасынын Жогорку Кеңешинин Социалдык саясат боюнча комитетинин төрайымы Винера Раимбачаева катышты.

Жолугушууда тараптар «Бишкек шаарындагы мамлекеттик балдардын тез жардам ооруканасын реконструкциялоо жана кеңейтүү» долбоорунун жүрүшүн талкуулашты. Ошондой эле Сокулуктагы жалпы дарыгердик практика борборунун жаңы имаратын куруу боюнча жаңы долбоорду ишке ашырууну талкуулашты.

Министр Сауд өнүктүрүү фондуна Кыргыз Республикасынын саламаттык сактоо системасын өнүктүрүүгө кошкон салымы үчүн ыраазычылык билдирди. «Сауд Өнүктүрүү Фонду менен кызматташуу биз үчүн өзгөчө мааниге ээ. Балдар ооруканасын куруу долбоору башталгандан бери бир топ иштер аткарылып, бүгүнкү күндө биргелешкен аракеттер менен курулуш графикке ылайык уланууда. Жаңы долбоор да жакынкы жылдарда ийгиликтүү ишке ашып, Сокулук Жалпы дарыгерлик практика борборунда жаңы имарат пайда болот деп ишенебиз”, -деди Алымкадыр Бейшеналиев.

Мындан тышкары, «Медициналык борборлорду жабдуулар менен камсыз кылуу жана карантиндик аймакты куруу жана жабдуу» гранттык долбоорунун алкагында медициналык жабдууларды жеткирүү боюнча келишим түзүлдү, ал 4 саламаттыкты сактоо уюмун жабдыйт: Түп райондук ЖДПБ, Кара-Кулжа ЖДПБ, Улуттук фтизиатрия борбору жана Жүрөк хирургиясы жана органдарды трансплантациялоо илимий изилдөө институту.